THAMAM

Thamam :

Chu pa chuan chu nu chu a hre ngai hauh lo a, a piang ve a ni tih pawh a hre ngai hek lo. Hmeichhe rilru chak leh thil hriat belh chak reng chi a nih avangin lehkhabu a chhiar kual nasain chanchinbu te nen lam a bihkim hle thin. Chutia chanchinbu hrang hrang a bih lai chuan a hna thawhna hmuna eng eng emaw thil thleng avanga harsatna tawk chanchin a chhiar chuan a mit a la hle a, chupa chu tunge a nih tih a chhui char char hial a, reife a beih hnu pawh chuan a awmna hmun leh boruakin in zir miau hek lo; thil pahnih khat bak hriatbelh a nei chuang lem hlei lo. Chupa nih dan tur leh engnge a nih a, tunge a nih tih chu ngaihruatnain lunglen a hril chang chang an tih ang mai hian ngaihruatna bak han fiahtu a nei lo a, hre reng lo mahse a theihnghilh ngai hauh lo thung.  A hnathawh chungchangte chu hriatbelh em em neilo mahse a rilru a luah tlat reng a, sawichhuah lohin engtik thleng upbo thei ang maw tiin a rilru a insual reng thin. Kum chuang fe a ngawihbopui takah chuan sawichhuahloh na na na chu rilru paw’n a  lo theihghilh ve tial tial a niang ,a hnaah a buai bawk nen,thildang inhambuaina a ngah bawk nen, chu rilru – tuemaw laka a rilru leh a thinlung chu tlem te te a nawhrehin a lo awm tial tial ta a ni.

Hun a kal a, naktuk pawh nimin a lo ni zel thin ang hian chunu pawh chu tuemaw a nih tumna kawng lam pan chuan hah takin a kal tauh tauh a, tuemaw-mituemawina tuemaw tia an sawi fo thin ang  chu a nita  meuh mai. A hriatloh hlain thla a ral a, a hriatloh bawkin kum a ral a, hun chuan hrilhlawklo mahse khawi hun emawah a kal pui a, hman hun a kir leh ngai tawhlo turin hun chuan khawi hun emawah a kalpui a, a cham hlen tir bawk. Chung hun zawng zawngah chuan chunu chuan chupa chu a theihnghilh ngai reng reng lo a, a hre reng lo mai pawh a!

Chupa chuan chunu chu tunge a nih tih a hre lo a, a piang ve a ni tih pawh a hre hek lo. Mi rama awm a nih angin thian han kawm fal tur leh han titi pui tur a nei lo a, a neih chhun lah chuan a kalsan tawh si. Chunu chuan chupa chu a ngaihtuah reng a, a theihnghilh ngailo a ni tih a hre lo a, han hrilhhretu a nei lo a, hrilh hre tu tur awm ang tumah lah hriat a nei hek lo. Chuti chuan chuan a hna chu hlim takin a thawk a, engtikah emaw chuan kawl a eng ve mahna tih rilrua hisap reng chungin ni a hmang liam thin. A hlimna chu thil lian tham leh tuemaw neih phakloh a neihnaah chuan a ni lo a, a kianga mi tuemawin chanchintha an hriat tluka hlimna nasa aneihna tur a hriatloh avangin a khawvel zimte atang chuan hlimna te reuh te te a lang mahse lian takte chu a chharkhawm nghauh nghauh thin.

 Chung hun zawg zawng a liam tak hnu chuan tuemaw nuna thilthleng duhawm berte zinga mi a la ni ang tih reng reng a ngaihtuah lo a, chu nun nunpuitu chu a laka hla taka dah a ni nachungin thinlung thunawi hnaivai taka chharkhawmtu ani si a, chung zawng zawng karah chuan hei hi a hai ngai lo -engtin tin emaw iintawng tur hi chu an intawng ve leh nawlh zel

Vangkhua leh nang ngai reng reng:

Kum tam ala liam hmain chunu leh chupa chu engtin emaw an inhre ta hlauh mai a, chupa rilruah chuan reife chu chu chuan engmah thil bik a thlen lo a, a hna a tibuai lo a, a nunphung pawh a ti khaihlak hek lo. A kiangah chuan mi pangngai a ni a, a lakah chuan chunu pawh chu mi pangngai ang  a ni. A kianga awm ve mi tam tak nen chuan an hlutna a danglam lo a, a tan mi bik a nihna a hre hek lo. Chunu ah chuan engnge maw tak a awm a ni tih erawh a hai lo a, a hre tak tak duhlo pawh a ni lo a, a hun kal tawhte avangin a pawm ngamlo mai zawk a ni.

“I biak theih em aw”

A chhanna a nghak a, a nghakchhuak zo dawn lo emaw atih hnuah

“aw bawihi ka biak theih e, ka kalsan lai lo ni a,enge ni ta?”

“I dam em?”

Thil tam tak sawi a duh a, mahse sawina hun leh hmun a ni lo tih a hriat avangin hmana mi kha hman ang thovin a up bo leh ta! Zante hian thudik chu a thuppui a, chhun lahin nawr chhuah sak a tum teuh si lo, chuti chung chuan hlimna a zawng a, chupa chuan chunu lakah chuan thil hlu hmuh a tum lo a, chunu lah chuan a lunghlu te chu a lachhuak ngamsi lo. A kal zel a,chupa chuan chunu a  hriat hnu fe ah chuan chunu nun chu chupa chuan a hre danglam ta hawk si a

Chunu ang mai chuan chupa chu mi lungleng thei tak a ni a, a hawi vel a, engkim mai hian a lung a len thin. Zing nichhuak eng mawi sar te chuan an lung a len a, chutiangin chhun nisensa tak maite chu phurrit niloin an lung ti leng tu a ni a, tuemaw tana lirthei ri luai luai manganthlak na hreloin an lung ti leng tu a ni a, zan pawhin a hlutna a hai hial emaw tih tur khawpin chu’ngte chuan an lung a len thin. An pian leh seilenna hmuna awm lo ve ve an ni a, engtikah emaw chuan an la intawng leh ngei ang tih an hre hek lo. Ni e, anni chu an inngai a, mahse hrilhin an awm si lo. An inthlahlel a chupawh tumah rengin an hre si lo. An intawng tawh ngei alawm.

A kotu kohna a nat em avangin hmun khata awm thei an ni lo a, nunin tuemaw a sawp kual reng mai ang hian sawp kualin an awm a, an chhungte an thlakhlelh leh an ngaih em em, an kiangah awm se an tih ngawih ngawih te pawh hla takah an awm a, hrehawm ti thei an ni der si lo. Khawi ram emaw duh leh mamawh chitin reng awmna, tlang leh phairuam te pawh mihring theihnain a tlin thlenga mawia an cheina hmun ai chuan mahni seilenna ngei hmun awng rip rep leh kawtkai khu chelh chawlh pawh a ngaihawm zawk daih tih hrechiang ve ve an ni bawk a, ram ro rip rep leh chhengchhe tak ni mahse an seilenna hmun chuan an lung a len fo thin. Lunglenna zawng zawngah an chhungte kianga awmlo an nih piah lama an duhtak kianga awmlo an nihna chuan na takin nitin a chhun thin a, ngawi renga tawrh tlawk tlawk loh chu tih theih dang an nei hek lo. Nia, nakinah chuan tuemaw angin a kiangah a duh ber chu a la awm ang a, hlimna chhete te leh lungngaihna lian tham tham tak tak pawh a huai takin a hmachhawn ang a, engkim mai chu mawlsawmna a ni emaw a la ti ve ngei ang tih ngaihtuahna chuan an nun chu a la khalh ding hram hram a, beiseina-nun ti kaltu chu a ni an hmachhuan reng ni.

Hlim leh lawma intawnga’n:  

Hun hlutna hi tuin nge teh fuh ang? Hun chuan hun kalna a hria a, chu hun vek chuan a ni hun lo la kal tur rawn hruai thleng leh thin chu. Tuemaw tehna atang chuan kha hun reilote khan hlutna a nei lo a, tehchhuah chu sawi loh teh enah pawh a en lo a nih kha. Hun hlutna te hi a reilam ni lo in a hmangtu hmandan a zir a ni tih an hrechiang ta bawk a, kha hun kha an tan chuan hun hlu tak a ni reng bawk. Chupa tehna atang chuan kha hun reilo te an hman kha a hlutna a sang ve angem tih a inzawt fo thin a, chunnu chuan a tehna atanga a hlutna zat lah a hrechiang si. Hun reilote pawh nise damchhung a hriatreng tlak khawp a hlu leh nun ti nuam chatuan tu a ni thei a, chutiangin eng anga rei pawh ni se hriat reng tlakloha liam tir lah a har hek lo. Kha hun rei lo te kha an tan chuan a hluin an nun ti kaltu a ni tlat si.

Khatih hunlai khan nakinah chuan kha hun ngei kha ngaihtuahin bawkhupin an la tahpui dawn a ni tih an hre lo a, engin nge an thinlung na chu zawm leh ang tih ngaihtuahin hun an la hmang reng dawn a ni tih lah an hre si lo.

Chawhma dar 11 a  kawngkhara lo ding chuan chunu nuna thil tam tak kaldan a tidanglam dawn a ni tih a inhria a, kawngkhar var lo hawn saktu pawh chuan a hnar teuh si lo. Chupa chu midang te hmuh chuan mi lian a ni lo a mahse chunu lakah chuan milian ber a ni  si a, lang thei ropuina aia duhawm a thinlung duhawmna a hriatsak miau avangin. Chupa lakah chuan chunu chu  hmeichhe duhawm ber a ni thin a, a hlimna siam sak thintu pawh a ni teh meuh mai.

Thamam tuanna tlang a lo dang a:-  

Mi tuemaw te ang bawkin inthlahlel eng ang mah se auh mai phaka la awm thei an ni lo a, hunin  ala phal sak miau si loh avangin. Hun reilote chuan an nun thawnthu a her danglam sak tih lah an hre chiang dun si mahse engtin nge an tih tak ang?. Tuemaw angin inkhata inauh phak maia han leu vel der der chu an chak a, lawmna chhete an neih pawh bengbula phun ser ser chunga inhrilh theih an chak a, harsatna lah nise inkai rial chunga tawn tlang dun an thlahlel lo bik lo mahse le hunin a la phalsak miau si loh avangin an tuanna mual pan chuan an kal ta a, an intheihnghilh ngai reng reng lo. An taksa chu inhlat mah se an thinlung a inhnaih a, inhlata an lan poh leh an inhnaih si a. Chupa chuan chunu chu nitin a  hnaih zual zel a, hlat duhna rilru a pu ngailo a ni mai lo a, chunu hnaih thei ang bera awm dan a ngaihtuah thin.

Chungkawlno iang thla pu ila :

Hun chuan an taksa a pawt hrang a, an rilru erawh a pawt hrang chuang lo. Pawh hran chu a teuh lo, an awmdun lai aiin an inthlahlelin an in ngaina a, an inpawh zawk emaw tih hial tur zawk an ni a,  tumah lah reng chuan an hre ve si lo. Taksa inhlat takin; rilru inhlat lo takin an awm a, rilruin taksa a thunun miau avangin chu tawrhna chu an tan chuan tawrhna rapthlak aia a nasat loh bikna a awm lo. Eng hun pawh nise an inhre reng lo a nih pawhin an in theihnghilh ngai teuh si lo a, lui dam taka aluang a, a infinkhawmna hmun ngawi renga a pan ang mai hian chumite chuan “nakinah chuan” tia beiseina inpein ngawi rengin an tuar tlawk tlawk a, phun lovin chu beiseina chuan a khalh a, na mahse thlahleltu thlakhlelhna chu an inhriatchian sak em avangin an phun lo.

Hlimna chu kalsan an tum lo a mahse hlimna chuan an banphak aia hnaiah a dah si lo a, chu chauh pawh chu beiseina nen tiin an ban tawk tawk a, lungleng eng ang mahse hunin a phal hun tur nghakin nitin nun an chhiar a, chung zawng zawngah chuan an inhlat ngai lo. Tuemaw angin in khatah cheng lo mahse chupa chu chunu chuan thenawmpa dinhmun ang tal chang pha se, thli khatin chhem se, ruah mal far khatin far se, tlai ni nem hun inangah awm se tiin duhthu a sam thin a, duhthu a sam nasat poh leh mel sang chuanga awm chupa chuan an thenawmpa dinhmun tal pawh a chelh pha dawn lo tih a hre chiang si a, a hriatchianna lah chuan chu duhthusam duhtu thinlung chu a ti danglam teuh si lo.

Zan khua rei reng dawn zo lova:  

Zing thawh veleh an biakhlatna an en a, tuemaw nen zan hmasa lama an inbiakna hnu an chhui a, hmuhtheih ho an enkim an dap hnuah ngawi rengin hmuh theihloh te an ngaihtuah leh a, engnge hlim pui tlak awm tih an ngaihtuah hman lo a, engkim mai chuan hlimna a pek avangin. Zing atanga tlai thlengin, zan atanga zan khawtairek thlengin lunglenna chuan a kiamsan ngai lo. Zanlai eng anga reiah pawh harh mahse an rilrua awm hmasa ber leh a hnuhnung ber chu tuemaw mel sang tam taka awm an ngaih ngawih ngawih leh a duh ngawih ngawih a ni tih lah an hrechiang ropui si. Zing kara an in ngaih ngawih ngawih, an thangharh veleha an hriatchhuah thin kha zanaa mut hma pawha an rilru luah hnuhnung bertu a ni a, an lak atanga hla taka awm tluka hlauh chu a nei ngai lo! Zanlai pelh hret tawhah chuan a phone a lo ri a,ngawi renga en hnu chuan he thu hi a lo inziak a

“he zan rei tawh takah hian ka hre reng che” chu thutawite chuan an thinlungah thu a va’n sawi hnem em! Chumite chuan an tan tumah an dah lo a, an beisei bawk hek lo.Inhlat takin khawvelah a pahnih chauhin chu thu chu a inhrilhtawn tih an inhria a, vana ngawi renga leng delh delh chhum zam chekte ang maiin ngawi rengin hlim tak chung siin an tawn tawn khawvel chu an chen thin! Ni e, hmangaihna leh duhna chuan hun a sawi lo a, mel tam zat a chhiar zo hek lo. Engtik lai pawh hi hmangaihthu inhrilh hun a ni a, an inngai takzet a ni tih inhrilh hunlo lah a awm lo.

Awih lai perhkhuang tingtang

Rimawi mawina ber chu a ngaithlatu beng a ni. Chu benga a mawina tluk zeta mawi tur chuan tuemaw hnenah chuan beihfe a ngai ang. Rimawi chuan chumite nun chu a kaihruai a, chu rimawi vek chuan an tan thu a sawi a, an sawi ngamlohte pawh rimawi hmang chuan an sawi thin. Khawvel mihring heti zat lo piang tawh leh liam tawh te, la chenga nun duhtawka hmang mekte zingah hian chumite hun tawn ang leh an rilru ang lo pu tawh tuemaw thu leh hla thiamin a phuahchhuah te chu an tan a phuah leh ziah chhuah reng a ni emaw tih hial theih khawpin chu rimawi hmang chuan an inawm tlei a, a tan a pe a, apetu chuan vawi tam tak a pe let bawk thin.

Rimawi mawina chu a tehtu atang chauhin a mawizia a hriat thin. A tana a aw mawi tak hriat ringawt pawh thlakhlelh awm em em kha rimawi mawi eltiang, tehchhuah zawh rualloh a ni a, a ni zel bawk thin. An aw inhre tawn tawh ngailo mahse chu rimawi chu khawiah emaw hun chuan a dahthat sak a, mi zawng zawng tana ral theilo rimawi tak ang maiin chu rimawi chu boruakah a leng vel a, hmana a ngaithlatu thinlung atang chuan a mawina a la bo chuang lo.

Tinkim ka dawn khawl:

Hmanah khan chupa leh chunu chu an hlimve ngei thin alawm. An tan chuan zan a rei poh leh lunglen tizualtu a ni a, inhnaiha an inhriat poh leh an inhlat zia tichiangtu a ni tih an hre thin si a. Darkar khat chhungin sawi tur an haihchham lo a, darkar thum pawh se se thu inhrilh tawn nan hmang mah se an ning chuang lo. A mamawh hote atanga a duh thlengin chunu chuan a hrilh a, chupa pawh chuan a zep bik chuang lo. Ngawi rengin minute tam tak awm mahse tuge biak pawhna lehlamah awm tih an inhriat tawn avangin an lungngai lo a, hun reh tak mah ni se an thinlungah chuan a bengchheng a, a reh poh leh a ri a ring ting mai thin kha  a ni si a. Hun tin maite chuan hun hlutna  a ti zual a, thawnthu a ti sei a, lungchhiatthlak eng ang mahse a ti ngaihnawm telh telh si.

Dawn ve thin che maw?:

Kan hriatnaa awm tam takte chu kan upbo a, kan nuna thusawi lemlo hun kan hman zawh takte chu a hnu lawkah theihnghilhin a awm leh mai thin. Chutiang bawkin anni pawhin an nuna thil thleng tam tak te an theihnghilh a, chung zawng zawng zingah chuan hun reilo te chhunga an nun sawi danglam vek khawpa hunin a hruaina hmun chu kum dawn a liam hnu pawhin an la fang dun a, chu hunah chuan ngaihruatnain hruai kirleh an ni fo thin. Chupa rilruah chuan thil tam tak a awm a, a hna atanga ama nun kal chhoh dan thlengin, a sir kilah erawh chunu chu a cham reng thin. Hun inang lo tak leh khawsak phung inang lo tak an ni nachungin an rilru kil chuan tuemaw chu a hre reng a, an hriat reng mihring chuan a lo hre ve reng em tih zawhna an inzawt hman lo, a nawrtu a nat em avangin. Ngaihtuahna angin mi chu a che chuak fo thin ang bawkin chupa chuan a ngaihtuahnaa chunu hre reng chung chuan thil tam tak a hrilh a, a kianga awm reng ang mai a nih thute chu vawi tam tak a sawi thin.

Chunu ngawihtuahna kil khata hmun lo chang ve chupa chuan kil khat chauh chang mahse chu nu thinlung atang chuan laksawn leh paihbo a ni ngai lo a, an hun hman tak zawng zawng te a hre reng thin. Mi tuemaw chuan a nun sawi danglam vektu hun pawh a then a hriat theih tawh loh laiin chumite chuan theihnghilh a hnekin an hre reng a, a tir atanga a tawp thlengin hmaih awmloin an rilru chuan a la vawng reng a, an damchhunga an thinlung pheka inziak tawh tur a nih avangin. Mihring pahnih ngaihtuahna hrang, mize hrang leh duh hrang, thuhmun awmlo emaw tih mai tur mahni se ngaihtuahna lui khatah an luang a, chu luia luang dun chung chuan chung ngaihtuahna hrang hrang te, an thinlung thunawi hrang hrangte chu an infawmkhawm sak tawn em tih erawh an in zawhna lian ber a ni thung si.

Tapin luaithli ka lo nul maw

Chunu tan chuan tah hi a ngunhnam a ni a, a chakna a ni. Hmeichhe hlim thei tak a ni a mahse amah maia aawmchang chuan vawi tam tak a tap thin. A tahna mittui te chuan beiseina a siam sak fo a, hlim tak anga lan tum thin mahse amah chauha aawm chuan lemchan nun chu a kalsan chiang hle thin. A mittuite chu a thlawn lovang tih rinna nen chupa tawn tirhah chuan a tap a, a kianga awm laiin a tap a, mel tam tak a hlaah pawh a la chuti fan zel. A kianga a awmlohh avangin mak ngawih ngawihin a inhria a, chutah chuan a mittui bawk chu a chak nan a hmang thin. A mawh love hmeichhe hnena ngunhnam pek chu a thlawna bang kila a tar mai mai bik loh avang chuan. A lak atanga hla taka awm tum a ni tih a haider fo a, chu haiderna chuan vawi tam tak a mittui a ko chhuak a, a hnen ata kalsawn tum si lo a hla taka awm ta tan chuan a mittui chu a seng teh meuh mai, mahse tumah rengin hruk hul sak an tum si lo.

Chupa chuan chunu hre reng thin a mahse a thinlung kil khat ata lak chhuah hret hret a tum a, zawi zawia kalsan tum mahse hun chuan hun hlui bawk a rawn her lum leh thin. Dawhkanah a thlalak a dah a, a bia a, chu hlimthla chauh tal pawh chu tiin thu tam tak a hrilh a, a nui a, a tap thin. Chung hun lai chuan minung pakhat awm mahse thinlung pahnih a awm tlat a, a hnen ata hla taka awm chunu hlimthla chu vawi tam tak a tahpui thin si a. Chunu avanga patling meuhin a mittui a sen tawh zawng zawng chu haider sak a ni a, chu chuan a ti na fo a, a natna atanga kalsawn a tum avangin a aw chauh pawh hriat a thlakhlelh em em thin lak ata zawi zawia kalbo a tum ta a, chu chuan a mittui a ko chhuak fo thin.

Hlim leh lawma intawngin :

An hriatna leh an duhna te chuan an nun  khawiah emaw a hruai kual a, chu pa nun ngei pawh chu vawi tam tak sawr fu sakin a awm a, chu nu pawh chutiang bawkin. Hlimna chhinchhiahna a ni tih hriat fahrana nui hmel hmana lo chhawntu kha a tan a ni a, tuma’n an laksak thiang lo. Kha hlimna haitheihloh luangliam kha awm reng tur a ni lo tih hre mahse an haider a. lungngaihna avanga an kun hunah an la hrechuak fo dawn a ni tih lah an hre der si lo. A ni taka, an intawn nia hlimna kha a ni an hmanlai thawnthu tingaihnawm tu tur chu. Hlimna hi vawikhat neih a niha cham reng leh chatuan daih nise zawng hlimna hlutzia chhutchhuak thei an awm lo ang. Lungngaihna pawh chatuan daihin –lungngaihna nichhuak beiseina awm lo ni ngat se zawng hlimna hlutzia teh nan an hmang fo awm si lo a. Kha hlimna chhete an neih khan an thawnthu a tih ngaihnawm phah bik lo a, an lungngaihna lah chuan a lo chuti bawk. An nun kalchho zel avanga an tawrh zawng zawng chuan dam reng ta na na chu engtik niah emaw chuan hunin a la hruaikhawm leh ngei ang, mahse zalenna pek a nih avanga zalenna petu thinlung nat tawhna chuan hlim tak leh lawm takin hruaikhawmna hmun chu a thleng thei ngut ange maw?

A cham reng si thinlai ah:

Hriat reng an duhte an theihnghilh fo a, an theihnghilh fo avanga an ke pen a phelh tak nawk nawk chang lan a tam. Rilruin hriatreng a duh te hrereng thei mang si lo a theihnghilh hmin hmiah a duhte hriat reng theihna hian an nun chu a vaw let fo a, sawisela phunin khup zawi hnawkin tap tlawk tlawk mahse a sawt si lo.Nunin a sawp ang angin an kun a, chung hun zawng zawngah chuan an hun hman tak te kha an hre reng a, an theihnghilh ngai reng reng lo.

Hmanah khan chunu thinlungah chuan chupa chu a awm reng thin a, atheihnghilh ngai reng reng lo. Chupa rilruah pawh chuan chu nu chu a awm reng a, ani pawhin a theihnghilh lo mai a ni lo a, a hre reng thin. Kalsan tura thutlukna a siam lai pawh chuan a hre reng a, zalenna mamawh ngawih ngawih nia a inhriat lai pawh chuan a theihnghilh ngai reng reng lo. Zalenna petuin engtikah nge a pek ang tih ngaihtuah reng chungin a nun a hmang chho mawp mawp mai a ni.

Chupa hnena zalenna pek a nih hnu pawh chuan an in theihnghilh ngai lo a ni tih an lantir leh zauh thin. Hun tawite mahse hlu tak khan an nunah hruihrual nghet takin a suih sak a, tuemaw ninhlei leh thawleng phelhsak mai mai theih lah a ni hek lo. Inhretawn leh inmamawh tawn loin an nuna kum tam tak lo hmang tawh mahse intawng tura ruat an nihna angin an hun hman dun chhun chhun ang te chu an hre reng a, chu hunah ngei chuan an la cheng fo a, a tak ram erawh an thleng leh ngai dawn tawh si lo.

Mahten lunglen ni ka chhiar:

Amah maia a awm lai khan lunglen chu tih thanah a nei tawh a, sim chi a ni lo a ni tih lah a hmu chiang tawh. Mi a nileng lo tan chuan zalenna duh mihring chu hmuhhmaih theih rual a ni lo a, a tanna hruihrual pawt chattu nih lah chu a ngam bik mai si lo. Zalenna hi zalenna pek hnenah pek a ni tih hrilh a nih loh chuan  zalen a ni tih a inhre lo a, zalenna petu chuan zalenna a pek hnua a thinlung natna chu tunge sawi fiah sak thiam teh lul ang? Mahse zalena chuan a tanna atanga chhuak loin a thlawnin hrehawm a tuar fo thin angin chunu chuan chupa tanna ata chu zalenna a pe ngei alawm mahse zalen a duh a ni tih hrilhin a la awm lo a, sawi ngailoin a hriat reng si. Pawi a ti lo, sawi khera zalenna chu chiang mahse sawiloha zalenna chu mifing pangngai tan chuan hai rual a ni si lo. Chu zalenna chuan lunglenna namailo a thlen a, chumite tan chuan zalenna lawmawm niloin zalenna nghaisatu leh nun sawp chautu a ni si a. Amah maia chu lunglenna sukiangtu nih a duh lo a mahse duhthlang thei dinhmunah a ding si lo. A sawi duh tam tak a sawi takloh te, a tih duh tam tak a tih takloh te chuan inchhirna leh lunglenna khatliam a dawt tir a, phai a hnekin a liam a nasa poh si; a siamtu ngei pawh chu a nawr phah fo thin. A hawi vel a, engkim mai chu a lunglentu a ni. Hmana zing thiang tak kara hmangaihna thu a chhiar hun a ngaihtuah a, a na a, chhun nisensat laia tuemawa ngaih veng veng hun leh tuemawin a lo ngaih let ve veng veng hun a hrechhuak a, chhunsawk ang a ni. Tlai a lo ni a, a telloa a thlir fo kawla no takmaia ni liam thla ruai ruai chuan a thinlung a lunglenna leh a kianga awm veloa ngaih em em, a lak atanga hla taka kalbo ta chu a hnen atangin a liampui thei teuh si lo. Zan a lo ni a, van thiang kak hnuaiah hla taka awm mahse a hnaih em em thinin tui taka mu tura a duh thu a rawn hrilh lai a hrechhuak a, engkim mai chuan a lunglen a ni.

A lak ata kalbo turin a dah ngai lo a, a dah phal hek lo. Nunin duhthlanna min pe lo mahse thawh theih kan neih ve chhun te thawh a nih loh avanga sawp kuala a awm naah a vui a,mahse a phun ngam si lo. Tuemaw a nunna kawltu hnenah chuan vawi tam tak ani peka awm avangin lawmthu a sawi thin a, khang lawmna te kha’n eng thil ropui nge a thlen tak le? Tah hi hlimchhuah a lo ni takzet a ni tih a hriatchianna chuan a hlimna chu anchhia a hlawh tir a, lungngai a kun erawh a tum hauh lo. Lunglen tak tein lungleng mahse an lunglenna hrilh hriata awm lo mi khawngaihtlak eltiang pahnih mi te tan chunu leh chupa chuan van an en a “Thamam” tiin an phun sep a.

msi@rose