YOU STILL MOVE ME-DAN SEALS

Bazaar a chawhmeh lei lai chu ka thlir reng a, engngemaw tak chuan min mawlh chiang a ni tih ka hria a, engnge min mawlh tu erawh ka hre lem hlei lo. Chutia ka thlir reng hnu chuan chawhmeh zuartunu chuan ka duhve emaw a ti a ni ang e, beisei deuha min en avang pawh ni chuang lo chuan chulaiah chuan ka phei a, ani erawh chuan min hmu awm pawha a awm loh avangin amah ka va pan phei pawh chu engteh ualah a ngailo aniang chu ngawi rengin a chawhmeh lei chu a ipteah a dah lut a, a kal sawn ta daih a, kei lah chuan ngaihtuah chiang mang loin a chawhmeh lei ang kher ka lei a, a chhan lah chu ka hrechiang ropui si. Chawhmeh zawng zawnga ka ngainat loh ber chu engvanga lei nge ka nih tih ka nupui chuan hre kher lo mahse ka thinlungah chuan chiang takin a inziak a, ka ei duhloh mah ni se tuemaw ta ang a nih avang ringawt pawh chuan ka tan a hlu a ni.

LUNGHLU

'Lunghlu chu a thap a nia' ti a an sawi kan hre fo thin. He thuin a sawi tum tak chu mifel leh tha nia kan ngaih lem loh, pawnlam landana eng vak nia lang lo mahse chhungrila thatna thuhruk tam tak awm si te hi an ni

Mi thenkhat chu midang thatna leh mawina inthukru an hmuthei em em a,mahse chu lunghlu nawtmama,a thalai lachhuak tur erawh chuan tihngaihna an hre der lo thung si. Mi thenkhat ve thung erawh chuan chutiang thil inthukru chu an hmu hauh lo thung. Mi tlemte tak takin midangte thatna lai hmuha chawikan an thiam a, a tam zawkte erawh chuan tihngaihna kan hre ve hauh lo mai niloin an thatna kan hmuhhmaih fo ve thung a ni. Engtin nge midang thatlohna lai kan chawikan sak ang? Engtin nge chu thatna leh mawina,an chhungrila inthukru chu kan lakchhuah ang a,an nuna bet tlat emaw tih hial tur khawpa nghetin engtin nge an nunah lung kan phun sak ang?

KAL BO LO LA

Zan dang ang bawkin ka hlim a, ka nui a, nakin hun tur erawh kan sawi lo. Zan dang ang bawkin thawm riva neuh neuh ngaithla pah chuan tukverhah ka dak a, ka nuna thil ropui lo thleng tur ka nghak a ni tih lah ka hre der si lo. Mi tuemaw chuan min hmuin-hemi zana ka thil tawn hi hria se zawng ; ka chapopui theih loh zia min hrilh nek a nia ka rin ni!. Ka thinlung zawng zawnga ka rin, reilotea a kianga ka awmna tur hnenah chuan thu sep sel te te ka pe a, ka lak ata a kal bo ang tih ngaihna ka hriatloh vanga ka tana mi bik nia ka ruat hnenah chuan.

Khatih lai khan nang chu ka thian satliah chauh i ni a, ka hria che a, vawi tam tak thu lawilo leh hawklak thu tawi te te ka rakpui fo che a, ka hlimna tur tawk lek leka min chhan lai kha a ni. Siamtuin  damchhung hun min pek ka hman tawh chin-la rei em em loah hian mi tam tak ka tawng a, ka kawm a, ka chenpui a, a chang leh ka tahpuiin ka nuihpui bawk bawk a; nangchu chung mi tam tak zinga pakhat ve mai i ni ngei thin alawm. Kha zan khan engvanga ka chunga thil duhawmlo lo thleng kha hrilh che nge ka nih tun thleng hian ka chhutchhuak thei ta lo.

THAMAM

Thamam :

Chu pa chuan chu nu chu a hre ngai hauh lo a, a piang ve a ni tih pawh a hre ngai hek lo. Hmeichhe rilru chak leh thil hriat belh chak reng chi a nih avangin lehkhabu a chhiar kual nasain chanchinbu te nen lam a bihkim hle thin. Chutia chanchinbu hrang hrang a bih lai chuan a hna thawhna hmuna eng eng emaw thil thleng avanga harsatna tawk chanchin a chhiar chuan a mit a la hle a, chupa chu tunge a nih tih a chhui char char hial a, reife a beih hnu pawh chuan a awmna hmun leh boruakin in zir miau hek lo; thil pahnih khat bak hriatbelh a nei chuang lem hlei lo. Chupa nih dan tur leh engnge a nih a, tunge a nih tih chu ngaihruatnain lunglen a hril chang chang an tih ang mai hian ngaihruatna bak han fiahtu a nei lo a, hre reng lo mahse a theihnghilh ngai hauh lo thung.  A hnathawh chungchangte chu hriatbelh em em neilo mahse a rilru a luah tlat reng a, sawichhuah lohin engtik thleng upbo thei ang maw tiin a rilru a insual reng thin. Kum chuang fe a ngawihbopui takah chuan sawichhuahloh na na na chu rilru paw’n a  lo theihghilh ve tial tial a niang ,a hnaah a buai bawk nen,thildang inhambuaina a ngah bawk nen, chu rilru – tuemaw laka a rilru leh a thinlung chu tlem te te a nawhrehin a lo awm tial tial ta a ni.

Hun a kal a, naktuk pawh nimin a lo ni zel thin ang hian chunu pawh chu tuemaw a nih tumna kawng lam pan chuan hah takin a kal tauh tauh a, tuemaw-mituemawina tuemaw tia an sawi fo thin ang  chu a nita  meuh mai. A hriatloh hlain thla a ral a, a hriatloh bawkin kum a ral a, hun chuan hrilhlawklo mahse khawi hun emawah a kal pui a, hman hun a kir leh ngai tawhlo turin hun chuan khawi hun emawah a kalpui a, a cham hlen tir bawk. Chung hun zawng zawngah chuan chunu chuan chupa chu a theihnghilh ngai reng reng lo a, a hre reng lo mai pawh a!