PINDAN

Chu pindan reh tlawk tlawk banga sana chu a chek chak chak a, a oxygen bur intham ribak chu engmah hriat tur a awm lo. A nu rei tak nikhaw hreloa awm tawh kut chu a vuan a, a chul a, en ngawih ngawih bak chu tih theih dang nei hek lo; zantin chu hna ngai chu a thawk mawlh malwh a, tumahin a hna pawimawh zia hriatpui lo mahse phur taka thawk lo thei ni hek lo, chu pindan chhung vawt ruih chu a thla tam chuang zan hun hmanna ber a ni ta.

Tluanga chu tlangval fel pangngai tak, lehkha pawh thiam pangngai tak a ni a, a hmalam hun ngaihtuah ran chunga thil ti a nih avangin a fin pawh a fingin a chhungte leh thiante paw’n beisena an dah sang hle a,pa hlawhtling pangngai takah a chhuak ta reng bawk a ni.  A hun zawng zawng zawng deuhthaw chu a ma hna pawimawhah a hmang a, a chhungte leh ama tan bik ngei pawh chuan hun a nei mang lo tih theih deuhthaw a ni a, a thluakin a tlin bawk a, sumdawnna hlawhtling tak a din a, reiloteah sumdawnna kawnga mite entawn ber a ni ta reng bawk a ni. Chu a sumdawnna hlawhtling tak enkawl reng reng chuan a hmanhlel a, chhun leh zan pawh awmze nei taka hman mumal loh chang a ngah ta hle thin.

Chhun ni a her liam fe tawh tihah chuan a awmpui chu hmanhmawh takin a awfis ah chuan a rawn tlan lut hlawk hlawk a, hlauthawng tih hriat fahran leh mitmeng ruak tak chuan a nu nikhaw hrelova a tluk thu a sawi a, hmanhmawh phelengin inlam panin an inzui haw ta nghal a, damdawiina reife an inbuaipui hnu chuan natna tihdam theihloh thluka thisem zam chat a ni tih an hre chhuak ta a ni. Pi kimi: nu hrisel pangngai tak, an inchhung uap lumtuber, engmah insawiselna leh damlohna nei ngai bawk si lo chuti teh thuta a awm avang chuan an hrilh a haiin an buai hle mai. A nu a mamawh petu nia a hriat chutia a’n damloh tak thut takah chuan a tir ah chuan a sumdawnna leh amah chuan tuar vak pawha a inrin loh laiin an tuar ta hle a. Chhun lamah pi kimi chu an awmpuinuin a thut chilh deuh chawt a, ani’n a hna a buaipui thung thin. Chutianga kimlo ru taka reife hun an hman hnu chuan nikhat chu nidang aia hmaah tluanga chu a hawng a, an in leh a vel fangin an thil hluite a hai thar leh vel mai mai a, chuta a thil hmuh hrang hrangte chuan a barakhaih kher mai. A naupan laia a pa’n a boralsan hmaaa chhuahsan nia a nu lehkha ziahte,tin an naupan laia an chhungkaw sum kalkual vel dan leh an chhungkaw chanchin hrang hrang a la hriat ngailoh tam tak nen lam a hriat belh ta teuh a, chu mai piah lamah a nu chanchin a hriatloh tam tak te pawh a hriat belh phah ta hlauh zawk a.

Tluanga pa chu naupangte an nih laiin a boral a, a fate an la nawi em avangin pi Kimi chuan pasal dang neiloin hah takin a fate a enkawl a.  A pasalin boralsan hma lose chuan chhungkaw zahawm tak ni pha tur si kha a fate hma ngaih luat vangin a duh ang pawh a nei thei lo. Nu la valai leh hmeltha pangngai ve tak a nih avangin nupui atana han betu leh han chhaihkawitu pawh a nei ve nual niawm tak a ni mahse khawdang reng reng a hawi ngai lo.

Zan rei tawh taka tukverha thli lo thaw heuh heuh lam chu a hawi a, pawnlam thim tak leh thing ding tlar pat hlimthla mai lo chu hmuhtheih a neilo. Tukverh phen nana parda inzar a chhawk zata in phet chhawk hleuh hleuhte lah chuan muang changa hun liam zel zia a ti lang chiang hle si. A rilruah thil tam tak a lo lang a, puitling taka ngaihtuah zawh fumfe leh hmachhawn dan ngahtuah lah a nei thei hek lo, eng fakauin nge a rilru luah a, engtia bawhzui zel tur nge a nih tih lah chu a hre thei der si lo a. Zan a rei telh telh a, boruak lah chu a hitin a rit telh telh emaw tih mai tur a ni a, a rilru a ruak telh telh a, thlansa phung leh a taksa chau hnawk khawpin a ngahtuahna lah a buai telh telh si. Midang zanwg zawng an mut tawh hnu pawh chuan a nun kalta te a ngaihtuah a, a maimitchhin apiangin a nun hlimthla chu a langchiang emaw tih mai tur a ni si. Thlan sa bap bap khawpin a kumah chuan a tal a tal a.

A nu, nu fel tak nia a hriat hnenah khan a fel a ni tih a la hrilh lova, nu zaidam leh taima nia a hriatnaaah khan a lo la fak ngai hek lo. Chu’ng zawng zawng zawng ai pawha pawimawh zawk chu amah hmangaiha enkawla duat tu a nu hnenah chuan a hmangaih a ni tih a lo la hrilh lo chu!

Tuiril a nih hma hauh atanga ngaihsaka duattu, khawvelah a awm ve a ni tih a hriat avanga lawm em em tu leh a damchhung zawnga a nun tikimtu a nu leh a pa hnenah vawkhatmah thinlung takin lawmthu a la sawi lo a ni tih a inhrechhuak ta! A ni reng a, kum tam tak liamta khan khaw te tak tea damdawiin reh leh boruak vawt tak hnuaiah chu nausen tap thawm chuan mi tam tam thinlung a lo tilawm tawh a nih kha. Khatih hunlai khan naute nu leh pa lawm avangin van angelte pawhin kut an beng hialin an lo ring asin. A pianna chhungkua leh khawvel chu chu naute chuan a thlang ngai reng reng lo a, tudang mah paw’n an thlang hek lo, chuti chunga lawmna nena lawmluh a nih avanga lawmthu la sawilo mihring a ni tih a inhriatchhuah avangin a na ta hle a. Khawi lai emaw ram rethei taka tu chhung emaw tana ni khat ei thar pawh a har teh reng nen hmangaihna leh khawngaihna, duhna leh duatnaa nena kum sawmthum chuang an fapa hnenah eitur pei, a taksa mamawh chauh nilo rilru leh thlarauvina a mamawh thleng an pe kha a ni si a

Chutia thil tam tak ngaihtuah chunga a tal vel lai mek chuan pindan kalpawhna dung tawpa pindan eng fiahlo riau chuan a mit a lak tlat avangin chu lam pan chuan a kal a, a ke pen ri leh a thaw ri chauh lo chu thil dang reng reng hriattur a awm lo. Chu lai hmunah chuan hmanah naupang chaklo leh dawrawm tak, amaha neih nei reng reng lo kha a nu leh pa te’n kal an lo ziritr tawh thin a nih kha. Chu naupang chuan a nu leh pa chu a kai ngai lova, anni erawh chuan chu naupang kuta chelh chuan an dawm thin a ni si. A thinlung tawt tak atanga lo chhuak a thawri ngaithla chung chuan chu pindam lam chu ngawi rengin a pan a, a ke pen tin mai chuan danglamna engngemaw tak a nei tih lah a hrechiang si. Chu eng awmna pindanah chuan vawi tam tak  tapin a tlan lut tawh a, chu pindan atang vek chuan vawi tam tak a tap thlema hmangaiha kuah turin tuemawa lo chhuak thin tih lah a hai der si lo

Khang hmangaihna zozai- a nei a ni tih pawh a inhriat ngailoh, alo ngai neih titih leh thil ni  ve reng tura a lo ngaih thin kha a tellova awm tura a han inngaihtuah chuan a thinlung tih tawtin a awm a, a hun lo la kal leh zel tur ngaihtuah zawm dan pawh a hre ta lo. Chu hmangaihna a chunga an lantirna zawng zawngah chuan lawmthu sawi ahnekin a lo vui titih zawk thin a nih kha!

Chu pindan a pan lai chuan a inngaihtuah harh thut a “ka hrilh ang” tia phun sepin damdawiin lam pan chuan baklengin a tlan ta a

Hmanhmawh takin kailawn tawpa pindan pan chuan  a tlan chho hlawk hlawk a, a tlan thawmlo chu ri dang engmah hriat tur a awm lo. Chu hunah chuan khawvel hi a ding ta thup emaw tih tur khawpin zan boruak chu a rit a, dim thei ang bera kawngkhar hawngin damlo mutnaa mu chu a va pan a-a kut a chelh a, engmah a hre si lo, a sam a chul a, ran thi tawh sawngbawl ang maiin chetzia engmah a awm hek lo. Chu taksa chu a thlir a, en mai pawhin tih theih a nei lo a ni tih a hriat hle. Khawl hrui inzam hnawk nuai leh oxygen pekna kar atangin a vun dang lep chu a lo lang a, a sam rorep inzam buai niaih ah chuan mawina reng reng hmuh tur a awm lo. Chu taksa dai dap leh chakna neilo tih hriat tak chu a kuah vawng vawng a, intih pachan tum eng ang mahse a hmangaihna kum tak a lo hriatloh der thin chuan a mittui dan ahnekin a ti tla nasa zual sauh emaw tih mai tur a ni si. Chu thu sawi tur chuan a han ang a, vawi sang chuang pawh sawi mahse a hriat avanga alawm hmel hmuh tur a awm tawh dawn chuang lo a ni tih a hria a, chu thu- a sawi duh leh a rilrua riak reng hre ran chung chuan zawhna tam tak a inzawt ta mawlh mawlh a. Eng vangin nge hmanah khan a lo sawi loh?. A nu damlai khan he thu hi lo sawi se chuan amah mai niloin a nu, a hmangaih em em nun kha kawng tam takin sawi danglam a ni dawn si a. A hun kaltaa a manganna zawng zawng kara hmangaihna leh duhsakna te, amah maia awm emaw a intih laia awmpui rengtu te, harsatna amaha a sukiang emaw a intih fo phena hlawhtlinna thlentu te, a lungngaih chang apianga tahpui a, a lawmna lawmpui theihna thinlung atanga hmangaihna chhuak chu hre rengin a nu kut dai riai leh chakna reng reng nei lo chu a hmer vawng vawng a, dan ruallohin a mittui kar atang chuan a nu chu a thlir reng a. Chu hunah chuan chu thu chu sawi mahse a hre dawnlo a ni tih hre reng chungin sawi tam luat a awmlo a ni tih a hre reng si.

Chu hun hrehawm leh tawt takah chuan a ngaihtuahna a buai a, mang ang takin a phun mawlh mawlh reng a, a han maimitchhng hlek a, a hun kaltawh tam tak chu a mithlaah a lo lang zawt zawt si. Naktuk a lo thleng anga, a kianga taksa a nunna chu a awm tawh lo mai thei a ni tih a hria, chu erawh chu thleng turin a phal si lo. Kawng hrang hrang a lo zawh tawhna khan a nun her danglam hle mahse a nu a hmangaih em em hnenah khan vawkhatmah a hmangaihthu a lo la hrilh ngai si lo. Vawi khat chiah chu thu ngaithla tur ringawt pawh chuan a nu chu lo harh leh hram se a duh hle a, a thinlung zawng zawnga a duh a nih avangin a rilruin a tawngtai mawlh mawlh a, mahse a tawngtaina chu a duh dana chhanin a awm thei si lo. Chu hun chu ding reng mai se a duh amahse khua lah chuan en lam a pan telh telh tih a hmuh avangin hun chu a ding teuhlo tih a hrechiang ropui si. Khawvel eng hmu leh a, a fapa thusawi ngaithla thei tur khawpa chakna nei leh tur chuan thilmak danglam tak a thlen a ngai a ni tih lah a hrehchiang si. Nakinah thihhnu lamah a nu hmu lehin chu thu chu sawina hun a la nei ngei dawnin a ring a mahse amaha turtu chuan chu hun nghakthleng tur khawpa dawhtheihna a pe si lo.

 A kianga thutnaah chuan a thu hnawk a, a nu kut chaklo tak chu a kut pahniha vuan reng chung chuan ‘ka nu ka hmangaih che, hmanah khan he thu hi lo hrilh che ila a chhanna min pein i nun kha a inher danglam dawrh awm si a” tiin ngaihdam dilin chu zan reh takah chuan amah chauhin a tap ta zawih zawih a