HE PA I HLU E

Enteh! Helaiah hian nichin lawk khan phengphehlep pahnih kha tap chungin an thlawk asin. Hmuh che tumin ka lo ko che a ka kiangah I awmlo a ni tih ka lo theinghilh avangin ka zawng kual ruai che a mahse khawnge I awm tih zawh ngailoin ka hmu che,ka thinlungin a hmu che mahse min hmu ve si lo. An tap a, tap chungin an thlawk dun kha ka hmu reng a, an tap zo chiah tihiin midum pangpar zu zuk tura an inumphei kha ka hmu leh a, an nun kha hmanah kan neih tawh kha le tiin chhui kir ka tum a mahse ka mithlaah nang ka hmu si lo che a, ka zawng ruai a, ka au che a min chhang hauh lo. Khawizu chu chu dawt tura sawm che ka tum a, ka hmu si lo che. Ka mithlaa ka nun chu a bul atangin ka chhui leh a,ka la hmu ta chuang lo che a nih chu.
 Aw, ni a tla ta ka hmuh loh che avanga ka zawnna lamah ka kutzungtangte hi tih zumin a awm a,ka mitte hi tih vaih a ni ta, ka fin loh vang nge ka thinlung ka’n hawn chiang meuh chu nang ka kiangah I lo awm reng si. Engngatinge I ngainat ka hmuh lai khan nang ka hmuh si loh che, enteh! ka hrelo mang e tiraw? I ngainat kha ka ngainat avangin ka zawng ruai chauh si che a.

Nang ka dil laia ka thingthit naah ka khup pawh a charin ka hmui pawh a ro zo ta, mahse nang ka dil chhuah avanga inchhirna ka nei hauh lo. Ka kiangah awmlo la nitina ka lu chunga chhumte hi a chhah hle tur. Mahse nang ka kiangah I awma tih tak meuha ruahin a thinrim ka chunga a leihbuak paw’n ni a lo lan leh tak hi! Ka lawm e tia kawthlera ka au paw’n min zahpui suh la, tuallaia ka rak chiam paw’n min khapdai hek suh ang che. I hnena lawmthu sawi ka thiamloh piah lamah kei zawng heti mai hi ka ni si a. ka chakna thuhruk haichhuak tura khua a var lohzia ka hriatpoh leh ka thla a muang a, khawvelah hian mikhual ka ni tih ka hriatchian poh leh ka lung a awi a, ka chaklohna ka hriatchian poh leh chakna ka mamawhna ka hre lo a, nang ka hnena I awm avangin. Engtinnge I hnen ka thlena engtin nge miin min hriat tih ngaihtuah ngai loin nang chuan chu nihna chu min pe tawh bawk a, engnge ka thluak senna tur la awm te ka ti mai mai a, finna luia tui thal hun a nghahhlelh awm mang e

Sahuai ni do ang maia ka kun chang te, khawvel hi ka ngam ve dawn nggang lo nia ka hriat changte hian nang ka phaw I awm a, ni chuan min tlaksan loh phah fo a ni tih hi mual I liam hma ngeia ka hrilh loh che chuan mi tlaktlailo piahlama mi chhawrtlak loh ka nihna ka ti  chiang dawn si a,hrilh lo che mah ila ka awm ang angin min pawm dawn a ni tih ka hriatna erawh ka tana I hlutna ti sangtu a ni thung si.  Chu hlutna chu ka teh thin a, eng tawngkam mawi ber nge hrilhfiah nan che ka hman ang tiin ka inzawt fo thin mahse ka hmu zo si lo. Ka tana I hlutna hi nangmah atanga trh chuan I hlutna  I hre dawn si lo a, keimah atanga teh chuan a nasa si a, chu i hlutna zawng zawng chu khawvela tawngkam mawi bera sawi fiah ka  tum pawhin ka hmu zo si lo. Engpawh nise nang chuan ka tan a i hlutzia ka tehna a a tamzia I hriat hunah min hrilh la, van enin kan la sawi leh ang chu ti raw?

Khawvelah hian mamawh tam tak ka nei a, ei leh in tam tak ai chuan min hmangaihtu pakhat ka duh a, silhfen man chhiar sen loh ai chuan thian pakhat  ka mamawh zawk a, thiamna sang tak aiin rilru thianghlim taka min dawmtu ka thlahlel a, rangkachak thi leh lunghlu inbel sen loh aiin keimah avanga khawvel nuam ti tu ka thlahlel fo a, sum tam tak chhuan tur aiin min zahpui lo tu ka mamawh fo thin. Chung hunah chuan ka lungngai lo nang I awm a. ka lawmna erawh sawi aiin sawilohah ka tlak fo si a mahse I hai chuang loh kha tiraw? I hai lohna ringawt pawh kha ka tan chuan zo thei lo khawpa lawmthu sawina tham a tling  ani tih I hriat fo ka duh takzet a nia

Min lo thlir teh, heta hi ka awm e, ka koh che chu I hria em? min hmu pha lo tiraw tunah tak hi chuan mahse min hria tih ka hriat avangin nnag chu thinlung takin ka bulah I awm a nia aw, ka hria che alawm. Ka hriat mai piah lamah min hria tih ka hriat avangin ka lung a awi teh mai a nia. He leihlawn hi hmanah khan nang chuan min lawnpui tawh a, I kut ka vuan lo a,ka kut I vawn avang maia lawn chhuak thei ka nih kha ka hrilh tawh che em ka hre leh mai ta lo a, a mak thin mang e. Ka hmu ve tho a nia patek hi, mahse min hrilh avang maia hmu ka ni tih ka lo theinghilh leh thin. Nia naktuk hi thilmak a nih hunah chuan nang pawh hi lunghlu aiin  I hlutna a tla hniam ang. Tunah chuan nimin kan chhiar ang bawk hian naktuk kan nghak a, chutichuan tunge naktuk chu thilmak ti ang le?

Vawi tam tak arsi ka chhiar a vawi tam tak thla seki ka hmu tawh asin.. He thu hi ka hrilh tawh che em kha? Chu pawh ka hre lo fo. Ka lo hrilh tawh che a nih paw’n I la ngaithla peih tiraw?  mahse ka hrilh nawn tawh lo ang che aw, zanah arsi chhiar turin kawtah ka ding thin tih I hriat kha.  Nang hi, nang ngei hi ka hria alawm. Van ka en apiangin min thlir rengtu a awm a ni tiih ka hrechhuak a, min hmangaihna ka ngaihtuah a, min enkawlna ka ngaihtuah leh a, ka hmangaihna nen ka teh a, heti em em hian ka te a ni tih ka hrechhuak leh thin, mahse ka lawm a ni  nang ka hnena pek I nih miau avangin. Khitatanga min thlir rengtu ka ngaihtuah chhuah apiangin nang ka kiangah ka hmu che a, chu chuan ka lawmna a ti zual thin.

Khawvelah hian daha ka awm hma khan engang nge I nih ka hriat ngailohna aia nasain nang chuan min hre lo a, boruak thianghlim tam tak hi nun nan ka thawlut dawn a ni tih I hriat hma khan tuifim luang delh delhte hi ka nunna a pawimawh berte zinga mi a ni ang tih ka ring pha lo. Tlangte hian ka hnenah thu tam tak an sawi dawn a ni tih i hriat hma khan tunge ka nih I hre lo a mahse nangchuan kei hi I thinlung them ka ni tih I hria tiraw? Hre lo mahla ka phunnawi lo e, I hnenah daha ka awm tho hi maw?

Lo kal teh ‘hman’ kha sawi lawk teh ang. Lui luan her herna kara lungkhawkrawk pui pui min zawhpui ni kha. Khang lunglian pui pui te kha tun thlengin keimahin lawn dawn ila ka la ngam lo asin. Ka thinlunga huaisenna min pek kha tu dangin nge min pe leh thei ang le, thinghnah chawrno diai diai hlim dap hnuaia awm pilh phunga kan lum ni leh sava bu lem kan siam ni kha ka la hria alawm, ka nate kha I hmu a, I miitmenga khawngaihna leh lainatna pawh kha ka la hria asin, ka la hmu e tunah ngei pawh hian mahse ka lawm e ka thinlung takin ka lawm e

Thinlung natna inah ka lut I hmu fo a ni lawmni? Engatinge min hruai chhuah loh tiin ka awm ka chumfo a, mahse chu natna chuan zirlai ka theinghilh ngailoh tur min pe dawn a ni tih I hriat avangin nang chuan chhuak lo turin min hrilh a, a hunah erawh ka chhuah loh I hlauh vangin I buai leh zawk si. Ka lo chhuak ta e, hlimna hi tahchhuah a ni tih ka zir ta e, ka hre ta e tahna hi hlim hlutzia hriatna  ni tih hi. hlimna ka tapchhuak a, tahna pawh ka hlimchhuah ta e.

En teh ka’n ti leh pek teh ang. Khawvelah hian vawi 10 pawh piang nawn dawn mah ila ka unaupa ni tur hian tudang ka thlang chuang lo ang nang lo hi chu. “Ka lawm e ka Pa van a mi” tiin ka tap lo thei lo a ni, ka mittui I hmu tiraw? Tun tum chu min hruk hul sak suh aw, lungngaih avanga ka mittui hruksenloh a nih hunah ka kiangah I awm dawn tih ka hhre tho a, lawm avanga ka mittui chu I ta a ni a, min hruksak suh la, a aia tam a tlak theih nan bei tauh tauh zawk la ka va’n ti em!!

Saw ka hmu e sava chu. Khawvel nuam ti takin lungawi takin a thlawh saw, van boruak thiang zau takah khian a thla  la zarpharh ang a, a la thlawk kual leh delh delh ang. Ka lawm e unaupa

Unaupa lo kal teh, sawlai hmunah sawn I va tap dun ang hmiang nang I ni bawk a…