ka hre reng che

Kum sawm liamta khan pawl sawm ka ni a, khatih hunlai khan kum sawm hnuah engtin nge ka awm ang tih hriat ka chak ber thin a, hun hi kal thuai thuai se tiin ka awmdan tur ka hisap lawk thin. ka duh ber ka ni a,ka hnathawh chak ber ka thawk a, ka tuailai val nen ka hlim em em a, zana arsi chhiar chungin kum sawm hnu dang ka hisap naah chuan ka hisap vel thin. Hei, kum sawm a ral ta cheng a, khang hun laia ka hisap ang pakhatmah kha tihhlawhtlin a ni lo a, chuta karah nang nen kan inhriat avangin ka lawm a, khang kum sawm chhunga ka hisapah khan tello mah la tunah ka vui chuang hlei lo a, vui a hnekin ka lawm zawk a ni


Kum sawm liamta khan tunge i nih a, engnge i nih ka hre hauh lo mahse kum sawm zinga kum tlemte chauh kan inhriat hnuah erawh tunge i nih a engnge i nih tih ka hriat thawi tak hi. Hmanah kum tam tak liam ta atang khan ka tawngtai a, Pathian hnenah thil tam tak ka dil fo a, a chang chuan min chhan dan tur ka hre lawk emawni aw tih chang ka nei fo thin. ka nu chuan vawi tam tak "Kan chungah thil chhe ber a thleng thei a,thil tha ber a thleng thei bawk" tih min hrilh fo thin a, a chhe ber atana inpuahchah aiin a tha ber atan ka inpuahchah zawk fo a,mahse a chhe ber chu ka ta a nih chang a awm tho mai. A chhe ber nia ka hriat ka ta lo nita thin chu ka ngaihtuah chian poh leh a aia chhia tam zia ka ngaihtuah a, chu thil chu ka ta a ni tih ka hriat hnu feah a aia chhia chu mita a ni tih ka hreta thin a nih chu, ka lungngaih hman teh reng nen tunahh chuan ka lawm zawk fo thin a, ka lawmna chu kan chunga arsi te, ni leh thla te khi ka hrilh mawlh mawlh thin

Tawngtainate hi chhan vek an ni tih ka hre lo fo thin a, a chhanna erawh a hrang mai a  ni tih ka hre lo fo bawk. Pathian hnenah thil tam tak ka dil a, ka nuna ka duh dan thlengin, ka awmdan tur te, ka duh mai niloin ka chhungte, ka thiante awmdan turte ka sawi a, ka thlen a, an tan ka dil fo thin. A chang chuan Pathian hi ka lo kar mah mah em aw te ka ti zawk hial asin tunah chuan. ka tawngtai tam poh leh a chhanna ka hmu tlem  zawk emawni aw ka ti fo a, ka tawngtaina te hi a ngaithla lo emawni le tiin ka insawh ka insawh fo thin. Mahse tunah chuan ka hre ta, ka hun kalta zawng zawng ka thlir let a, ka dil hmain min chhang a min chhanna leh ka duhdan a lo inang lo mai a lo ni tih hi

Nia, nangmah ang bawkin chakna ka dil thin alawm, chakna ka dil apiangin ka na ngawih ngawih thin. Chung ka natna te chu chak tura min lo enkawlna a  ni a, huaisenna ka dil a, huaisen taka ka hma hun hmachhawn ka dil thin mahse a ngai ang bawkin hlauhna min pe a, huaisen ka zirna turin chu hlauhna chu ka min kaltlang tir thin. Hahdam tak leh hlim taka awm ka duh a, mi vannei ber ni tur in ka dil fo bawk , chuti chung chuan thinlung ruak ngawih ngawihin min siam a, a na ka ti asin a hunlai kha chuan mahse ka hre ta, kha thinlung ruak ngawih ngawih leh vanduai bik nia inhriatna khan khupzawi hnawkin min siam a, kha thinlung ruak ngawih ngawih kha tih khah beiseiin Ama hnen min pan tir thin a nih chu! Ka va’n lo hre lo em!

Tuna i natna leh i nat dan tur kha ka hrethiam lo emaw I ti mai thei a, ka na ve lo emaw pawh I ti mai thei bawk. Ka hre ngailo emaw I ti maithei a, ka chakloh phah chuang lo emaw I ti maithei bawk. A awlsam ang chu ka ti hauh lo a, a na lo ang pawh ka ti hek lo. I duh dan leh I beisei loh taka I awm kha a harsat dan tur ka hria a, vanduai bik nia I inhriat rukna pawh kha ka hre pha viai vuai asin. En teh! A  nihna ang anga pawm har dan tur ka hria alawm, I tawn ang ka tawng ve e ka ti lo a, ka tawn loh zia hretu I ni mahse I tawn ang hu deuhthaw ka lo tawn tawhna atangin ka in teh ve ngial asin. Tawngtai chhanna hi “ni lo e” tih chu a na ang a, "I tana tha zawk tur a ni” tia a chhan pawh pawm a harin a na ngei ang mahse ka hrilh ang che-kan duh zawng zawng hi kan Pa vana mi khian min pe ringawt  lo a, min pe ringawt duh hek lo mahse kan mamawh min pe asin. Chhan kan ni tih kan hriat hmain min chhang fo a, kan awmdan tur min relsak angin min awm tir a, sawiselin rak rakin van tawp thleng paw’n phun mahila min tichaktu, huaisenna leh chhelna min petu atan a lo ni reng zawk thin a ni. Kan dil hmaa min pe thin tu chuan engatinge kan tawngtaina te a ngaihthlak loh teh lul ang. "Hei hi ka dil lo" i ti maw? Khawvela pian i dil chuang bik em ni? I lo pian tirh a boruak thawk luh turte kha i dil chuang lo a ni lawm ni? naupanlai hun pawh i dil lo a, mahse a pe che a, hnute tui pawh i dil em nu/ mahse nu hnute tuia chawm len i nih si kha maw!

Malsawmna kan tih te hi hringnuna tha kan tih chauh emaw kan ti fo thin, mirethei chuan retheihna hi malsawmna a ni tih hre rawh se, chu retheihna phena thlalrau malsawmna a hriatthiam phawt chuan khawvela mi hausa kan tih ber ai pawhin a hausa zawk dawn si a. Damlo chuan a damlohna kha malsawmna a ni tih a hriat rual rualin dam a ni tih a inpawm ang a, hringnuna damna hi taksa  chauh ni loin rilru damna a ni tih a hrethiam mai ang. Natna hrehawmna, retheihna leh vanduaina zawng zawng hi mi pakhatah bel vek  a ni lo a, a ni ngai bawk hek lo ang. Boruak thawlut thei kan nihna ringawt pawh hi malsawmna a ni si a, malsawmna hi a chhiar thiamtu tan chuan chhiar senloh  a awm reng asin. Nang leh kei malsawm kan ni, chu malsawmna chuan hring nuna thil tha ber berte min pe  a ni lo mahse thil chhia kan tihte phena nun mawina kan hriat chu malsawmna a ni a, malsawm kan ni tih kan inhriatna chauh pawh malsawmna  alo ni si a.

Ka sawi kha chakna te, thiltihtheihna te, vanneihna te, thatna te, finnate hi min pe ringawt lo a, a aia chhia kan tih, chheber kan tih fo, a chang phei chuan kan duh loh berte atangin a ni khing te khi min pek thin. Chhe ber nia kan hriat atangin tha ber min pe a, kan duh loh ber atangin kan duh leh kan mamawh min pe a, kan beiseiloh atangin a ni beiseina-khawvel damchhan leh khawvel inghahna min pek thin chu. Kan duh niloin kan mamawh a ni min pek thin. Khawvela kan taksain a mawmawh aiin kan thlarau leh rilruin a mamawh, amah kan hnaih zel nana kan mamawh a ni min pek thin chu. I tawngtaina chhanin a awmlo a ni lo a, a hmangaih bik lo che a ni lo a, a endawng bik che a ni lo. Dak chhuak la, hawi la, khuavel han thlir teh mi vannei bikte zinga chhiar tel I ni ngei ang, I mamawh-I thlarauin a mawmawh pek nan I tisa a hmang a ni tih I hriat chuan.

Vannei ber turin siamtuin min siam lo a, vanduai ber ni turin min siam heklo tih hrethiamtu I ni a, vanneihna leh vanduaina chu a chhiartu thinlungah chauh a innghat  a ni tih hrethu I ni bawk. Ka lungngai lo, a chhan ka hrilh ang che aw,  vanneihna petu I hria a, vanduaina ni a kan ngaih zawng zawng atanga beiseina petu neitu I nih bawk avangin. A awlsam ang ka ti lo ka tih kha, mahse kan chaklohna atanga chakna hlutzia te, kan natna atanga hlimna, lawmna leh beiseina kan chhar duhawm bik zia te, kan duhloh na atanga thil mawi duhawm kan chhar duhawm bik zia te, danglamna chhete kan neih atanga hlutna kan chhar chhuah thar te par mawizia I la hria ang, I hriat hunah chuan min hre reng la ka va’n duh em!

kum sawm liamta atangin tunah ka pakai ta daih a, mak i ti em? kum sawm hnuah chuan kan heti tawh lo pawh a ni maithei a, i tan heng thu sawi tur hian ka awm tawh lo mai thei bawk. ka sawi thin kha-hun chauhin hun kalna a hre si.

Nia, Rinna, beiseina, hmangaihna te hi pathianin mihringte hnena a pek ropui ber te zinga mi an ni, rinna I tan ka duh a, beiseina I tan ka duh a, hmangaihna I tan ka duh bawk e. ka hre reng che aunty!