i duh zawng chhin la

Wednesday, May 16, 2012

LUNGHLU

'Lunghlu chu a thap a nia' ti a an sawi kan hre fo thin. He thuin a sawi tum tak chu mifel leh tha nia kan ngaih lem loh, pawnlam landana eng vak nia lang lo mahse chhungrila thatna thuhruk tam tak awm si te hi an ni


Mi thenkhat chu midang thatna leh mawina inthukru an hmuthei em em a,mahse chu lunghlu nawtmama,a thalai lachhuak tur erawh chuan tihngaihna an hre der lo thung si. Mi thenkhat ve thung erawh chuan chutiang thil inthukru chu an hmu hauh lo thung. Mi tlemte tak takin midangte thatna lai hmuha chawikan an thiam a, a tam zawkte erawh chuan tihngaihna kan hre ve hauh lo mai niloin an thatna kan hmuhhmaih fo ve thung a ni. Engtin nge midang thatlohna lai kan chawikan sak ang? Engtin nge chu thatna leh mawina,an chhungrila inthukru chu kan lakchhuah ang a,an nuna bet tlat emaw tih hial tur khawpa nghetin engtin nge an nunah lung kan phun sak ang?



Thei tlemte awm mahse chung theihote pawh chuan mi zawng zawng chunga ti turin an thei vek em? A teuh lo. Pathian chuan a thei asin. Chu lai tak chu a ni kan Pa vana mi Pathian bikzia na chu! Hriatchiana fiah leh zual i duh pawh a ni maithei, a hnathawk tura a thlanchhuah leh a ruat, bible-a kan hmuh hote pawh a tam zawk kha a tirah chuan lunghlu chherloh ang mai asin an nih. Pawnlam landana mi tlaktlailo leh rothap hmel tak tak,tangkaina leh pawimawhna neih hmel lemloh mahse chhungrila an thatna lai a lakchhuah sakte an ni hlawm. 


Mosia kha Pharoah hnenah thu sawi tura thu pek a ni a mahse a dang a awk thung si, lal Davida kha lal tura hriak thih a nih lai khan beram vengtu naupang mai a la ni a,an chhungkuaah a pawimawhna a nep hlein a thawhhlawklo hle ang tih a hriat a, Isua nu mari pawh Isua a pai dawn a ni tih hrilh a nih lai khan nula retheite a ni ve tho a ni.


Heng ho zawng zawng kan sawi takte hi an hunlaia midang ngaihven leh ngaihsak hlawh lemlo an ni. Chutiang bawk chuan nangpawh ngaihsak leh ngaihven hlawh tawk lo niin i inhre thin a ni maithei mahse hei hi hre reng ang che 'Pathianin a ngaihsak che' tih hi! Thil dang zawng zawng aiin chhungril a pawimawh ber a,Ngaihven tlakloh nia inhriate leh mi tlawmte hnenah hian a ni Pathian inpuanna thinna chu. Mi inngaitlawmte hi an ni Lalpa'n a ngaihven chu!


Hun kaltawh duhawmlo tak tak i nei a ni thei, tuna i dinhmun avang khan i inhmu hniam ngawih ngawih pawh a ni thei a, chin dawklak thalo emaw ngawlvei tlat i nei pawh a ni thei, hnehtheihloh leh bansan theihloh nia i hriat harsatna engngemawniin a tlakbuak chein i inhria pawh a ni thei a, harsatna leh manganna Pathian hnena thlen senloh khawp nia i hriat i nei pawh a ni thei,harsatna te tham tak mahse i nun khawih pawi thei nia i hriat si i nei pawh a ni thei, thlen rawh A hnenah. Pathian hnena thlen tur harsatna leh manganna te lua leh lian lua a awm lo. Lalpa tan harsatna lian engmah a awm lo.


I buai hle a hun i nei tlem hle a nih pawhin i hun reilote tal kha Pathianin a hmangaihna che nasatzia ngaihtuah nan han hmang chhin teh! I mawilohna leh i duhawmlohna kara i thinlung leh i chhungril mawina kha a hmu tlat a,i thatna kha chawikan sak che a i nunah thatna lung nghet tak phun sak che a duh asin.


Pathianin i tan ruat a nei a, i tan thil tum pawh a nei a ni tih ngaihtuah chungin i nitin hun hmang la,i chhungril thatna leh mawina inthukru chu lakchhuah sak chein a chawikang ngei ang che.


I tawngtaina tur:

1.Pathianin a hmangaih che avangin

2.i nuna Pathian thiltum hrechiang tur leh a ruahmanna ti hlawh tlingtu i nih theih nan







msi@rose

4 comments:

  1. U,a van tha em......... comment dan vak pawh ka hre lo....... min ti thar....eng emaw tiin....

    tluangte Lushai

    ReplyDelete
  2. mate ka lawm e aw..tupaw'n hlutna kan nei a, kan hlutna chu tuemaw chuan min phochhuah sak a chak em em si a...

    ReplyDelete
  3. Replies
    1. ka lawm e zobawm ka blogah i lo leng lut ang..hlu zel ang

      Delete