i duh zawng chhin la

Saturday, November 13, 2010

FAR KHAT CHIAH

FAR KHAT CHIAH

Msi @ Rose

Mimi-i te chhungkua tan chuan krismas thilpek tih vel chu an tan a nih ve loh avangin chutiang thawm engmah hriattur a awm ve ngai lo. Krismas ni a nih avanga sa hmeh pawh tih thanah an nei lem lo a, mahse krismas thawmhnaw thar leh naupang lawm erawh mi fate’n an nei thin tih erawh an hre kar thung a ni. Kan veng a inan avang leh kumtluana a chawhmeh kharchhawn nen ka hmuh thin a vangin Mimi-i te chhungkua chu ka hrechiang ve hle a, kohran inang kan nih bakah kan biakin kalkawnga awm an nih avangin an chanchin chu ka hre hneh ve hle a, kan inah pawh an lo chuangkai fo a mahse ka lo uksak vak ngai lem hlei lo a. A pasalin a uire san a fanu pahnih leh a fapa pathum chu a enkawl a, zu zuar piangthar mah nise Pathian a rinna chuan a pui tlat thin. Pa telloin bakberh takin a fate a enkawl hram hram a, tun kum reilote chhung khan a nun chuan hun hrang hrang a tawng a,a fate lah chuan an hrethiam tak tak thin si lo. An hriat zawng chu an nu Mimi-i chu tlaiah chau takin a lo haw a,a thut hahdam hunah tuilum intur lo pek tur a ni tih erawh chiang takin an hre thung a ni.



Mimi-i fate tan chuan Isua nu mari chu Mimi-i a ni a, krismas putar pawh Mimi-i tho a ni. A fate thil hrethiam rual an nih ve tawh avangin a rilru a hah mahse Krismas nihna tak nia a hriat a ngaihtuahchhuah erawh chuan phur takin a che sauh sauh thung a ni. Hun remchang a hmuh apiangin a fate hnenah chuan krismas awmzia hrilfiah tumin a bei a,anni lah chuan ngaihnawm ti takin an nu thusawi chu an ngaithla a, krismas lo thleng tur chu ur lawk ve nasa hle mahse inpuahchah vak ngaihna hre chuang loin an nufa za chuan meilum ai pahin an hlim ve hle thin a ni. Pathian hmangaihna a hriat chian chhoh zel avangin a nun hrehawm leh chau tak pawh a chak chho zel a,a pianthar hnua a krismas hman hmasak ber a nih dawn avangin a rilru chu a inpuahchah ve nasa hle a, a tak ah erawh a tlanglawn bak hriatvak a neih loh avangin a fate thu tha hrilhah a tlak tawp mai a ni.

Kan inah ka pa nena titi tur a lo len fo avangin keini chuan ngaiah kan nei tawh a, hemi tlai pawh hian an titi ngaihthlak tumna pawh nei chuang loin thingpui ka lum sak chu ka pe a, an titi zawha a tlai lohnan an titi chhung chuan a chawhmneh hralhbang zinga kan duh kan lo thlang a, chu pawh chu a lo len apianga kan tih thin dan tho a nih avangin ngaiah kan nei tawh a mahse a thusawi thenkhat chuan ka beng a verh em avangin an inah len ka tum ru rauh rauh a. Krismas hma a ni a,khami tlaia an titi khan min koh tlata avangin ka ngaithla ta zel a, a sawi pakhat ka hriat chian em em chu “ Zanah ka fate an mut tawh hnu hian kawtah ka ding a, van ka thlir thin. Van ka en apiangin min lo thlir rengtu a awm a ni tih ka hrechhuak thin a ni” a tih chu. zana van a thlir voh voh hi ka hmu fo reng a ni.

An chhungkaw tan chuan krismasa kawng an chei en tiarte chu a ti krismas tu a ni a, krismas parte pawh an inchungte leh an thenawmte pangpar chu a ni mai a, Krismas putar pawh an inah a kal an ring ve lo reng a, krismas card pawh an lei phaka an dahloh avangin an lehkhapuanah an thiam ang angin an chei mawi a,milemte siamin an unauin an inpe a,an hlimpui ve hle mai a, miin thlilpek an inpe thin a ni tih hre mahse thil thar leh tha inpek tur an neih miau loh avangin an thil neihsa theuh chu inthleng turin lehkhapuana tuam ve mai an tum a ni. Krismas putar chanchin an lo hriatve nel nual avangin an titi naah pawh an telh ve nasa hle a mahse Mimi-i chuan a haider tlat a, engtin nge a fate la naupang tak tak hnenah hian krismas nihna diktak chu a tuh ang tih erawh chuan a ngaihtuahna a luahkhat hle thung mai.

Urlawk hma zan a ni a, kan chhungkua chuan kan tih dan thin ang bawkin kan hnaivaia mirethei tana kan tih pawisa chu kan chhep darh niah mai a, ka hawi kual a, ka rilruah Mimi-i te chhungkua an lo lang nghal a, krismas chhang leina tur tal chu kan pe ngei tur a ni tih pah chuan a hming chu ka thailang ve kalh mai a,a hming chuang ka en chuan ka lung a awi hle mai. Zan inkhawm banah chuan ka tih thin ang bawkin Mimi-i te inzawn ka thlen chuan ka va bih leh kher a, zanah an nufa zaa titi paha meilum ai chunga arsi an thlir chu ka va chhim ve a,kha zan kha tun thleng hian ka la hre reng thin. Kan inhmuh fo avangin an chhungkua chuan min nel a,ka thu chiah pawh chu a fate chuan min bawr nak nak a, kan phul hlut hnu chuan kan titi ngai chu an chhunzawm leh ta a ni. An meilum ai hawl pah chuan Mimi-i chuan a fate chu thawnthu hrang hrang a hrilh a, a changin an nui a,a changin an inhnial a, ka awt letling zawk hle a ni. a thawnthu sawiah chuan krismas nihna diktak an rilruah phum a tum a ni tih chu ka hre reng a mahse ka ngaithla tui ve hle tho mai. Ka nuin kan naupan laia thawnthu min hrilh laite ka mithtlaah a lo lang uar uar a,ka lung a leng hle, engtia rei nge nuin a fate thawnthu hrilh lai ka hmuh tawh loh tih pawh ka hre ta lo. A fa upa ber dawttu chuan ka puan sin khawih nuap nuap pah chuan a nu titi chu a lo pawt chat a,ka hnenah chuan “ni Sawm Krismas putar hi tute iunah nge a kal dawn” a ti thut mai a, chhan ngaihna mai ka hriatloh avangin hrilh hai tak chunga van ka en voh voh lai chuan Mimi-i chuan a fate pahnih kuah pah chuan dam diaiin “ Bawihte vana arsi te khi i en em?Pathianin zana kan thlir atana min pek anih khi, an mawi tiraw?” tih pahin a kutzungchalin van chu a kawk a, a tuilum in pah chuan a sawizawm zel a, “Bawihte krismasa thil pek kher hi tunge mamawh ang, thiulpek tha ber Isua kan nei tawh tho a, engdang nge kan la duh zel ang. Pathian fate kan nih tawh avngin krismas te chu kan tan a ni ve tho alawm, midang neih ang nei ve lo mah ila Isua kan neih chuan a tha ber a ni” a tih lai chuan a fanu chuan “krismas putar chu” a rawn ti zuk a, ka ka ka ang hman chiah tihin Mimi-i bawk chuan a ze ngai damdepin van en pah chuan “ Bawihte Isuan min hmangaih a, nangni pawh a hmangaih che u ang bawk hian keipaw’n ka hmangaih che u alawm. Hmana piang naute Isua ngaihtuah chungin van khi thlir teh u, Pathian ropuizia leh kan tana a inpek nasatzia hi, a ropuina chu sawilo mah ila arsi kan hmuhte khian an ti chiang asin. Khing arsi te khi kan thlir atana min pek an nih ang bawkin nausen Isua pawh kha kan tana piang Pathian min pek alawm. Chu baka thilpek hlu engnge kan tana la awm chuang ang le? Krismas thilpek dang a ngai tawh hleinem Pathianin a hmangaihna min pek kan neih phawt chuan.” a ti dam dap mai a, chutiang ka lo la ngaihtuah thlen ngailoh avang chuan sawi tur pawh hre loin kan meilum ai lai chu ka melh tlawk tlawk mai a, a tuilum lem khalh pah chuan Mimi-i bawk chuan “Bawihte a hrim hrim thuin Krismas putarte chu kan inah a lo kal ve duh lo ang, kan in awmna a kil si,a zim si,a thim si, kan cheimawi ve bawk si lo,kan in awmna a rawn zawngchhuak hman kher lo ang, a buai dawn si a, inhnuai kil deuhah chuan a kal hman ka ring lo, bakah a lawn chhoh lehna tur meikhu chhuahna pawh kan nei si lo” a ti chuai raih mai a, ka mittui a tla teuh thei hle mai “mahse bawihte Pathianin Isua min pek aia thilpek hlu a awm chuang hlei nen. Pathian fa Isua neitu tan chuan thilpek dang engnge mamawh tur la awm chuang ang.” tiin a sawi zawm a,a sawi lai chuan an nufaza chuan an inkuah a, ka thlir ning thei lo a ni. Chung naupang rilru thianghlim tak tak thinlung a Lal Isuan hmun a khur ngheh zia ka hmuh chuan ka mittui a ti tla chiang hle mai. Zan a rei tawh avangin kan in mangtha a ka haw pah chuan Mimi-i thusawu chu ka bengah a cham reng a, numawlte nia ka ngaih si khan krismas nihna a van lo hre chiang tak em! ka ti vawng vawng mai a ni.

Urlawk zan tlai a ni a, khawthim hnuah kan tih dan ngai ang bawk chuan kan unau chuan kan insem darh a, kei chuan Mimi-i te thler lam ka thlan avangin ka pan nghal a, an kawngkhar vawithum vel ka kik karh karh hnuah naupang chiar nak nak karah “lo lut rawh” tih thawm ka hriat avangin ka lut a, antam chhumhan chauh hmeha tui ti taka an chaw ei lai ka hmuh chuan ka tirilah ka khur a, an chhungkaw tana ka ken rs 200 chu ka ipteah ka hum khawr vek mai. Tui ti taka ka chaw eilohna a lo rei tawh hle a ni tih ka hre chhuak thut a,ka va han tluk lo em! hlimna leh lungawina hi suma lei rual a lo ni lo a ni tih an ti lang chiang hle. “Mimi kha krismas chhang lei nan” tiin ka rs 200 hum khawr vek chu ka pe a, ngawi rengin mittui tla chungin a ding reng a,min en tlawk tlawk a, ka hrilh a hai letling hle a ni. “Lal piancham” tih chiah a sawi a, a bak zawng chu a mittui chuan a sawi zawm a, ka mittui chu dan rual ni bik hek lo, kan pahnih mittui chu kan inbiakna awmchhun chu a ni a mahse engkim erawh ka thilung chuan a hre fiah em em si. Keinin sum tam tak senga krismas kan hmuah laiin anni erawh chuan antam chhum han nen lungawi takin an nghak a,kan inang lo mang e.

Zan khuaa ka rilrua an awm avang chuan ka mu tha thei lo a, zing khawvar hmain eitur leh pawisa tlem nen mimi-i te in lam panin ka thawk chhuak a,ka thlena an kawngkhara awm chuan min barakhaihkher mai. Eitur, lehkhaip leh thawmhnaw chi hrang hrang a lo intiang ur mai a, ngawirengin lehkhaip sen ka mitla biktu chu ka hawng a, a chhungah chuan he thu hi a lo inziak kalh a-
“ Pathian fate kan ni, Lal Isuan a hamngaih che u-krismas chibai” tih te hi. Ka chhiar a,ka chhiar nawn leh a, vawi tam ka chhiar nawn hnu chuan ka inngaihtuah harh ta chauh a ni. Far khat nih hi a van lo har lo em! Kha thlipek petu kha tunthlengin tunge a nih tih ka la hre lo mahse Mimi-i te chhungkaw tan khan far khat intanna a van ni chiang em! Krismas nihna dik tak hi a thi tawh emaw tiin ka lo ngaihruat ve chiam thin a, mahse krismas nihna diktak hi mi tam tak thinlungah a la thi lo a,a la nung reng a, a nung reng bawk ang tih ka hre chhuak ta a ni.

Thilpek hlutak inpekte, in mawi taka cheite hi krismas behbawm chiah a ni tih hretu mi tam tak a awm a ni tih ka hriat hian ka lawm zual thin. nia, krismas putar thilpek tunge mamawh ang? Thilpek hluber Isua nei tawh tu tan chuan engngew thilpek dang mamawh tur la awm le? Lal Isua ang khan he hunah hian thiltha midangte tan ti ila krismas dik tak chu kan hmang a ni mai.

thilpek Isua nei tawhtu tan thilpek dang dawn leh tur engnge la awm chuang le.

No comments:

Post a Comment