min hrilh rawh

min hrilh rawh
Min hrilh rawh tiin vawi tam tak ka au a, I hria a ni lawm ni?
Zankhaw tairek thleng thlengin I khumah I tal vel a, mutmu I hmu bik lo a tiraw?
Zan reiah ngaihtuah nei miahloin khuavel I chuan a, I ngaihtuah ber lah chu engmah lo a ni ve tho tiraw?
A chhan lah chu I hre bik der lo a ni lawm ni?

Kha’ng hun zawng zawngte kha I tan a hlu ve tho tiraw?
Min kalsan I tumna lamah I tha neihchhuunte a zawi zo a, min hmuh loh nan tiin kawng peng dangah min pen san a mahse I rilru chuan ka hnen a lo pan reng ve tho thin tiraw?
I mang ramah leh zel min hmu a, hriatreng I duhloh, theinghilh I duh te khan I mang lamah an la rawn pan talh ve tho che ti raw?
Kei lo chuan I nunah hmun an la chang ngailo ve tho tiraw?
I rilruah keimah lo chu a awm lo ve tho tiraw?
Baiwhte zing chhun zanin ka sakhmel chauh a ni lawm ni I hmuh ve thin tho?
I mangah pawh tudang niloin keimah I hmu ve thin tho tiraw?
min hrilh rawh keimah chiah ka ni bik lo tih hi!


Zanlaiah tap chungin I thangharh a, I tah chhan hre siloin
I tum vang rengin I tap lo ve tho tiraw?
Tahna chuan I duh emaw duhlo emaw a enkawl ve tho che a ni lawm ni?
Tunah chuan tah loh chu tih theih dang I neilo ve tho tiraw?
I bianga mittui luang zawih zawih khawpin i au chhuak ve tho tiraw?
Tui taka I hahchawl lai chu I phu zawk a, I harh thut a, chiang takin kaiharh tu che a awm ve tho tiraw?
I nunah engngemaw kimlo awmin I hria a, engnge a nih chiah I hre lo ve tho ti raw?
Chu thil kimlo neih let theihloh tur neih let duh si avangin I nun a chau ngawih ngawih ve tho tiraw?
min hrilh rawh keimah chiah ka ni bik lo tih hi!

Tunah khan Hmangaihnain I nun a chelh hram hram ve tho tiraw?
Chu hmangaihna chuan beiseina chhete a pe ve tho che a ni lawm ni?
Chu hmangaihna chu I la nei let leh ngei dawn niin I inhre ve tho a mahse beiseina beidawnthlak a ni tih hre chungin a nihna chu i pawmngam bik lo tiraw?
I beiseina chu beisei bo a nih I ring bik lo ve tho tiraw?
Bawihte chatuante hi tawi ta riau dawna hriatna I nei ve tho tiraw?
I dam chhungin I nghah chu nghahchhuah I tum ve tho a ni lawm ni?
Ka chunga thillo thleng te hi ring ngam a mumang mai a ni lo tih ring turin min duh ve tho tiraw?
Chu thil thlen tirtu chu haw ngawih ngawihin inhre mahla a bula awm a,a hmangaihna chen leh I thlahlel ve tho tiraw?
Bawihte kan hmangaihna tello kha chuan dam I thlahlel bik lo tiraw?
Ka tello chuan nun hi engmahlo mai niin I hre ve tho tiraw?
Min hrih rawh bawihte keimah chiah ka ni biklo tih hi!
Bawihte min hrilh rawh keimah chiah ka ni bik lo tih hi!

Ruahsur buan buan hnuaia kan din dun reng tum kha I la hria em?
Thusawi tur baihvai taka min siam ni kha
Ka duh chuan kalsan ngai lo tur chein ka intiam thei asin mahse hun kha a tlem em ani!
Kei mimawl-finna tuikhur hleuh tur nei velo tan chuan kha hun kha a reilo em a ni!
Fing taka chhang tur che a kan hun neih tlem si kha a va’n na em!
Ka tawrh tur zawng zawng te hi hre lawk ni ila, kha ruahsur hnuaia ka thinlung so a bulh bulh kha chhem mit tumin ka tha tawpin ka tang tur!
Thu mawl tak tak ka rilru a awm nazawng ka chhamchhuah kha pawi I ti ve tho tiraw?
min hrilh rawh keimah chiah ka ni lo tih hi!

Kha hunah ngei khan let thei ila I ti ve tho tiraw?
Chu'ngte chu keimah chiahin ka duh bik a ni lo ti min hrilh rawh?
Bawihte khawngaih takin nangpaw’n chu'ng duhthu te chu I sam ve tho a ni tih min hrilh rawh.
Mawh! Min hrilh rawh khawngaih takin!
Tunah hian ka kiangah awm la,min kuah la,min pawm la
I thinlung zawng zawngin I ring a ni tih min hrilh la ka va’n duh em!
Nang leh kei hi khuanu ruat kan ni tih hi.
Min hrilh la,min hrilh zel la ka va’n ti em!

Hmangaihna hian I nun a ti chau ve tho tiraw?
Mahse vawiin khan engngatinge hlim tak a nui hmel ka la hmuh si
Ka mittui te hi a tlem I ti ve tho em ni?
Kei I neih letna a nih phawt chuan engkim I huam ve tho tiraw?
Ka zawhna zawng zawng hi ka duhdan thlapin chhangla I ti ve tho tiraw?
Min ngai lutuk a,khawvel te hi ruak huaiin I hre ve tho tiraw?
Keimah chiah ka ni bik lo tiraw khing zawng zawng duh tu chu.
Bawihte ka duh ang hi I duh ve tho tiraw?

Mawh!bawihte kan hmangaihna kha tunding leh duhtu chu keimah chiah ka nilo tin min hrilh rawh
Min hrilh rawh bawihte min hrilh rawh keimah chiah ka ni bik lo tih hi!

                                  tih inziahna lehkha them chu vawi tam tak mittui tla chunga ka chiarna ni mahse ka chhiar ning thei lo. Ka fanuin a boral dawna a dahna ngaiah chiah chuan ka chhiar zawhah ka dah leh a, “bawihte engngatinge min kalsan min hrilh rawh” tia ka phun mawlh mawlh ri chauh chu ka hria a!