LAM

I

Carina-i chuan hlau chung chungin pindan vawt reih leh mi chiau nuai nuai karah chuan a thisen exam result chu a nghak a, doctorin a thisenah engngemaw diklo a awm a ni tih a hrilh hnu pawh chuan beiseina eng emaw a la nei cheu a, a maimitchhing a-a naupan laia a pa kianga a lam lai kha chiang takin a hmu . Carina-i; naupang sam dum hlep,mitmeng fiah tak khan maimitchhing lo chuan a nun a thlir thei ta lo. Hmanni lawka a nun leh tuna a nun chu vanram leh meidil an sawi fo ang maia inthlau a ni ta.

Doctor chuan engemawni sawi belh tur a nei a ni tih a hriat avangin a pa ban chu a vuan tlat a, hmana hmeichhe naupang fel tak, tap ngai lo kha tih tak meuhin a tap ta. Tuma'n nat an thlang lo ang bawkin Carina-i pawh chuan a thlang bik lo. Mihring nuna pawimawh ber leh duhthlannaa khat mihring nunah hian duhthlan theihloh chin a awm miau avangin harsa ti tak chungin doctor thusawi chu a ngaithla hram hram a. A thusawi ngaihthlak lai mek chu a khum kianga intung uaih-a lehkhabu chhuar zinga mi, a thawnthu bu chhiar lai ni tein a hria. A ban a sik a, a tak a nih zia a chiang si. Ngaihthlak loh duhna leh ngaihthlak duhna chu a thinlungah a insual buaih buaih a, chung zawng zawng chu minute reilote chhunga thil thleng a ni. A duhthlanna ni lovin chutiang tura duan a nih avang chuan!

Tumah rengin tawng zaian rel loh avang chuan a tho lawk a, hlim hmel tak, mahse rilru buai tak siin “Kal ang u” a’n ti chhuak phawng a. A ding a, a hawi kual a, a kianga thu a unaute leh a nu leh pate chuan che chang miah lo leh mit khap miah lovin ngawi rengin amah chu an en thap a. Vawi lehkhatah ring mangkhengin a thinlung ril tak atanga chhuak tih hriat takin a rawn tap chhuak ta hawm hawm a. Chulai pindanah chuan mi chi hrang hrang an awm a, mahse tih tur nei theuh an nih avangin chumite chhungkaw chunga vanduaina lo thleng pawh chu ngaihsak awm hmel reng reng an awm lo. An tan chuan khawvel chu khawvel a ni tawp a, neinung eng ang mah se awmloh hun an la nei ve dawn a ni tih reng an ngaihtuah lo. A chang chuan khawvel chunga thuneitu ber niawm takin midang ngaihsak lek lovin an awm a, a vuakletna a rawn thlen meuh chuan thinlung zawng zawng atanga tah a ngai tawh si.

II

Ngawi rengin inchhungah a lut a, engkim mai hi ho ta riau-a hriatna chuan a rawn bawm tan a, naktuk pawh nghah chhuah man awm ta lo riauin a hre thar a. Hun neitu emaw a intih lai leh naktukte hi a ta ni-a a hriat lai kha chu ni se naktuka thil thleng tur chin hre reng reng lo khan a tuka a awm dan tur a duang leh nghal char char awm si. Muang changin a ke pen rit thar ta riau hmang chuan a pen chhet chhet a, a melh ngai a melh tlawk tlawk a, a kal pawh chu ngaihsak awm pawhin a lang lo. Nidang chu ni se au thawm leh dang mawn lang vek khawpa nui ri hawm hawm thawm chu a inzawm nghal ngei ang. Mahse hlimna leh lungngaihna inzuina khawvelah hian, hlimna a awm chuan lungngaihna a awm a ni tih ti chiang tura duan zinga a tel avangin a duh emaw a duh lo emaw khuanu tan a hna chu thawh a ngai miau si a.

A pindana thawmhnaw awm zawng zawng chu a mal te te-in a khaichhuak a, a dam hun chhung tura an chhut sak zawng zawng belhkhawmin a ni kimin ha dawn se a zavaiin a ha hman dawn em tih hriat nan a chhiar kauh kauh a, thei ta teh reng pawh ni se a peih ang em tih zawhna chuan a zui nghal zat bawk. Mihring dam hun chhung tur tumah insawi sak thei lo mah ila hun tawp a hnaih hun tak takah meuh chuan ngaihruatnaa inchhut sak chang a awm fo a, dik emaw diklo emaw a chhuttu tana chhut hrehawm, mahse tih loh theih loh ni si, a chhutsaka tan lah na ber, hriat hrehawm leh hriat chakawm ber ni thung si ni miau hek. Ngawi rengin a inthlep tha leh mawlh mawlh a, a awm zawna a kut pahnih dahin a maimitchhing a, a thaw hak a, tukverh atanga thli fim lo zam lut delh delh chauh chu a ni chu huna thawm awm hriat theih chhun chu.

III

Kum 15 liamta khan hmeichhe naupang sam dum hlep-a kum aia chum si, duhawm leh harh vang zet, a fin em avanga mi tinin an lawm chuan zan tin a nu leh pa khum a lam hual a, a zuang tauh tauh a, khawvelah hian awh a nei ngai lo. A hun lo la thleng leh tur pawh a ngaihtuah lo a, engtikah nge khawvel a la chhuahsan ang tih te, engvanga lo piang ve nge a nih tih te chuan a rilru an luah lo a. Engtin nge a ke pen dang a chheh ang a, tunge a lam lai en, a lam nalh em? tih thleng chuan engmahin a tibuai lo. A rilru luah tu ber chu a lam a ni. A lam a, a ban a phar a, a dak a, engkim mai hi a mawi em em vek a, a tan chuan lam kha thinlung leh a thlarau damna a nih miau avangin. A naupang thinlung mawina chuan a lam mawina aiin a thinlung damna a hmuhna-a tana lam mawina lam zawk chu a ni a ngaihtuah ni.

Pindan banga hnim hring lem zam chiaite chuan a lam chu an thlir reng a, a mawi leh mawi loh an sawi lohna chuan Carina-i lam chu an ti buai lo. Tukverh lehlam atanga a hlawk thei ang bera penin a kar pawk a, bang va nem pahin a thu hnawk a. A mitmeng uk fiah kaka rawn en chhoh pahin a nui ver ver a, bang a melh a, a nui nawn leh a. A ding a, pindan bang tinte chuan an en vek niin a hria a, zan a rei poh leh a lam tui ting mai thin.

Tunah chuan a pindan bang nghengin a thu ngawih ngawih a, a tukverh panna tur tak ngial pawhin a tha neih zawng zawng sawm khawm a ngai ta!A natna chuan diriam em emin a tham nawk nawk bawk a, a lam hual thin khum chu a mamawh lamtu a nuin a kal hual ve ta thung. Tukverha thli lo lut chuan a mittui rawn hnam sawk sawkte chu a chhem hit er er a, chubak a tan engmah tih theih an neih loh avangin an hlutna hriatsak an ni lo. A kun a, a maimitchhing a, a awm zawnga a kut dahin a thaw hak a, a mithlaah hmana hmeichhe naupang lam derh derh lai chu a hmu a.

IV

Damdawiin khumah chuan a thu vang a, engkim mai chu a lak ata lak bo a phal lo. A kiangah mi tam tak awm mah se mal riau-a inhriatna nei tlat a, chu chuan amah pawh a ti chak lo zual reng bawk a ni. Thihna chu tak riau-a a hriat laiin a chunga thleng tak tak tura a ngaihtuah chuan lem viauin a hre lawi bawk si. A lem a ni, a dam leh mai dawn a ni tiin inhnem ru mawlh mawlh mah se darkar tin deuhthaw chu damdawiin atanga an duhthlan vang ni lova khawvel chhuahsan ta te chu a hmu ve kiau si. A maimitchhing a, a thaw hak a, hmana hmeichhe naupang sam dum hlep, hlim taka an huana lam kual derh derh thin chu a hmu a, a awm ve loh hun tur a ngaihtuah a, a mittui a rawn hnam chhuak tiam tiam a.

Beiseina tlemte pawh a awm dah lo maw tih avang te chauhin a thisen an enna chu a chhiar nawn a, a danglam phah chuang si lo. Eng thil dik lo nge a tih bik? Dam hun chhung kum 30 em pawh hmang lo tura duan a nih bik chhanna lah chu a hmu si lo. Vawi khat a ennah chuan a tak a nih a ring lo a, vawi hnihnaah a ringhlel tan a, vawi thumnaah meuh chuan a ruak ta huai mai. A rilru-a engmah awm mumal lo chung chuan a chhiar tawh chu a chhiar nawn a chhiar nawn leh a, beisei tur a awm lo a ni tih hre reng chungin thil mak leh danglam a thlen mial beiseiin a bul atang bawk chuan a chhiar nawn leh thin.

Tleirawl kum 18 mi lek mah ni se a taksa kal dan leh engkim mai chu awm ve tawp emaw a ti thin a, a chungah thuneitu a awm a ni tih an sawi fo chu hre mah se, a nunna leh a nundan chu a bika thuneihna pek emaw a tih fo avangin a nulat huna a inluah a chei dan tur te, pasal a neih huna a inchei dan tur te, biakin-a a pa ban vuana a luh hun tur te nen lam a rilrua a lo duan lawk vek tawh chu a ngaihtuah a, engmah lo maia chang tur a ni tih a rilruin a nemngheh mekna chuan tih tak meuhin a sawp mek si. Engtik ni-ah emaw chuan khawvel chu a la chhuahsan dawn a ni tih lah chu a hre chiang ropui si a, a awm ve loh hun tur a ngaihtuah a, thiknain a khat a, a ban a vawn lai a pa kut ngei pawh chuan thinrimna a siam tan ta.

Naupang pawisawi lo leh duhawm tak chuan a nu pangpar huan chu tlai tin a tlan hual a, a puitlin huna a awmdan tur te a sawi a, a nu chuan a ngaihthlak leh ngaihthlak loh pawh a ngaihtuah lo. A theihpatawpa kimin a sawi a, a tawng siam siam a, a hlim thin asin. Pitar a nih huna a tiang hawl tur thlengin a duang vek tawh, mahse kum 30 pawh hmang thleng lo tura duan bik a ni si - tleirawl khawngaihthlak Carina duhawmte-i chu.

V

Doctor a rawn luh apiangin beiseina thami nen a lo melh kar a, eng emaw thu tha a sawi a rin tlat avangin a beng a chhi kar bawk. Nitin a thusawi a ngai reng a, mahse dam leh beiseina chhete chu a la nei mawle. Carina-i bawk chuan a sam chu a khawih a, ni reilote hnuah chuan engtinnge a awm ang tih pawh a ngaihtuah thiam lo. A taksa nitina chau tawlh tawlh chu a haider lui a, dam a duh a, a la thlahlel a ni.

Mi tuemawin harsa taka a tawrh tang tang avanga a neih leh a sual luih avanga a neih duhthlanna pawh pek a ni ve lo a, a nun-in ni tura a hril vanduaina leh natna chu duh lo sa teh mah se hmachhawn tura duan a ni. Upat avang leh khawvel a chen rei tawh bik avanga a hmangaih, a chhungte leh a thiante kalsan tura duan bik a ni lo a, mahse nun lo duangtu tuemaw chuan khawvelah hian kum 30 pawh a awm a phal lo. Carina-i tan chuan a na asin. Khawvel a la thlahlel a, khawvel erawhin a thlahlel ve si lo.

Doctor leh nurse te hlim hmel chuan beiseina tlemte a pe a, chupawh chu inchiu tura a ban a dawh chhuah veleh chuan tihbo sakin a awm leh thin. Hmana hmeichhe naupang hlim taka ban phar derh derha lam thin khan loh theih lohna avangin tunah chuan damdawi chi hrang hrang kah luh nan a ban a phar a. A taksaah chuan hrui tin reng a invuah buai nuaih a, hlim taka a nuihna thin a heh sen chek thinte pawh a duk zo ta. A luhna turin nitin vanram kawngkhar chu a inhawn belh zel a, lui tuifawnte lah chuan engtik lai pawhin hun awm tawh lohna hmuna kal turin an kutin an hui reng emaw tih mai tur a ni.

VI

Tleirawl sam dum hlep leh mitmeng fiah kak thin khan a lukhum kar atang chuan a kut zen lutin sam reng reng awm lohna a lu chu a han khawih leh thin. A thlarau chak lo tak leh a taksa zawi tak atang chuan a’n thaw halh a- a awm ve loh hun tur a ngaihtuah a, a tel lova mi zawng zawng hlim dan tur te suangtuahin, a thlan khur thuk tak atanga ama thlarau ngei mitthla chungin khawvela mi zawng zawngte phu luih luih laite chu a ngaihtuah thleng a. A taksaa natna chu haw eng ang mah se a tana duan a ni tih a pawm a ngai tlat si. Pawm lo thei lo, mahse pawm ngam si lova a awm lai taka a nat dan tur chu tunge suangtuah sak thei ang le?

Khawvel a la thlakhlelh em em khan a thlahlel ve lo asin. A pa ban a vuan a, a maimitchhing a, vawikhat chauh dam hun pek a ni a, mahse a pa kum ang zat pawh dam phal sak a la ni lo zui. Ngawi rengin a kut pahniha a awm khawihin a thaw kak kak a, tukverhah a dak a, naupang sam dum hlep, hlim taka lam lai bawk chu a hmu leh thin. Kha naupang khan khawvel hi awm reng tur emaw a ti a, hlim taka a lam lai khan a puitling ve ang tih reng reng a ngaihtuah pha lo. A ngai reng emaw a intih lai khan a danglam a, a danglam chhung zawng chuan a ngai emaw a inti ang lawi si. Mihring dam hun chhunga a tawn tura duan chanve pawh tawng pha lo mah se a tawn chin chuan mi nung a ni tih a tichiang a, mi zawng zawng chunga roreltu chuan hlei bik a nei emaw tih mai turin midang tana a duan hun zat chanve pawh duan sak a ni ve si lo.


A damdawi avanga a lu thak avang chuan a lukhum karah a kutzungtang a han rawlh lut a, a hma aia nasaa a thin phu dup dup ri pawh chu a hre reng a, tih theih dang a nei si lo. A lukhum kar atang chuan a kut dang lep chuan a luvun chu a han khawih fuh thin. A tum reng vang leh a duh bik vang pawh a ni lo asin.

A khum tlang sira a bakilh chu a la a, kilh tumin a ban zuai a, kilhna tur sam a nei lo tih a hrechhuak leh hnuhnawh a, tih theih a nei si lo. A damdawi chauh lo chu mawhchhiat tur a hre lo.

Ngawi rengin a pindan lehlama naupang, a natna ang chiaha na ve, mahse engtik lai pawha hlim reng thin chu a va melh a. Huai ta riau-a inhria-in a hmachhawn tur ang ang hmachhawn chak riauna chuan a rawn luah khat a. A thaw hak a, a awm zawna a kut dah pah chuan a maimitchhing a, hmana Carina-i, naupang duhawm lam tarh tarh lai chu a mithlaah a lo lang leh a.

VII

A kawrfual var hnung suihna phelh tura tan lak fe a ngaih tawh hnu pawh chuan beiseina tlem chu a la nei mawle. Doctor hlim hmel chuan beiseina chhete a la pek avangin a thisen enna thar ber chu a chhiar nawn leh hram a, a hma aiin engkim a chhe zawk a ni tih a hria, mak pawh a ti hran lo. Hnial a duh a, pawm lo thei a ni lo tih a inhre bawk si. Ngawi rengin a pa ban a vuan a, a thaw leh kak a, hmana hmeichhe naupang sam dum hlep kawrfual var haa phengphe hlep uma hlim taka tlan kual a, te teng tung thin kha a mithlaah a lo lang a, Carina duhawmtei ngei mai kha. A kawrfual vara a mittui tlemte far fep fep chuan nun a pek belh chuang si lo. A hawi chhuak a, a kianga mipa naupang lukawlh vek, dang bei mai, nui sen sen chunga amah lo en rengtu chuan a ban a lo kai a. Chu ban chak lo tak pahnih inbelhbawm chuan chulaia awm te mittui a va’n titla nasa em! Chu ban te reuhte, dang bei mai chuan Carina-i, vanduai bik ngawih ngawih leh thih hreh em em mai hnenah chuan huaisenna eng emaw tak a pe a ni tih chu en mai pawh chuan hai theih a ni lo.

Ni tam a dam tawh dawn lo tih a inhriat avang chuan peih leh peih lovin a pindan leh lama mipa naupang dang bei mai kawm tur chuan a tho chhuak hram hram thin. A taksa hmun hrang hranga hrui chi tin reng inzam nuai te chuan beiseina tlem te pe mah se chu aia nasa zawk beiseina petu chu, mipa naupang lukawlh tak, mitmeng thuk em em, a taksa hmun hrang hranga duk thliah thluah nui hmel chu a ni. A huaisenna nuimawi chu!

Zantin mai chuan a tuk ni a hmu leh ang em tih chuan a rilru a luah ber thin. A pindan lehlama mipa naupang nui hmel hmuh leh a nghahhlelh avang ringawt chuan a tuk nichhuak chu a nghakhlel a, dam leh a duh a ni. Damna hi suma lei theih chu ni se khawvela sum awm zawng zawng piah lama neih belh dan zawngin, a hmuh zawng zawng pawh chuan a lei duh ang tih theih khawpin dam leh chu a chak a ni. A natna leh a dam leh thihah duhthlanna pek a ni lo ta rau rau bawk a, hun a la neihchhun tlemte chu a pindan lehlama a natna ang vei, mipa naupang hlim hmel hmuh nana hman a duh a ni. Chu hlim hmel chuan amahah chakna mak tak a pe si a.

A ni telin a chau telh telh a, mipa naupang pawh chuan a rawn kan khat telh telh bawk. A nihna takah chuan natna inang, thla thum pawh dam tawh lo tura doctor te’n an lo rin lawk ve ve si thla ruk chuang an la dam ve ve tih hria apiang chuan mak an ti a, tumah rengin an thuruk an hre si lo. An pahnih chuan chau tak leh men tak ngial pawh a harsat hnu thleng chuan an pindan kawngkhar hawngin an innuih sen sen a, an nun tawi te chu, vanduaina aiin hlimnain hun reilo te chu a luah khat thin.

VIII

Carina-i damdawiin luh atanga thla ruk leh ninga ni-ah chiah chuan ruah nasa taka sur hnuaiah an duh vang ni hauh loin thlanmual lam pan chuan lirthei tam tak chu an insul pel nguah nguah a, tumah reng hlim hmel pu an awm lo. Chu hmunah chuan chan a la nei ve ngei dawn a ni tih pawh ngaihtuah pha ngai lotu tan chuan hun bik hman sakin, amah thlahlel ve lotu a khawvel atang chuan kal liam tir a ni ta-Carina duhawmte-i chu! Mi tinreng mai chu an tap emaw tih tur a ni.

Chu hmunah chuam mitinin chanvo an la nei dawn a ni tih reng an ngaihtuah lo a. Tawp thei lo ang maia an nun lai chuan, an khaw tleirawl hmeltha leh duhawm, sum hi khawvela thil hlu ber ni ta se a sum ngah avanga tal buai ngai lo tur Carina duhawmte-i tak ngial chungah pawh nun chu la tawp ngei ngei tur a ni tih a rawn lang chiang si. Mi rethei ber leh hausa ber ber thlengin, a then kein an lo kal a, a then lah lirthei changkang tawpkhawkin-anmahni hrut rualtu thihna ngei thihtir thei lah tumah an awm si lo.

Mi zawng zawng an kal darh zo tawh a, ruah paw’n ban lam a pan ta. Vante chu an inhawng ta emaw tih tur khawpin a eng uau a, phaitual hnimte chuan thla an timuang hliah hliah emaw tih mai turin boruak a dam dap a, thli a lo thaw her her bawk. Chu thlan bula mipa naupang ding reng chuan eng thu nge a sawi lah tuma’n an hre lo. A phun sep sep a, a nui ver ver a, ralkhat atanga lo thlirtu a nu pawh chuan tihbuai chi a ni lo tih a hriat avangin ngawi rengin a thlir reng a. A nui sen sen a, a lukhum kar atanga a lukawlh tak, a natna avanga sam reng reng to lohna luvun nem tak chu a han khawih a, a dak a, a maimitching a, a thaw hak a, a nu lam pan chuan chauh hmel tak, mahse hlim hmel takin a rawn pen phei chhet chhet a. Chu hun chu van te pawhin mawi tiin an thlir ve ngei ang le!

IX

Park kil daihlima thlanlung sawi bi bei, ro deuh riap leh uk deuh kheih khuih chu mi tam zawk chuan an en liam mai mai thin. Chu thlanlung chu hmana a khawvelin a thlakhlelh ve loh avang leh Siamtuin cham rei tura a duan ve loh avanga an phal lo chung; a nawrtuin a nawrna a nat em avanga an thlahliam tak Carina-i’n khawvela a chanvo la neih chhun a ni. Chuta thu inziak chuan chhiar chian a hlawh ngai loh avangin patek pawh pan te-in a rawn inzam ngiai bawk. Chu phaitual hnim hmunah chuan mi chi tinreng an awm a, a then a malin, a then chhungkua-in. A then an nui a, a then muk takin an lo titi mawlh mawlh a, an sira thlanlung bula ding reng nu lian lam pang, sam buang kir viu veu chu ngaihsak awm hmel pu pawh an awm lo. A ngaihsak hmel ber te lah chuan an kal pahin an va melh zawk chauh si. A dinna kianga thlanlung chu nakina mi zawng zawngin an chanvo-khawvela an la neihchhun tur a ni tih lah chu tumah rengin an ngaihsak lo.

Chu nu chu tunge a nih tih tumahin an hre lo a, khualzin a ni tih erawh a incheina leh a sam thur deuh bem chuan a ti lang a ni. Enchiang ngat se zawng amaha lunglenna nasa tak chu an hmu ngei ang le. Thlanlung kianga ding reng chung chuan a awm zawnah a kut vuai siai tawh chu a dah a, a thaw hak a. Vawilehkhatah khua a rawn dur khuih a, ruah mal lian pui pui rawn tla phuar phuar kara thli thaw heuh heuh dawn tum niawm takin a ka a ang a. A maimitchhing a - kum tam tak liam taa a fapa neihchhun thisen cancer avanga boral ta leh nula pakhat-a fapa ang bawk, ban inkaia kawngkhara chhuah paha an nui sen sen lai chu a mitthla-ah a lo lang a.

Mihring hnena pek duhthlanna tak ngial pawh hmang fum fe hman lo khawpa nun tawi, mahse nun mawi si pahnihte kha an inhriat chhung a rei lo. An inhriat tan dan pawh thil duhawm a ni hran lo a, an vui chuang hek lo. Lukawlh tula awmin hmel dang lep leh ban cher tak si khan an inkai a, van an thlir a, an duh tinreng an sawi dun thin a nih kha. An natna chuan tunge an nih tih a hriat tir a, la dam midangte aia vanduai bika an inhriatna pawh chu an nun tihausatu atan tlaikhawhnuah an hmang leh si a nih kha. Hmana mipa naupang - a hmel en mai pawha a chaklo a ni tih hriat ngawih ngawih leh tleirawl hmeltha leh duhawmte lo nun tawhna khawvel chu an tel lovin a her mup mup tawh a, tumah rengin chu chu an ngaihtuah chhuak tawh hek lo.

Khawpui a rawn ri dur dur a, a maimitchhing a, a phun sep a, a zawi hnak bawk. Chu park-a mi tam tak chu an rawn tlan khawm a, siren a rawn ri nghal ruai ruai bawk a. Khawpui leh ruah chuan an chet a tikhailak zo ta lo - a tul miau avangin. Tawmhulna tur pana chak mangkhenga tlan mekte pawh chuan eng khaw sawi set set lovin an panna lam an sawn a, tawmhul aiin chu hmuna mi tu tih hriat loh tlu zal reng lam pan chuan an tlan hlawk hlawk a, thihnain an chunga thla a zar hun erawh tuma’n an ngaihtuah lo. Midang chung chauha thleng tur emaw an tih avangin. Thuneitu te leh mi tam zawkin an hriat loh avanga an phun sup sup lai chuan ama chenna leh amah enkawltu khawvel ngei pawh hmu leh ngai tawh lo turin chu thihna chuan a kai a, hmana a fapa kianga hlim thin bawk khan a fapa kalna lam chu a pan ve ta. Carina-i leh a fapa thlahlel lo tu - Ani tak ngial pawh thlahlel lo tu a khawvel chuan chu nu pawh chu a thlahlel bik ta lo.

msi@rose