LITTLE ROCK MALSAWMNA

Little Rock khaw daifema nupa tuak thar jack-a te nupa chuan an ram tur en thlithlaiin hlim takin an au teng tung a, a nupui cathy nen chuan an duhthu chi hrang hrang samin an fa neih hun tur te, an huan awmdan tur te sawiin an te nasa mai a,  nupa tuak thar an ni bawk a engkim hi a mawiin a thar surh vek emaw tih hial tur a ni. Chutia hlim taka an ram bung thara in rel paha puanina an chen naw naw lai chuan james-a chu nat lawk pawh awm hauh loin cathy chu a kalsan ta mai a, kat-i lah chuan a hrethiam lo hle mai. A rilru na leh lungleng awmngaihna hre lo chu amahin a tal a tal a, ei leh mut pawh ngaihsak loin ram palailengah te chuan a tei zankhua thak thak a, a chang leh a tap nileng thak thin.

Little Rock ram bung danga a cheng ve tho Pu Brownlo-a chu a nupuiin kum tam tak liamta a a boral san avangin  a fapa nen chauhin an cheng a, pa tawngtamlo tak leh lusun a nih avangin an thenawm te pawh a kawm tam em em lo. Chuti chung chuan an pafa chuan an hlimin an thawk hah kumtluan hle. Chulai ram vela chengve midang anglo takin Pu brownlo chu Pathian tih tak mai a nih bakah a bible kawm uk tereuhte kutphahtiat lek chu a khawilo kalnaah chuan keng reng thin.  A bible te chu bawnghnute sawr tura a kalin a kawrchung ukah chuan a ak tha a, rama a kalin a ipte ah; then theih an nilo hial emaw ni chu aw tih tur an nih vangin Pu Brown bible-a tiin a lar phah viau bawk. Pa taima tak, tawngtai peih tak leh fianriala pathian biak tum tlat reng thin a nih avangin a vanduaina pawh chu a mizia phulohin a tuar thiam reng a ni.

Kum engngemawzat harsa taka an khawsak naw naw hnu chuan a nupuiin a kalsan tak an in leh lo pawh a ngai ang deuhthaw in an dinleh tawh a, an ranin te, an leipui te leh an chenna in ngei pawh midang hmuh tlaka chhuanawm a ni ve tan tawh tihah chuan cathy-amah maia awmze neiloa tal mai mai chu a la lut a, an ina cheng ve turin a hruai a ni. Kar hnih dawn lai chaw ei mumal lo leh mu mang lo a hun a hman hnu chuan a taksa pawh a chau tawh hle a, a pasal boral ta nena an ram bung kianga lui sira thichhawnga let reng chu Pu brownlo-a chuan hawnin a enkawl ta a nih kha. A duh emaw duhlo emaw cathy tan chuan tih ngaihna dang vak a awm chuang loh avangin a chhungte ang maiin a en a, anni lahin chuti bawk. Darkar sawmhnih pali inawmchilh an ni bawk a, a tua te pawh chu an inhre hneh hle a ni.

Cathy chu hmeichhe hmeltha leh duhawm tak, nun tlang tak leh lu zo tak mahse sakhuana ngaihsak ngai lemlo a nih avangin pu brownlo-a tawngtai te chu a thlir liam mai mai a,  a bible chhiar pawh chu engah vak a ngaihsak hek lo. Tlai daia amah chauh a thingbuk hnuaia a thut a “khawngaihna mak mawi leh duhawm” tih hla pu brown-a’n a sak pawh chu a rukin a ngaithla fo a, ngaihthlak liam tum mai mai mahse a rilruah chuan engngemaw tak hian a kap ru reng thin. mihlim thei ngang a ni bawk a, harsatna leh han inbah buai deuh niah te chuan a hlim sang reng a, zawl a dawh em em a, a zaidam poh leh cathy thin chu a sa emaw tih mai tur te a ni zawk thin.

Lui kianga hahdam taka thua an pahniha an titi melh melh lai chuan hla taka meikhu luah luah chu cathy chuan a hmu a, engmah sawiloin an pahnih chuan an tlan haw nghal hlawk hlawk a, eng thil nge thleng tih zawh an ngai chuang lo; chulai rambunga pine kung lian tak pahnih karchehah chuan an ni lo chu cheng an awm ve loh avangin. An mit an len a engkim deuhthaw chu meivap ah a lo chang hman tawh a, tihngaihna dang chuang awm hek lo, meivap leng velte chu an thlir tlawk tlawk mai a ni. Chutia an pahniha ngawirenga an din laia pu brownlo-a’n van lam ena a maimit chhin vang vang lai chuan cathy chuan a en reng a,engngemaw thil sawifiah theih siloh a awm a ni tih lah chu a hrechiang ropui si.

Zing dar kua a ni a, ni pawh a sang tawh viau nain ni hmasa lama a chauh deuh avangin  an  puanin kaihchhawp atang chuan pu brownlo-a hnathawk chu phak chep chawpin a va pan a, ani chuan a beiseiloh takin nuisanga lo chhawn chuan thingpui a duh leh duh loh a lo zawt var a; ani lah chuan engdanga chhang lo chuan;

“I tawngtai fo a, hei hi mi a chhanna chu”

“thingpui in la, va in ti fai la I hman chuan min lo pui ta che”. 

Thingpui in pawh ngaihsak lo chuan pu brown-a hna thawk chu a pui mawp mawp a, a thlan hruk hul pah chuan “nitin malsawmna I dawng a, hei hi mi malsawmna chu. Nupui I dil a, a pe che a mahse a laksak leh tho che a, chu chu in dilchhuah a nih pawh ka hre lo e. A diktak chuan kan nung naw naw a, nun chu a nih tur leh a tih tur angin a ni in a ti vek a, kan dil chawp leh chuan pawh a ngai tawh hlei nem” tiin inti hnehsawh tak leh chak zawk hmel pu takin a ri deuh hluai a, pu Brown-a chuan engtin mah a chhang lo.

Tlai lama an chhekin kang bang an tihfai lai chuan a zawhna ngai bawk chu cathy chuan a rawn phawrh leh a “malsawmna I dil a, a peksa che a halralsak leh vek che a nia; chuti chung chuan nangchu I ngawi reng a I mak ngawt mai” tiin a hma taka ding chuan thingkangbang a thenfai lai a ken chu a en vang vang a. Han en mai chuan a ni bawk tak reng a. Stella-i a boral atanga an tlakchhiatzia leh intungding tura hma a laknasat zia te, a dingchhuak dawn chiah a vanduainain a tlakbuak naah te chuan phunloin Pu brown-a chu a tawngtai a, a hmaa a hlim hmel ang reng chu englaipawhin a pu a. Tun hun bak ngawihtuah ngaihna hre vaklo mihring tan chuan a mak ve em bawk a ni.

Chutia a ngaihtuahna a kawm lai chuan ngawirengin Pu brownlo-a chuan cathy ban chu a vuan a, a kai ta hlawk hlawk a. Han tal nachang pawh a hriatloh avangin inchhuih chho nawk nawk chuan hmana an ina a awm tirah a thutna thin tlangpawnga lung thutna inremah chuan a thut tir a, reife chu engmah an sawi lo. Thli a thaw heuh heuh a, van thiang kakah chuan chhum a in tel tep a, a thlanga kawr luang chu a ri her her a, eng eng emaw hram ri neuh neuh nen-rilru a thiang duh kher mai. Muangchangin Cathy lam hawi chuan a ka a ang a, engngemaw sawi duh a nei a ni tih a hriat avangin cathy pawh chuan inpeih atin a en a, muangchanga a mita en kalh chung chuan

“kat, Little rock-ah hian engtia rei nge ka awm tawh i hria em?”

“hre lo”

“heta ka awm hnua vanduaina ka tawh zawng zawng i hre vek em?”

“hre vek lo i sawi ngai si lova”

“a nih leh little rock leh a ram chheh velah hian mi engzat nge ka hriat i hria em?”

“nangte chu tupaw’n an hria ang che chu; Pu Brown bible-a kha i ni miau a”

A beisei ang zela a chhan avangin mak pawh a ti hran lo. kat-i hmanhmawh leh ning hmel a hmuh avangin a insiam rem sawt a, a tho hluai a,

“ka din theih avang ringawt pawh hian ka va’n lawm em” tih leh thut a rual a hmuh chuan cathy chu mak tiin a phu deuh zawk a, mahse a insum leh hman tho.

“a nih leh kat zawhna dang ka zawt leh ang che engatinge..” a sawi zawh hma chuan cathy chu a tho vut a, ram fahran hian “zawhna ho deuh deuh inzawh nan hun ka nei hlei nem. Rony pawh a rawn haw tep ang, in lamah tih tur a la tam ropui si” tiin a tho vut a mahse a inrin hmain pu Brownlo chuan a bana chelhin thu leh tura a mitmei a hmuh avang chuan cathy chu a’n thu leh hram a

“en teh kat, kan hmaa tlang sang tak ding luah hi i hmu em?” tih pah chuan an hmaa tlang ding lurh chu a kawk a. “A chhunga cheng ramsa leh thing ngaw khup vanga Little Rock khaw sik leh sa nawm zia hi i hria em? mi tam takin engvanga Little rock-ah kher nipui chawlh rawn hmang nge an nih i hria em?” Chung zawhna chu a ngaihtuah a ni tih hriat takin cathy chu a meng buai vei tap tap a, a ka a ang lo. A ze ngaitea muang dam diai chuan

“kat, ka lo lahrilh ngailo che a nih chuan min ngaidam la, malsawmna tam tak dilin ka tawngtai thin tih i hriat kha. Malsawmna chu malsawmna petu chuan min pe teh meuh mai, ka dil avang pawh a ni ta ve ang. Mahse maw kat, heng tlangsang tak ding luahte hi ka dil avanga helaia rawn dah a ni reng reng lo. Little Rock khua hi khaw nuam tak a nih nan hhe tlang hi ka dillohin a lo dah a, chuta karah a dahtu chu anchhia ka la hlawh ang maw? Kan thutna kham hnuai kawra lui luang her her khu i hmu em?” tih pah chuan an hnuaia dam diai lui te luang chu a kawk a. “khu luitui avanga kan leipui thlai thatzia te hi i lo theihnghilh palh hlauh ang e. Khu lui awm nan khuan vawikhatmah ka la dillo asin mahse khu lui khu min pe a, leipui tha tak min pe a, lawm tur chu ka ni chiang alawm” tiin a va hawi phei a.

Tawng tura Cathy ang chiah chu lo khalin “en teh Kat ka nupui Stelaa kha a dila ka dilchhuah a ni a chutiangin Rony pawh. Kan duhdan niloin kan nun chu sawi danglam a ni a mahse nang hi ka dillohin pek ka ni. Nangmah avanga kan in leh loin hma a sawi zia leh Rony ngei pawhin hma a sawi zia hi i hmu em? Kan engkim tih theih deuhthaw i ni a, mahse nangmah min pe tur hian ka dil hauh lo. Ka mamawh a ni tih pawh ka hriatloh lai khan i vanduaina leh ka vanduaina chu rem taka remkhawm a ni a tunah chuan en teh Kat, kan nun inher danglam nasat zia leh a mawi si zia hi”

Ngaihtuah zawm lem lo chuan Cathy chuan “a nih leh engvangin nge Jack kha’n min boralsan si? Kan innei hlim chauh a ni a, a ni pawh khan tih tur a la ngah asin” Chu zawhna chu vawi tam tak a zawhna dawn tawh  anih avangin a chhanna turah a buai lo “duhtak Kat, a bika duan mihringte hi dam reng tur chu ni ila thlarau pek kan ni tawp nang. Kat, kan duhte niloin kan mamawh asin min pek thin ni” a ti damdiai a.

“Thu dang daih, nizana pi Sutter-i lungphu chawla a thih kha i hria em? Pi sutter-i kha mi fel ta ngang a ni bawk a, tukin chu kan khua pawh a reh huaiin ka hria asin. Ani chuan tunkum krismasah ruai siama lawmna buatsaih a tum a chu a thil tum chu tih phal sak a ni ngai dawn ta lo a ni. En teh kat, ni chhuak mawi takte hi ngaia nei mi tam zawk kan ni a, lawm nachang hrelo pawh chummi zat tho. I awmna atang khan pen khat lek pen sawnin han hawi kual hret mah teh, nithar kan dil vang nilova min pek mawi na hi i hmu ang.”

Cathy biang no taka mittui rawn luang riai chu pu Brown-a chuan a hmuh hmaih reng reng lo. Chu mittui chu vawi tam tak a hmuh tawh a nih avangin a thinlung nat dan tur pawh a hre riai ruai a. “En teh Kat, tawngtai hi engngatan nge tih min zawt fo tiraw? Tunah hian ka hrilh ang che. Mihring chungah hian engngemaw thuneitu a awm a ni tih chu kei aiin i chian kha. Malsawmna ka dil a, remna ka dil a, damna te , venna te leh thil dang tam tak ka dil thin. chung zawng zawng chu khawvel mihring heti zat zingah hian keimah chiahin ka dillo asin. Tawngtai hi kan nitin nuna bet tur a ni ith hria mihring tlemte bakah a tul a ni tih hre hnuhnawh te nen kan dil luai luai a, chuti khawpa tam si pakhat te te in kan tawngtaina te hi min ngaihthlak sak chu a ni si a. Vawi leh khatah kan natna te hi min tihdam sak vek lo mah se engtik emawah chuan engtikemawkan tih fo hi a lo la thleng dawn a ni tih kan chian kha. Kat, ka fanu, finna kan dil fo a, chu pawh chu mihring duham vang a ni tih i hria em? A bika ropui taka din mihring dintu Pathian chuan engah nge finna te chu min pek loh teh lul ang?”

“kat, ruah a sur chang apianga anchhia kan hlawh te hi thil pangngai emaw i ti tiraw? Ruah mal far te te avanga kan leipui bula lui luangin kan thlai a chawm that zia hi hai theih a ni lo asin. Heng ruah te hi sur lo se chuan hman ata tawh Little Rock hi khaw nuam niloin thlaler ramro tuma tlawhpawhloh a ni ang a, a chhunga tui inchhek khawl awm dawn hek lo i, thil nung reng rengin chenna tlakah an ngai lo ang. Kum tina ruah sur leh vur tla te hian thala ei leh in tur thlai leh thingte chuan an khawlkhawm a, chumi avang chauh chuan asin kan khua pawh hi chawlh hman nana mi hausa ber ber te’na an hman thin ni. Kat, chutiang chiah chu a ni. Jack-a i sun avanga kan chhungkuaa malsawmna i rawn thlen tam zia te hi. Chuti chung chuan engtin nge thihna hi anchhia i la hlawh fo theih? Lungngaihna leh vanduaina kan tih teh fo hi awm lo se zawng mihringin a siamtu a mamawh tawp nang. Rony-a pawh i laka hel char char thin kha thihngama a damloh meuh chuan nanglo chu enkawltu tur a neilo a ni tih hrilh ngailoin a chian tak hle hi maw. Kat, ka naute, mihring hi hlim reng tura duan chu ni ila hlimna hlutzia kan hre lo ang a, lungngaite hnem nachang pawh kan hre hek lo ang. Hlimna hlutzia kan hriatloh chuan hlimna zawn kan tum hek lo ang. Chuti a nih chuan mihring hi a lungngai tho tho dawn a ni. chutiang teh nuai nilova hlimna leh lungngaihna mawi taka nuna min chawhpawlh sak hi ropui i ti thei lo ang maw?”

“tunah hian i pasal duhtak Jack leh ka nupui duhtak chuan min lo en reng tih i hria em? Mihring hian thlarau a neilo i ti maw? En teh Kat, engvanga hlimna leh lungaihna inchawhpawlh nge a nih i inzawt ang tiraw? Mihringte hi hrilh nawn fo ngailo ila chuan Siamtu hian a pawlh ka ring bik miah lo. A chang chuan thlante hi thimin, tawp ta riauin leh vawt a chhe viauin ka ngai ve fo thin asin mahse en teh Kat, mihringte hi an nun tawpa bul taka tawp tawp tura duan ni se zawng thlarau pek an ni lo ang a, khawvelah hian thlarau bawlhhlawh leng vak pawh i hmu miah lo ang. Engkim chiang viau si hi engngatinge tulloleh sawngsawhlawt miahloa zawhna kan inzawh fo le tiraw? Ruah surte, ni sa vawl vawl te, khawlai zawng zawng vurina  khuh var luk changte hian phun phun thin mahila lehlamah chuan Little Rock khua ti nuam tura an tih tur tuksak an nih na kha a ni asin. Kat bawihte, little rock-a hnim hring riiai te ai hian thing ro hlir min pe se, tlang sang tak leh a lung sen no chekte ai hian lungchang tak tak hlir min pe se khawpui mifing chuan min rawk zo vek tawh ang. Chutiang niloa kan mamawh tawktea min pek kan hmuhhmaih malsawmna te hian kan nun a lo ti nuam daih zawk asin”

“kat bawihte , engvangin nge i lak atanga Pathian hi a hlat fo thin tih i inzawh avangin i tap thin tiraw? En teh, a nihna diktakah chuan Pathian hian min hlat ngai reng reng lo. keimahni leh pathian inkara fello hlek pawh a awm anih chuan keimahni zawk hi a ni a diklo zawk nge nge chu ni thin. Hman atabnga la ngai reng a khawngaihna te, a hmangaihna te hi ngaiah kan nei a, duan sa leh ni ve reng turah kan dah thin. Vanduaina nia kan hriatte avanga nun tam kan neih theih dan hi i hria em? Nimina Rony-a’n i thu a awihloh avanga sazupuiin i tihfai tir kha ka hria asin. I khawngaih em em a, hla tak atangin i thlir reng a, a thawh zawhah a riltam i hlauh avangin chhangphut thlum i lo ur sak pawh ka hria asin. Kha chhangphut thlum kha ur sak tur chein a ti lo che mahse nangma'n a hahin a riltam dawn a ni tih i hriat avangin i hmangaihna leh i khawngaihna lungkhawm chuan chhabphut thlum ur turin a ti che a nih kha. Khatiang chiah kha a ni; lungngaihna leh vanduaina nia kan hriat kan tawrh chhung zawng zawng hian tuemaw kan beisei fo chuan min thlir reng a, kan hringnun kaw ruak hnawh khah nan chhangphut thlum chu min lo ur sak thin. Chu chhangphut thlum ei hman lo a an duhthlanna avanga kal bo ta te vanduaina chu i chhiar thiam ta in ka ring. Duh tak Kat, kan duh niloin kan mamawh asin min pek thin”

Khawthim dawn ruai kara ni zung eng set set paw chek si zul chuan Pu Brown-a chu cathy lamah chuan a va hawi phei a, a hmai hupa inhnit hlawp hlawp chung chuan “ ka lo hre duhlo thin a ni” tiin a lo inhnit hlawp hlawp a

msi@rose