i duh zawng chhin la

Friday, September 2, 2011

SMOKY MOUNTAIN MEMORIES -jeffrey-a pa

MESSY ROSE

“Oh and these northern nights they're dreary
And my southern eyes are teary,
Ka mittui a tla.”

          Zan rei tawh tak hnua he thutawi min rawn thawn hlawl \um khan keiin engtin chiah nge ka chhan che pawh ka hre tawh lo. Mahse, i rilru leh ngaihtuahna ka \awm pui phak ve riai ruai avangin han hnem ngaihna vak che ka hre lo tih erawh chu ka hria.

          Kha i thutawi ka dawn hnu khan pawnah ka chhuak a, a lang pha dawn lo tih hre rilru reng chungin i tuallenna Abhor ram zawn nia ka hriat lam kha ka rawn thlir \awk \awk a, rin lawk ang ngeiin kan Zoram timawitu tlang dung hrang hrang inkhawh zer zur te chu fiah lo riaiin ka hmu a, mahse ka mitthlaah erawh chuan fiah takin i hmel ka hmu lawi si.



          Siamtuin min intihtheih khum ta emaw tih mai turin chung lamah thla a eng no nghulh a, van boruak dumpawl ruih maiah chuan eng dang tihna chang hre lova i thlir vawng vawng \hin arsi te pawh an de tiar a. Chu’ng thil, awm ve reng tura kan ngaih, a makna leh a hlutna pawh kan hriat tawh loh thlir vawng vawng chungin thutawi hi min rawn thawn a ni tih ka hre thiam ta.

          Amah Dolly Parton khan ‘Heart Song’ album-ah khan, “Tu te’n emaw ka pa hnenah Detroit, Michigan lamah pem ula, ’tah chuan eizawn pawh a awlsam deuh asin, an tih avangin ka nu leh pa leh kan unau sawm pahnih zet kha kan pem ta a, mahse an sawi angin khawsak a lo awlsam awzawng lo mai a. Ka pa chu a inngaihtuah chiang a, Smoky Mountain lamah bawk pem let leh a rawt ta a, ‘ka dam a, hna thawh theihna kut pahnih ka neih chhung chu ka nupui fanau te hi ril\amin inthi bik lovang’ a ti a, a lo sawi dik a nih hi,” a tih nghe nghe kha.

          An chhungkuain an seilenna an khaw hlui lamah pem let leh mah se la, ani Dolly erawh chuan zaia eizawn tumin an khua chu a chhuah san ve ta thung a. An ram hmun hrang hrang mai bakah khawvel ram dangah a zin chhuah fo a ngai a, mahse chuti chung chuan a lo chawr chhuahna ‘smokey mountains’ chu a theihnghilh ngai lo. Khaw te tak te, thingtlang khua, mikhual pawhin an tlawh zen zen lohna hmunah chuan a ngaihtuahnain a cheng fo a, chu hmun chu a taksain kal san mahse a rilru erawh chuan a kal san ngai lo.

          Ani ang mi hausa leh lar, duh duh nei thei leh lei thei mahin thingtlang khaw chengker tak a ngaih em avanga khawvel pum huap lo lar ta, he hla mawi em em ‘Smokey Mountain Memories’ a tichhuak a nih si chuan Messy, chhung leh khat, \hen leh rual leh i pian, i seilenna kan Mizoram i ngaih em avanga i mittui tla hi ka dem hauh lo che a, ka chhuang zawk che asin!

          Mahni chenna khua leh veng na n^ n^ chu khaw dang leh veng dang ai thlawt chuan a nuam alawm, mi in \ha pui pui, a chhunga bungraw nalh tak tak awmna aia mahni in ngei che rik rek pawh a ngaihawm reng ang tho hian. Khawi lai emawa thing buk ri re lo ding ringawt te pawh midangin ngaihlu teh chiam lo mah se, tu te emaw nena kan lo lawn tawhna a nih chuan thing dang ngawt ai chuan kan tan a pawimawh a, \henawma dawr chhete pawh \hianzahova kan lo tawm khawm fo \hinna a nih chuan a ngaihawm \hin si.

          Oh and these northern nights are dreary
And my southern heart is weary
As I wonder how the old folks are back home
But I know that they all love me
And they're all thinking of me
The Smoky Mountains memories keep me strong

          I hla thu rawn chhawp chhuah te hi ka en nawn a, Dolly Parton ngei pawh ka zai nawn tir tlut tlut a, mahse i khawhar lunglen hnem turin thu \ha leh thu ril han phawrh chhuah mai tur ka hre si lo. I thutawi min rawn thawn hian ka mang a ti ang a, ngaihtuah loh tur thleng thleng min ngaihtuah tir a nih hi.

          Mi lungleng thei tak i ni tih ka hria a, mi tuarchhel tak i ni tih lah ka hai hek lo. Mahni inlum chhuahsan tura i rilru a insiam lai pawh khan he’ng zawng zawng hi i la tuar dawn tih lah i hre sa vek tho. I kal san tak i chhungte leh \hiante chu i theihnghilh ngai hauh lovang, anni chu sawi loh keini paw’n kan theihnghilh ngai lo che.

          Chhungkhat laina leh \hian, hmelhriat sa awm miah lohna hmuna i khawsa ringawt pawh hian ngaihtuah a titam \hin. Chuti chung chuan, a kotu che kohna kha a na em a, kal lo thei lo niin i inhre si a nih kha. Khawvel thil taka ngaihtuah chang phei chuan i hna \ha tak i kal san ringawt pawh hi uiawm tham a tling. Khawharna leh lunglenna chuan a bawh buai fo che ang a, a kalsan bik hauh lo ang che. A chang phei chuan, “Duh ka thlang sual em ni aw?” te pawh i ti rum rum \hin ang.

          Thlifimin thing hnah a chhem phet hlep hlep a, lei lamah hnah ro a chhem let tawp tawp bawk a. Khawi lai hmun a\angin emaw arpa a rawn khuang al al a, ralah rit phur motor lian a rum vang vang bawk a. Chu’ng thil zawng zawng chuan i tuallenna \hin Leitlangpui a hriat chhuah tir che a, i chhungte i ngaihtuah a, i \hiante i ngaihtuah chho zel a, kei hial i rawn ngaihtuah thleng ta a nih ka ring.

          I thawhpui zinga a tam zawk daih chu i pianpui \awngin i be thei lova. Ni lo, biak chu i be thei ngei ang a, mahse an hrethiam si lovang. I naupang enkawl ho zingah khaw thim dawn ruaia, “Good Morning, Miss,” tia chibai buk \hintute chu a changkang pawl an nih thu kha min hrilh tawh a, chuti ang a nih si chuan anni tehlul chuan khawiah mah Mizo \awng an thiam hlek lovang.

          “A lum lutuk,” tih thu ringawt te mi rawn thawn \hin avangin hmun nuam takah i khawsa lo tih a chiang a, fiamthua in chawhmeh i rawn sawi zauh zauh \hin avangin in hmeh a \ha lutuk lo tih pawh a chiang. Khawlum zualpui laiin i pindan zimteah chuan i ‘fan’ neihchhun i han ‘on’ ve ngei a, a rawn vir ve \uat \ual a, a chik \ut \ut a, ‘thli’ aiin bengchheng a siam tam zawk a. Mahse, chuti chung pawh chuan i neihchhun a nih miau avangin bengchheng chu i hre lo der a, ning ve viau mahla, tihngaihna awm hek lo le. Heti ang hunah hian in huan thingbuk daihlima eng dang ngaihtuah lova i \hut der der lai te i ngaihtuah chhuak \hin a, haw i chak a, Zoram ngaih a zual \hin ngei ang.
          I lunglen hnem turin keiin eng mah tih theih nei lo mah ila, i hla rawn sawi tho hian inhnem tum mai la ka ti mang e:

Oh and these northern nights they're dreary
And my southern eyes are teary
As I wonder how the old folks are back home
But I'll keep leanin' on my Jesus
He'll love and guide and lead us
The Smoky Mountains memories keep me strong

Keia hrilhfiah leh chuan ngai lovin a thu hi a chiangin ka hria. Dolly Parton chuan rimawi khawvela hmasawn leh zual tumin an khua a chhuahsan a, a tum ang ngeiin khawvel pumah hriat a hlawh ta reng a. Chuti chung pawh chuan a chawr chhuahna ram chu a theihnghilh hauh lova, ngaiin a rum ve vawng vawng fo a ni ang, heti ang hla \ha a rawn phuah theih mai danah hian.

Mahse, ani pawhin an in leh lo a chhuahsan chhan kha a theihnghilh ngai lova, a chhungte, a \hian te leh an khua hrim hrim kha ngai teh mah se a tih tum chu a titlang lui tlat tho a. Lunglen vanga khaw hmuh fiahlo riai leh mittui far fep fepa a awm lai pawhin an khua a theihnghilh vang ni lovin Isua hnenah a lunglen chhawk zangkhai turin a dil \hin a, a rin Pathian chu a tlansan ngai lo.

Messy, nang phei chu hmingthan leh hausak tuma in leh lo chhuahsan i ni lova, Pathian rawngbawl tura ‘Missionary’-a kal i ni tih kha hre reng la ka va’n duh em! Harsatna leh manganna, lungngaih leh hrehawm, lunglen thlengin i tuar tawh a, i la tuar zel dawn bawk. Mahse, kan rin Pathian hian min theihnghilh ngai lo tih kei aiin i hre chiang zawk daih ang.

Nangin i chhungte leh i \hiante i ngai \hin ang tho hian keini’n kan ngai em em che a, amaherawh chu min hmangaihtu Pathian kan nei a, kan tana \ha tur hian ro a relin ka ring tlat a ni. Chuvangin, ‘Smokey Mountain Memories’ hla chang tawp ber hi lo ngaithla nawn leh la ka va duh em!

If I'll keep looking to the father
He'll keep my head above the water
While the Smoky Mountains memories keep me strong

-Jeffrey-apa 290820111605

 
notes-Hmel en aia lungleng thei phian tih takah ka lung len chang apianga hun leh hmun pawh ngaihtuah lem lo a message emaw call emaw-a ka chhut ngam ka pa aka Jeffrey-a pa a lo awm kher hi ka va’n vannei em! He hla hian min ti tap fo a hemi zan pawh hian ka mittui a tla nasa hle, chutih kara ka lunglen hnem tura thumawi hmanga min hnem thin tu Jeffrey-a pa I chungah ka lawm tak meuh meuh a, Pathianin min hruai ang a, heng lunglenna zawng zawng te hi kan nun thawnthu ngaihnawm a la ni ang tih ka ring tlat a ni. A thute khi ka chhiar a, ka mittui a tla a, ka chhiar nawn leh a, ka mittui a la tla fo, chhiar nin ni reng ka nei thei dawn lo a nih hi! ka lawm e ka pa!

2 comments:

  1. Lunglenna hi ka tlachham ta! Mi chawmawlh ka ni em niang ? I ziak ngaihnawm e.

    ReplyDelete