i duh zawng chhin la

Tuesday, July 5, 2011

WATCH YOUR MANNERS! - II + III


Mi chaw eia sawm turte tana hriattur


Mi chaw eia sawm hi mizote chuan induhsaknaah kan ngai a,a dik mahse a sawmtu te’n duhsak hle mahse an tihlan loh miau chuan a sawm-a tan thil nuam leh hriatreng tlak a ni thin lo. Miin-a chaw ei hi thil nuam tak a nih lem loh avangn chaw eia sawm tute an bengvar  a ngai em em a, chaw ei ringawt niloin inkawmhona tha neih tum  leh duhsak an ni tih kan hriattir  tur a ni. Kan hriatsa awm tho mahse kan mikhual/thiante/chaweia kan sawma awmdan mawi leh hawihhawm dan tlem lo thlir ho leh ila

1. Mi chaw eia i sawmdawnin ziaka sawm a tha ber a,a nih loh chuan text message emaw call-in sawm la,a ni-ah remind leh ngei ang che. chaweia i sawmturte hrilh turin midang kutah hlanchhawng mai suh.

2. Thil dang zawng zawng aiin chaw eia I sawmte I sawm niah na na na chuan dah pawimawh ber ang che


3.Chaw eia I sawm rualin I lam theih leh theih loh tur te, I thlah theih leh theihloh tur thu te, chaw ei I duh hun leh a remchan hun ruahman dan hrilh chiang nghal la,a duh dan zawt bawkin in inremsiam dawn nia.

5.Miin I ina chaw an lo ei dawnin I in a fai tha tur a ni a, tin I inlengte’n an hmuh I duhlo chu dah bo la, tha takin lo inbuatsaih lawk ang che

6. I sawmte an lo thlen a nangma’n ei rawng bawl I ngai ngei ngei emaw I chawhmeh siam dan I endik/zawt duh a nih lem loh chuan I ei siamna hmunah hruai lut lo la, inleng kawmna hmunah I kawm hmasa dawn nia, chutiangin chaw eikham titi na hmun pawh.

7.I ina lo kal turte an lo thlen veleh dingin  lo chibai la, I chhungte emaw I thiante emaw midang awm ve te I hmelhriat tir vat dawn nia

8. Khaw awmdan a zirin an lo thlen veleh in tur engnge maw  pe hmasa ang che

9.Chaw ei ho naah I sawmte bulah chawbel hung lo la, I bulah hungin I sawma te thleng I thlithlai reng dawn nia mahse he tah hian an thleng melh kur reng erawh tih ngailoh tur a ni.

10. chawhmeh tur I duhzawng leh I ngainat zawng lei mai loin chaw eia I sawm tur chuan ei theihloh, huat zawng, ngainat zawng, eichak zawng leh duh zawng a nei nge neilo tih zawt hmasa la, a duhzawng ngaipawimawh hmasa zawk ang che.

11.Chawhmeh I siam dan a zirin rem la, a lai tak a theih loh chuan I sawmte hnaih berah a tui ber /a ngainat ber hung la, chutiang zelin a indawt danin  I rem zawm dawn nia.

12. Chhungkuaa chaw kil ho kher in ti tlat a nih lem loh a naupang leh buchip deuh nei innih chuan chaw lo ei hmasak tir a fuh fo

13.  I sawmte chawhmeh suah sak ngai suh ang che, an duh lai bik I dah hran sak a nih loh chuan. Loh theih loha I suah sak  dawn a nih chuan zawt hmasa la, vawi hnih an hnial che chuan tum lo law law ang che

14. Chaw ei chhungin fel fai takin awm tluan tum la, chetsual theihna lak ata inveng la, engkim fimkhur takin I ti dawn nia

15.I sawmte ngainat zawng ei leh inah chauh lo phawrhchhuah sak thiam la, titi ho naah a tangkai zual duh bawk.

16.I inchhung burua engnge maw tihpalh thil thuah I misawmte’n an tihchhiat chuan sawi sawi loin ngawi rengin I tifai dawn nia

17.Chhungkuaa inhauh/inhnial/invin emaw awka ngaihthlak nuamlo lak atangin I inveng hram hram dawn nia

18.I sawmte nen in titi ho naah inhnial emaw boruak nuamlo a awmdawn a nih chuan a tlawm zawkah tang hreh reng reng lo ang che

19.Titihona a awm a nih a, mi tam tak chaw eia I sawm in a rem chan chuan rimawi zawi te tein rik tir riai riai la, titi ngaithla duh lemlo lo ngaihthlak atan a tangkai phian a nia. He tah hian I rimawi duh zawng aiin I khualte duhzawng thlang thiam ang che

20. In titi hona tibuai thei reng reng phone/tv/naupang leh thil dang a awm a nih chuan dahbo lawk ang che

21. In titi ho naah I sawmin a zawt hmasa che  anih loh chuan in chhungkaw chanchin a tlem thei ang ber sawi la, a chhe lam ngat phei chu sawi lo hram hram la mahse I chhungte fak uchuak suh ang che, nang aiin I chhungte khawsa zia pawh a hrechiang thei zawk si a

22.I mikhualte chaw ei khamah an leng rei deuh a, I hun a tawt tawh a nih chuan mawihnai takin tih tur I neih thu I sawi lang zauh dawn nia

23.I mikhualte an haw dawnin pawngpaw sezawl chhuah ngawt loin kawngkhar thleng tal  I thlah dawn nia

 

Miina chaw ei turte tana hriattur: (watch your manners!-III)

Miina chaw ei hian chet chhiat a awl em em a “chumite inah chuti khati” tia a hnua infiam hi a awm fo thin. Chetsualna tam tak pumpelh tur chuan fimkhur mai bakah nachang leh hmangchang  hriat a pawimawh a, chaweia min sawmtute chunga kan lawmna sawi mai bakah kan lan tir a tul bawk. Chaw ei hona boruak tinuamtu chu khual lo chhawntute chungkua chauh a ni lo a, an khualte paw’n mawh phurna lian tak kan nei a ni. Va kala chaw va ei a haw leh tawng kha a pawimawh ber  a ni lo tih kan hriat theuh a tha. Khual tha nih theih dan tlem sawi leh ila

1. Tun laiah mizote paw’n RSVP (response s’il vous plait) tih kan ziak fo tawh a, hetiang ziak sawmna I dawn chuan I kal theih leh theihloh tur thu sawi ngei ngei ang che

2. Chaw eia an sawmna I pawm hnuah thil engngemaw pawimawh vanga I kal thei dawnlo a nih chuan a hma thei ang berin I hrilh dawn nia

3.Chaw ei hona tura I kal dawnin emaw miina chaw I ei dawnin emaw thil bik pawimawh tawpkhawk a nih lem loh chuan in nghah tir lo la, hun bituk nei a nih lek phei chuan a hun bituk aia hma minute 5 talah I thleng hram hram dawn nia

4. Chaw eia insawm hian ei leh in ineitawmpui ringawt a tum a ni lo a, inkawmhona leh I kianga awm an duhna che lan tirna a ni tih hre rengin chaw ei tur ringawtin  I va lang tur a ni lo.

5.Miin chaw eia an sawm chein a ei tur ai mahin inkawmho leh i presence kha an duh ber a ni tih hria la, an ngaihpawimawh naah che lawmthu sawi theinghilh suh ang che

6. Inneitu hnena sawi lo lawkin khawiah mah leng/chaw eiah insawm chawp ngawt suh ang che
.
7. Tuinah emaw sawmlohin chaw i ei dawn emaw i leng dawn emaw a nih chuan hrilh lawk ngei ngei ang che. An remchan hun loh deuha i thlen vaih chuan an ngaihdan che a dang kumkhua thei a nia

8. Chaw ei emaw leng tura sawm i nihin sawmloh i thiante emaw i chhungte emaw kalpui lo hram la,i kalpui dawn a nih erawh chuan a sawmtu che i hrilh lawk dawn nia

9. Chaw eia sawmtu che chhungkua chu hriatchian hmasak tum la, an chhungkaw hminga i ko kim theilo a nih pawhin ka pi ka pu, mami,mama tiin koh tum hram hram la tumah mawl biak suh ang che

10. I chaw eina tur te'n naupang an nei nge neilo tih hriat hmasak tum la, an nei a nih chuan naupang lawm engngemaw i keng tel dawn nia

11. Chaw eia sawm i nihin kut ruakin kal lo hram la, lawmthu sawi nan engnge maw thil pek i keng tel thin dawn nia. Hetah hian thil to lutuk a ngai hran lo a, ei leh in tur nepnawi/an chhungkaw duh ang chi engngemaw tihna a ni mai. A pawisain pek tum ngai suh ang che

12. Innei tute'n a hun an ruat hma emaw an sawi hma emaw chuan ei leh in tur pawngpaw ban ngawt suh ang che.

13. I lenna/chaw eina te'n an in leh a vel an hmuh hmasa che emaw an fanpui hmasa che a nih loh chuan nangma thuin va fang kual nghal ngawt lo la, fangkual turin dil hek suh.

14. I lenna/chaweina hmunah i thil en duh zawng entirnan lehkhabu/bungrua leh thildang a lo awm anih chuan an remtihna la hmasa loin la ngawt lo la, chhuarte lek phei chu hawng tura tih i nih loh chuan hawng reng reng suh ang che

15. Midang awm ve te nena titi khairual tur berin thu haw lam kal lam ngaihtuah la, mimal chungchang sawi lo hram hram ang che.

16. Chaw ei laiin emaw titi ho laiin i phone switch off emaw silent la, loh theih loha biak a ngaih chuan hawihawm takin sawi la,hmun fal deuh biakna tur i zawng dawn nia.

17. Chaw ei siam lai leh tihfel laiin puih an ngaih leh ngaihloh zawt la, i puih ngailo an tih chuan puih luih tum kher suh ang che

18. Chaweia sawm tu che hnenah lawmthu hrilh theihnghilh lo la, an thilsiam fak sak ngei ngei bawk ang che

19. Chaw ei khamah titihona in nei pawh a ni thei, leng rei lutuk lo turin i hun vawng hram hram la,an chelh lui tlat che a nih chuan i haw duh hun hawihawm takin i hrilh dawn nia

20. Chaw ei khamah emaw i lenna nen in titi zawhah emaw ngawi rengin haw ringawt lo la, i haw tur thu i hrilh pahin lawmthu sawi ngei ngei ang che

21. miina chaw kan eiin samzai emaw thil bawlhhlawh emaw a lo awm a nih chuan hmel a tih lan emaw sawi kher emaw uak leh thawh thut emaw tih reng reng loh tur a ni, kan ei tura  bawlhhlawh awm chu ngawi renga paih a,kan eizawm duh tawh lo a nih chuan  ngawi reng a thawh mai tur a ni. an duh reng vanga an telh a ni bik lo tih hriat a tha (contri by BMW)

Table manners :

Dip dapa chaw ei laia awmdan tur kan sawi hmain hriat tur pawimawh zual tlem tarlang tel ila

1. Chaw ei dawn a thutnaah I duh duhnaah thu ringawt loin an kawhhmuh hmasa che a nih loh chuan thutna tur I zawt mai dawn nia, chhungkuain thutna bik an nei thei tih hre reng ang che

2. Chaw ei lain in neitute an titi hmasa a nih loh chuan phulhlut lo la an eisiam I fakna a nih loh chuan sawiselna awka hmang lo hram hram turin I inveng dawn nia

3. Chaw eia sawm tute ei dan ang anga in siamrem thiam ve zel tum tur a ni a, I thei dawn ngang lo a nih chuan chaw ei hmain I chaw ei dan thin I sawi lawk dawn nia

4. Chawhmeh ban turin ding reng reng suh ang hce. I chawhmeh duhzawng lak a ngai  anih chuan inpe chhawng mai turin hawihawm takin I kianga thu hnai ber hnenah I sawi dawn nia

5.Duh zawng ngainat zawng tih avang maia lim nghek hi mi mawl zia a ni tih hre reng la, I duhzawng leh I ngainat tak zawng pawh nise miin a nihna angin I rilruin bituk I insiam dawn nia

6. Chawhmeh ringawt niloin chaw ei tel ve la chawhmeh heh mi-ah I chhuak ngai lo ang

7. Hap buan buan emaw ei chep chep emaw thial niau niau te hi thil mamwilo tawpkhawk a ni a, chuting ti lo tur chuan I inveng hram hram dawn nia

8. Chaw ei chhung zawngin hlim hmel put tum hram hram la an chawhmeh siam fak sak theihnghilh lo ang che

9.Fel fai takin chaw ei tum hram hram la, I chaw eina te’n chetsualpalh emaw an neih chuan lungawilo hmel pu mai loin a tihfai lamah I pui vat zawk dawn nia

10. I ngainat zawng a ni lo a, I tilui thei hlawl lo a nih loh chuan chawhmeh zawng zawng eikim vek la, I thlenga suahsak I nih phei chuan khawihloin kalsan suh ang che.

11. I duhloh zawng an hmeh pui che a nih chuan sawisel emaw lungngawi lo hmel ti lang lo la ngawi rengin I ei lo mai dawn nia. I thlenga an suahsak dawn che a nih chuan hawihhawm takin I ngainat loh thu I sawi mai dawn nia

12. Ei kham hmasa ber leh hnuhnung ber ni lo turin I chaw ei speed I siam rem hram hram dawn nia
Mizo te’n kan uar em em zuk leh hmuam ti lo hram la, chaw ei khamah pawh I chaweina te’n an pe hmasa che  a nih loh chuan zuk leh hmuamah insum hram hram ang che

in zavaiin chaw ei tui ule :)



14 comments:

  1. Ka chhiar chhuak dap, a thui angreng viau naa, mahse a tha ka ti khawp mai. zir tur a tam hleiin ka hria, lo ziah belh zel teh khai, i hman chuan, a tha lutuk tlat

    ReplyDelete
  2. hmelthate i fel lutuk, mood fuh dan azir zelin aw :)) mitin hian khawiah pawh zir tur kan ngah khawp mai, kan ti zel dawn nia,a bak lo chhunzawm ve la nang i hre deuh ang :)

    ReplyDelete
  3. A tha khawp mai. A chipchiar dap dap viauin ka hria. Tute tan pawha pawimawh vek a ni. Ka tan phei chuan a pawimawh leh zual! Request pakhat, thian inkawmnaa awm dan tur ka lo beisei leh dawn nia. :-)A tha khawp mai. A chipchiar dap dap viauin ka hria. Tute tan pawha pawimawh vek a ni. Ka tan phei chuan a pawimawh leh zual! Request pakhat, thian inkawmnaa awm dan tur ka lo beisei leh dawn nia. :-)

    ReplyDelete
  4. Chipchiar vak pawh ka lo ti lo asin ts. :) a lawmawm reng reng e. Nia, i request pawh tih hlawhtlin dan kan zawng zel mai ang chu, nang nge nge ka blog i lo tlawh thin a,i fel lutuk. Get going t.s

    ReplyDelete
  5. Rose, tha hle mai. i lo haw leh hunah chaw i rawn ei leh dawn nia! :)

    ReplyDelete
  6. maisek :) in ina chaw ka lo ei zan kha perfect. nia, kha aia perfect khan kan ti zel ang chu :))

    ReplyDelete
  7. Zawm atana tha tak tak atam hle mai. Aizawl chanchinbu vela chhuah atan a itawm hle mai.

    Keichu, chaw eia sawm hi ka nuam ta khawp mai. Puar lova ei tihvel hian min bawh buai ta vak lo. Kan upa ve tan aniang! :-)

    ReplyDelete
  8. seki nia mahni hmaa mi ei ngamloh hi chu a chi vak loh,mahni inhremna chikhat a ni :)) mahse duh tih vanga lim nghek zawng a veng mawng zia deuh a ni :))

    ReplyDelete
  9. Tha hlawm hle mai. Hriat reng tum tur a ni. Pakhat kan sawi ve lawks: min ina chaw kan ei hian, samzai emaw thil them ei tel theihloh a awmpalh chuan a ruk thei ang bera paih zeuh a chi ka ti. In neitu ti zak rum² khawp then vel hi chu chi vak loh.... an tih luih a ni bik lova.

    -pi blackmagicwoman

    ReplyDelete
  10. aw! bmw kan sawi hmaih a ni!.a tha e i lo thawh tha lutuk, ka lo telh nghal ang :)). miina chaw ei hi ngaia nih a har a ni! :)

    ReplyDelete
  11. Hriat reng tawh tur anih hi. A tha ka ti khawp mai.

    ReplyDelete
  12. Tha thei khop mai, chaw ei min sawm hun ka lo nghak reng a nia:-):-)

    chhangteval

    ReplyDelete
  13. lol chhangte val i lo ei malh dawn nia, engtik lai pawhin a inbun tawp theih e :))

    ReplyDelete
  14. A tha hle mai...a dang pawh lo ti zel teh khai.

    ReplyDelete