MADRIN LUIKAMAH

Chu luikama leichhun pawn bula thutna mawih tawh taka thu chung chuan tlai ni tla tur chu a thlir a, chu nizung leh tlai boruak vawt reih chuan khawvel a ti mawizualin dam man a ti awm hliah hliah emaw tih tur a ni. Chu thutnaa a thu chu thla tam tak ka hmuh tawh avangin a kal lam leh hawlam pawh inhmelhriatsa ang maiin chupa nen chuan kan innuih deuh sang thin avangin inhmelhriat sa ang mai hian ka rilru in ka nel tlat a, a ni pawhin a chutih ve bawk ka ring thin. Ni engngemaw chen ral hnua ka hmuh takloh avang chuan engnge a chanchin tia ngaihven ka tumna lamah heng thu hi ka hre ta a.

Madrin khaw daifema madrin lui luang delh delh chuan chu khua chu a chawm mai nilon a kam vela intih hlimna hmun tha tak a pek avangin chu luikamah chuan mi hrang hrang hmuh tur an awm reng thin. Kum 40 chuangfe kalta khan madrin luikamah chuan nitin nula pakhat rilru hah intih thawven nana lo kal thin a awm a, chu nula chu nula hmeltha tak leh pianthiam tak a ni hran lo a, tlangval han thlir zui vawng vawngtu a neih pawh a hre lo a, chu luikama han kal chhan mihring pawh anei hran lo. Hun a neih remchan apiangin chu luikamah chuan a kal a, ruah a sur leh ruah sur hnuaiah ading a, a en ngai enin a ding tlawk tlawk thin. Khawvelah amah chauha awm nia a inhriat changte, a chauh em em changte leh harsatna mahni maia chinfel thehloh a neih changte chuan chu lui chu a kiangah awm tlatin a hria a, a taksa mai nilo a rilru leh  a thinlung zawng zawng chuan chu lui chu a thlahlel a, amaha nghet taka bet tlat ang mai a ni. Chu hmunah chuan mi chi hrang hrang lo kal ve te chu nuam tawl tur mai mai an ni em tih lam aiin chu lui chuan a nuna thu a sawi hrang hrangte avang chuan chulai hmun chu angaina hle a ni. Thla tam fe chutia luikama a din hnu chuan thil pakhat hriatchhuah a nei ta!

Chu luikamah chuan tlangval pakhat rilru hah a ni tih hriat ngawih ngawih, a hmel landan atanga thingtlang tlangval a ni tih hriat ve tak leh bawrchhawr ve tak hi a lo kal ve thin a ni tih chu. Chu tlangval rilru hahna chu engnge a ni tih a hre lo a, tlangvala chuan nula-i chanchin pawh chu a hre bawk hek lo. Chu hmunah chuan damna a awm niin an hre dun a ni chek ang chu vawi tam an intawk a, vawi tam chu luikama tlai ni tla chu an lo thlir dun tawh thin. Chu nula chu madrin thingtlanga nurse tlemte zinga mi a nih avangin hretu a ngah hle a, tlangval han chhawnchhaih tu pawh a hmu ve nual a mahse pemlut a nih angin a chanchin thui tak hre mumal an awm hauh lo a ni. Thla tam tak chu luikamah chuan a kal a,mi tam lohna lai apiang chuhin amahin hun engnegmawchen a awm thin a ni. Chu hmunah chuan john-a ngei pawh vawi tam tak a kal a, taksa inhlat lo tak si, rilru inhlat takin chulai hmunah chuan tlai ni tla chu an thlir liam thin. John-a chuan engnge a ngaihtuah ang tih pawh ngaihtuah hmel pu loin chu nula chuan a melh ngai reng a melh a.vawi tam tak chu hmuna an inhmuh tak hnu chuan inbe ngai lemlo mahse han innuih suk changte a lo awm a, a chang phei chuan ‘hi!’ tia chibai han inbuk changte an nei ve nawk thin

Damdawiin khumah chuan chau takin a mu a, tih theih dang nei hek lo a a rilruin thil tam tak a ngaihtuah a, a hun kaltawhte chhuia a inngaihtuah lai chuan kum tam tak kaltaa madrin luikama tlangval bawrchhawr zet kha a hrechhuak a, a vawikhat hriatchhuahna mai a ni hek lo. Khapa kha engtin  zel nge a awm ang tih a hre lo a, han chhui zui ngaihna pawh a hre hek lo. Madrin khua a chhuahsanna chu kum sawmthum chuang ni tawh mahse kha luikam kha a thienghilh ngai lo a, a khaw mipuite lah a theihnghilh ngai hek lo. Kha luikamin a nun chau tak a tih harh sawng sawng laite, thih mai duh rum rumna aneih chang pawha nunzel theihna thuruk a pekte lah chu lunghlu thami ang maiin a roh a, theinghilh a hnekin a hrriatrengna piahlama paih bo theihloh bur tluk a ni si a. Kha luikama tlangval vawi tam tak a hmuh thin mahnise biak en pawha a lo enlohin a hnena thu a sawi tam zia lah a hai der si lo. Chu tlangval a hriat hnu reilo te atanga sawi tura nitin a inkar thu tlemte lah chu sawilohin kum heti chen a upbo chu a la ni si. Eng fakauin nge mawlh a, a hnenah eng thlarau nge thawk tih lah chu amah mai bakah tumah rengin an hriapui teuh lo a, a ngaihtuah chian apiangin mak a ti a, a lawm a, pawi a ti a, a hlimpui a, a tahpui fo bawk thin. Kha tlangval tello a nun hmang tur a ni tih a inchhutchhuah chian poh leh na a ti a, a ngaihtuah zawm ngam tawh loh avangin amah leh amah han insawh deuh nawwk nawk chang a nei fo a, buai ruk viau chang lah a ngah. Madrin luikianga a awm tawh loh avangin a taksa leh rilru a chauh changte’n kalna mai tur a hre lo a, chutih hunah chuan chu tlangval hmel chu a ngaihtuah a, ani chuan chakna pe thar lehin chu khaw luite hre reng chung chuan a nun a hmang chho ta bek bek a ni. Nun hian amaha inherkual changte a nei fo thin a, a chang chuan kan dawihzep leh kan tumloh vangtein ruatlawksa ni miahlo pawha nun ve naw naw chang a awmfo thin ang bawkin jenny chuan a nun chu a hmang chho a, a duhdan leh ‘ni zawk se’ tih tam tak nei chungin ngawi rengin a nun chu a hmang chho ta hmiah hmiah mai a ni. Kha thu tawite, ka hrilh tawh ang tia a invau fona thu kha lo hrilh se chuan tuna a nun mai nilo kha tlangval-a thian pawh nilo, a hmelhriat satliah nun kha a sawi danglam vek tur a nia.

Chu khua chu reilo te te chhuahsan mahse a hnain a zir miau avangin a letna ngaiah bawk a let leh thin a, fanghmir inpuluta inpuchhuak ang intih viau chang pawh a ngah ta ve ang. Madrin khaw chhuak nilo mahse chu khaw fachuam a ni emaw tih mai turin johny chu chu khuaah chuan a lar a, pa rawn kai leh mite zah ber ni tawh mahse kum tam tak liamtaa a rilru leh thlarau hahchawlh nana madrin luikam-mi awmlohna lai chuha tlangval pawr ve tak lo kal ve ziah thin kha a ni tih tumah rengin an hre lo.

Hmanah khan chu hmunah chuan nula pakhat a lo kal ve thin a ni tih ahriat hnu chuan tuma telloa hahdam tum a nih avangn a chawlhmun sawn tumin a rilru a siam a mahse a tuk a lo thlen chuan chu hmun ngai bawk chu a pan leh thin. Zantin chu lai hmunah chuan a kal tawh loh tur thu a intiam a, a tuk tlai a lo thlen apiangin chu hmun chuan hipna hranpa a nei emaw tih tur khawp leh a nuna bet tel tlat emaw tih turin chu hmun pan bawk chuan a chhuak leh thin. Kha nu kha tunge a nih a, engnge a nih tih hre ngailo mahse a thinlungah a riak reng a, a hre reng thin a ni. Thla tam tak chu luikama a chawlhhahdam apiang chuan chu nula chu a hmu a, biak tum fo mahse a hlawhchham tlai tin thin a, a tumna a nasat poh leh a hlawhchham chiang emaw tih mai tur a ni. “i dam em” tih tal ka sawi tawh ang tia thla tam a inkau hnu pawh chuan ‘hi!’ tih bakin hma a sawn thei teuh si lo. A hmel a hmuh apiangin a nuna ruak nia a inhriatna te, chau ngawih ngawih nia a inhriatna te, hnawlhnu leh duhlohhnu nia a inhraitna te chu tihboin a awm a, mithar ni leh ta angin a inhria a, a hmalam hun huphurhawm tak nia a hriatte pawh awlsam ta riau niin a hre fo a, a lakah pangchang theilo mahse chu nu chuan a nun a sawi danglam hle a, a hriatloh karin beiseina tam tak a lo siam sak reng a ni.

 Kum hnih dawn chu madrin luikama hahdamna a zawn hnu chuan kha nula kha a hmu ta ngai reng reng lo mai a, “engatinge” tia a khaw mite a zawh lahin tuma’n chhan ngaihna an hre thin si lo. Ani chuan a hming  a hre lo a, a awmna a hre bawk hek lo a, nula chanchin a hriatchhun erawh madrin luihnara thingbuk hnuaiah a thu thin tih chauh a ni si. Chulai hmun lah chu tu vakmah kal ngailohna a lo ni hlauh nen. Nikhat chu a damloh avangin chu khaw te takte damdawiinah a kal a , chu hmunah chuan chu nula chu nurse a ni tih leh khawdangah sawn a ni tih a hre ta a, khami ni ang reng renga a beidawn kha a la hre ngai lo ang. A beiseina lo neih tak avangin lawmthu sawi tumin nitin chu luikam lam pan chuan a chhuak thin a, nakinah ka la hrilh em em ang  atih chhungin kum a liam a, a lawmna thlentu mihring ngei pawh chu lakbo sakin a awm ta si. Kum tam tak a vei hnu pawh chuan chu nula chu a hre reng thin a, a theinghilh ngai lo. Vawi khat tal a hnena lawmthu sawina hun awmse aw  a ti vawng vawng thin. Madrin luikama an intawh laia a lo hrilh mai lo kha a inchhir a, inchhir lah a sawt tawh der si lo. Chu nula chu zawnhmuh tumin kum tak bei mahse hlawhtln ni reng reng a nei thei si lo a, amahah kimlo riau awma inhriain kum tam tak a hman phah ta  ni.

Kum sawmli chuang a ral a, Madrin luikam tlawhtu pawh chu an tlem sawt hle mai. Madrin khaw mipuite chuan an tana chu lui hlutna chu an hai ta emaw tih hial tur khawpin tlawhtu pawh a nei mumal ta lo. Hmana chu luikama tlangval khan sang pawr fip fep tak, tu khawkha mahin a an hriat loh, hmun rehin a hnem thin ngei kha chu luikamah chuan a din vang vang a,luikama nula thu thin kha  hmuh tumin nghak eng ang mahse nghahchhuah ni reng reng a nei dawn lo tih lah a hre chiang si. Kha nula kha mibik nia sawi ni ngailo mahse john-a rilruah chuan a cham reng thin si a nih kha. Sumdawnna leh a hna avanga hun enngemaw chen a chhuahsan khua ngeiah chuan let lehin chu khuaa a hun hman dan thin ang chuan hun hman leh a tum a, mahse mi danglam a nih tawh si avangin a them pawhin a theih tawh teuh si lo. A tlangval laia a tih thin dan bawkin chu madrin lui kamah chuan tlai tin a kal a, theihai buk hnuaia thu chungin tlai ni tla tur a thlir ziah thin a ni.

Chutia a rilru te kawma thil tam tak a ngaihtuah lai chuan hmeichhe naupang hmel fel tak hian a dara rawn khawih pahin lehkha them eng hlui zet tawh mai hi a pe a..chu lehkha chu a chhiar a, “mami khawiah nge in awm” tih pahin chu naupang chu a zui nghal a. an awmna in a va thlen chuan in chhe rip rep tak banga thlalak lianpui intar hnuaia pa upa lam thu chu a va hmu a, chu thlalak chu a en vang vang lai chuan a mahchu hmeh sawk ang mai hian a hit chhuak vek a, kha nu luikama nula thlak ngei mai chu a va hmu ta! Jenny thlalak kawk pah chuan a awmna te zawtin hmuh a duh thu achu ban takin a sawi chap chap a, a kianga hmeichhe naupang ding reng melh pah chuan chu pa chuan “nang hi a lo ni maw” tih pahin a mittui hnam chu tumin a tang sauh sauh a, chu hmeichhe naupang lah chuan engmah hrethiam hek lo, an pahnih sirah chuan ngawi rengin a lo ding a,  chu pa bawk chuan john-a hnenah chuan “jenny khan i chanchin hi min hrilh fo thin a, i lehkha tur kan intawn hmaa a ziah pawh a dahtha reng thin. Chu lehkha chu pek che a tumfo thu te, a pek ngamloh che thu leh a hnu phei chuan zawn hmuh ngaihna che  a hriatloh thu a sawi thin. Kan inneih ta cheng a, nang chu theinghilh a hnekin a hre reng thin che a, i tan tiin kum tin kan nupain madrin khuaah hian kan lo kal a, kan rawn zawng thin che a, i chanchin lah zawh mai tur kan hre thin si lo. Ka nupui ka hmangaih em emin chuti khawpa tlangval pakhat a theinghilh theihloh chu a tir chuan ka haw khawp mai che a, keimaha zawnchhuah che a sawifel pui che ka tum a, mahse ka zawn hmuh mai theihloh che avangin ka rilru pawh chu a dam ta telh telh a, ka nupui jenny pawh chu a beidawng ve ta a nia nge i chanchin reng reng a sawi ta lo. Nikum hmasa mai khan lung thalo avangn na takina  damlo a, hah taka kan inenkawl hnuah Madrin khua ngeia uphum a duh thu min hrilh a, tin a lehkha i ta tura a zah chu nang zawngchhuaka pe tur chein thu min tiam tir ta a nih chu! Ka tan chuan a na asin mahse ka hmangaih berina ti tura min tih tlat avangin a boral hnu chuan ka fanu nen hian kan zawng char char che a, nang i ni tih hi nimin maiah khan ka hrechhuak a, jenny lehkha pawh hi keimah nilon ka fanu-i fanu ngei hian lo pe che se ka duh avangin ka rawn tir ta  a ni” a ti a  asawi zawng chuan a mittui a far zung zung a.

Chu lehkha eng hlui tawh tak mai chu hmeichhe nau-ang leh john-a chuan an pawtpharha a chhunga thu tlemte inziak zingah chuan a hranin a hnuai berah  “ ka sawi duhte hi awlsam taka i hnena ka sawi theih lai khan lo sawi ni ila” tih thu lo inziak chuan john-a chu va’n vel nasa em! Ni e, awlsam taka a sawi theih lai khan a jenny kha’n hrilh kher lo a nih pawhin john-a  tal khan lo hrilh sela chuan an nun zawng zawng a inher danglam vek tur a ni si a. Tunah chuan hunin mihringte a liampui ang bawkin sawi mahsela a sawt tawh si lo. John-a chunga jenny a lawmna aiamahin jenny chunga john-a lawmna kha a nasa a, john-a hmangaih nia a inhriatna ai mahn jenny a hmangaih nia a hriatna kha a nasa zawk bawk si. Jenny avanga hlimna leh chakna a neih ai mahin amaha chakna, hlimn leh beiseina a neihte kha a nasa zawk a, jenny’n johna a ngaihna ai mahinjohna’n jenny a ngaihna a nasa zawk bawk si. Thu tam sawi loin an pathum chuan ngawirengin an inzui chhuak a, jenny thlan bulla thuin chu lehkha chu john-a chuan a vuan a, a kianga ding jenny pasal leh fanu pawh ngaihtuah lo chuan chu thlan enkawlloh tih hriat takah chuan a thingthi hnawk a, maimitchhing chungin “i dam lai khan he thu hi lo hrilh che ila”  tiin khupzawihnawkin mittui a far chung chuan chu thlanah chuan a thingthi ta a