YOU STILL MOVE ME-DAN SEALS

Bazaar a chawhmeh lei lai chu ka thlir reng a, engngemaw tak chuan min mawlh chiang a ni tih ka hria a, engnge min mawlh tu erawh ka hre lem hlei lo. Chutia ka thlir reng hnu chuan chawhmeh zuartunu chuan ka duhve emaw a ti a ni ang e, beisei deuha min en avang pawh ni chuang lo chuan chulaiah chuan ka phei a, ani erawh chuan min hmu awm pawha a awm loh avangin amah ka va pan phei pawh chu engteh ualah a ngailo aniang chu ngawi rengin a chawhmeh lei chu a ipteah a dah lut a, a kal sawn ta daih a, kei lah chuan ngaihtuah chiang mang loin a chawhmeh lei ang kher ka lei a, a chhan lah chu ka hrechiang ropui si. Chawhmeh zawng zawnga ka ngainat loh ber chu engvanga lei nge ka nih tih ka nupui chuan hre kher lo mahse ka thinlungah chuan chiang takin a inziak a, ka ei duhloh mah ni se tuemaw ta ang a nih avang ringawt pawh chuan ka tan a hlu a ni.

Thil tam tak ka ngaihtuahnaah a lo lut zut zut a. Diki nen hian tleirawl te kan nih laia iintawng kan nih avangin kan inkawmngeih hle bawk a, ka ngaihzawng hmasa ber a ni lo nachungin ka ngainain ka hmangaih hle a ni tih chu ka hai hauh lo. Hmeltha tak tia sawi tur a ni lo a mahse a nun a mawiin mi zawng zawng hian an ngaina emaw chu aw tih theih a ni. A fuihna avang liau liain pawl sawmpahnih ka pass a, hna thawh mai ka duh tawh zawk laiin a fuihna avang liau liauin tun dinhmun ka thleng thei a ni tih pawh chiang takin ka hria. Tleirawl sual nei rual kan nih lai leh ka nun pawlawh lai zawng zawng pawha min fuihtu chu amah bawk a ni a, puitlinna lam ka panna kawnga min khaidingtu ber chu Diki hi a ni. Ani hi tawnglo ta ila chuan tun dinhmun hi ka thleng angem aw ka ti vawng vawng thin. Ka tana a hlut em avang chuan hlat aiin hnaih lam ka pan a, kum ruk tal tap kan inzui chhung khan ka lak atangin lakbo a ni ang tih hi ka ngaihtuahnaah pawh a awm pha ngai lo.

Veng khat kan nihloh avangin kan inhmu reng thei lo a, chutah kei aia pawl sang zawk a ni bawk a, a pa hnathawh avangin khawdangah sawn an la ni zui. Na in ngai thei hle mah ila mahni nun leh khawsak dana thu neitu kan la nihloh miau avangin dan theih ni hek lo, nu leh pa te’n min pawhna lam lamah kan then kual vel mai mai kha a nia. Kohran leh khawtlangahte inhman peih lemlo mah ila Diki nena kan chhuah ho theihna tur a nih phawt chuan tiin ka tel ve mai mai zel a, amah lah chuan tel ve law law chuan tha takin le ti chi a nih avangin mawhphurna tam tak pawh ka hlenchhuah phah fo bawk a, ka hriatloh laiin ka rilru sukthlek leh ka khawsa zia chuan puitlin lam a pan a, upa vak lo mahila mawhphurna tam tak ka koah nghah a ni a, tuemaw te tan chuan mi rawn tlak nih ka hlawh hma phian bawk.

Vanneihthlak taka pawl sawm pahnih ka pass hnu chuan kan veng primary sikul zirtirtu hna a ruak hlauh a, chhungkaw khawsa thei em em kan nih loh avangin hna thawh zawk ka thlang a; mahse diki ka hrilh chuan tha lo a tih leh zirzawm zawk chu a fuh zawk a rin thu min hrilh a, hna ka thawh chu a phalloh leh a remtihloh thu vawikhatmah min hrilh lo. Min fuih paha kawng tam tak min enpui lai chuan vanneihthlak takin medical colledge-a seat ka chan ve hlauh avangin MBBS zir tur chuan ka in pu thla ve ta lawp lawp ta. Ka zirlai pawh chuan ka theihnghilh ngai lo a, a ni Mizoram lamah a awm a kei phaiah, mahse kan inhlat ngai reng reng lo. Min fuih a, min zilh a, beiseina tam tak min pe a, ka rin phak bak aia thaa ka tihtheih zel avangin ka nuna chona tam tak pawh chu ka hmachhawn thei a, harsatna tam tak ka hneh phah ta bawk a ni.

Kan inngaihzawn chhung chuan ka thiannnu leh ka ngaihzawng a nih avangin ka ngaipawimawh a, ka nuna zirlai tam tak min petu a nih avangin ka zah a, a thu ka awih a, engkimah ka ngaihdan aiin a ngaihdan ka ngaichan hmasak ber a nih avangin ka chhungte mak tih pawh ka hlawh fo thin. Hmeichhia ni mah se kei aiin a puitling a, a fel a, a zahawm zawk avangin a phu ka ti a, duat leh zah a phu aia tlem ka pe mah zawk a, chuti chung chan vawi khatmah a phunnawi ngai lo. Kan nun kan hmang chho ve bek bek zel a, ka lak ata a hla ang tih ka rin ngailoh leh ka lak ata kalsawn tur pawha ka beiseiloh chuan min kalsan ta a nih chu!

Engvangin nge he’ng zawng zawng hi ka ngaihtuah chhuah leh tih pawh ka hre lo a, ka duh vang leh ka tum vang hrim hrima ngaihtuah chhuak ka nih loh avangin ka’n inthiam chawp te te a; minute rei lo chhung a kum sawm chuang liamtaa ka nun zawng zawng chuan min thawng let leh chu a mak ka ti letling hle mai.  A hunlai chuan engpawh hi chatuan daih emaw tiin hun lakah kan han pawngpaw inti thu ve ringawt a, a teuh si lo. Khuanuin a duan dan piahlama hun hman kan tum fo a mahse keimahni bawk chuan duan bak hmang thei kan nilo a ni tih kan inhriattir nawn leh thin. Hun hi a ding reng emaw kan tih chhung hian a lo kal duak duak a, a kal chak ta viaua kan hriat pawhin a kal chak chuang lo a, a mihring-a te rilru sukthlek ang ang hian hun nihna chu kan hmehbel ve leh pawp thin.

Bazaar chhawng hnihna veilama a peng ka hmuh avang chuan ka bazaar lai pawh chu ngaihsak chhunzawm chuang lo chuan ka va tei lut ve leh ringawt a, tih tur leh tih tum ka nei pawh a ni chuang lo. Chu hmunah chuan eng rauin nge min hruailut ka hria a mahse ka sawifiah mai thei bik si lo. Tuemaw hmana ka tana mi hlu tawp leh huatawmtak nia ka hriat,ka huat heih siloh leh ka nun kawng min sial saktu mi thianghlim ka zui a ni tih ka hria a, a dik ka ti bik lo mahse a nawrtu a na em a ti lo thei lo ka ni tih lah ka inhre kar si. A che vel leh a thil ti lai chu ka thlir reng a, min hmu awm pawha a lan loh avangin ka inngaihtuah chiang a, Patling kum 40 chuang, nupui fanau nei tawh lehnghal tih chi ni a ka hriat loh avangin ka inher a, kal mai ka tum ta a. Hawi let loin ka pen nghal ang tia rilru ka siam rauh rauh hnu chuan ka ke pen chuan hma lam a pan ngei alawm mahse engngemawni sawi fiah theih siloh hian min nawr a, ka hawi let leh hram. Chutia ka hawi let leh takah chuan ka mizui ngei chuan min lo hmu a, min biak pawh ka rin loh teh lul nen

“ubiak I dam em?’

“aw” tia chhan ka duh a ka tawngchhuak nghal thei mai lo. Ngawi rengin a mitmeng chu ka en a, ka tlangval laia ka rilru chiah chiah kha ka pu thar leh a, naupang leh ta riauin ka inhria a, ka thinlungah engngemawni lawmna a luang zawih zawih bawk. A ni chiah asin, thenawmpa, chhungkhat leh thiante’n a thinlung tak atanga “I dam em” min tih ai chuan mi tuemaw kan thinlunga tla na bik riau te’n a min kal pah “dam em” mai mai ringawt pawh hian thinlung hi a va han ti zangkhaiin rilru a va ti zuang tho thin em! A mitmeng chu chiang kek kawkin ka en a, inthiamlo hmel a pu tawh pawhin ka hre lo, thei leh thei lo chuan “ka dam e” ka’n ti bul nghut a. A nihna takah chuan amah chu eng khaw sawi set set lo a pawm a, kuah vawng vawng a, fawh mai ka duh zawk hial a ,ka tan chuan tih chi rual a ni si lo. Ka chhanna a bulh em avang chuan hmana a ze ngai bawk lo chhuakin min be zawm lo a, biak zawm pawh ka tum hek lo. A chhuah hnu chuan a kawr lei ang chiah chu kan nu tan ka’n lei ve leh ringawt a, ka lei chhan chu kan nu chuan hria se, a hak duhloh mai piahlamah ka chungah chuan a thin a rim ngei ang. Kan inkar thu tihchhiat ka duhloh avangin engkim hrilh tul ka ti lo a, hrilh ila chuan hrethiam tak leh rilru na tak chung pawhin min hnemin min thlem ngei ang tih lah chu ka hrechiang ngang si. Hetiang khawpa nupui fel leh fing, ka tana inpe zo ka nei hi ka phu lo a, amah avangin ka lawm a, ka nuna kimlo tam tak tikhattu a nih avangin a phurrit nih ka duh lo bawk a ni. Ngaihtuahna tam tak nena in ka thlen hnu chuan a dan pangngai bawkin kan nu chuan min lo be bawrh bawrh a mahse ni dang aia ka rilru ka pek loh avang chuan engngemaw a awm a ni tih a hrethiam chek aniang chu ngawirengin a hna chu a thawh chhunzawm mawlh mawlh a.

Ka hna ka zawmna a la reiloh avang leh min puitu tura ruat chawlh la a lo la haw loh avang chuan hlim tak leh phurna nasa tak nen ka hna chu ka thawk bawrh bawrh a mahse a va’n daih rei lo lulai em! Min puitu tur a ruat hna rawn zawm tuk tuk leh ah chuan thil danglam a thleng ta. Thla khat em pawh ka la awm hmaa engvanga ka hnathawhna atanga ban duh nge ka ni tih chu sawi lo mah ila kei leh Diki chauh chuan kan hria a, sawi chhuah chi lah a ni der si lo. Ka nupui pawh chuan mak min ti a, kan inhriat atanga a tih ngailoh ang takin thinrimna engngemaw a neihna chu a hmelah pawh a hai theih bik tawh lo. A hrelo tan chuan thil awm ang a ni lo ve reng bawk a ni. Tuna ka thawhnaah hian thla khat em pawh ka la thawk lo a, a hotu deuh ber ka nih avangin ka hna chu a hrehawm ka ti lo a, ka mawhphurna ka hlen thei lo pawh a ni lo. A buai a buaiin chhungkua kan inti fel zo deuh chiah bawk nen. A nihna takah chuan ka thawhna hmasa atang khan ka duhzawkna avangin kan nu remti chiahlo chung hetah ka insawn a, ka tihfuh loh ber pawl a ni awm e. Duh ni ila chuan chulai damdawiina thawk ho chu ka duh dan danin ka siksawi thei teh meuh mai mahse thil dik leh tha ber nia ka hriat loh avangin chulai hmun chhuahsan chu ka thlang ta zawk a ni.

Min puibawm tura ruat a nih avangin ka pindan chu min tawm ve mai a, ka thawh hmaa thawk tawh a nih avangin zeizia leh chetdan tam takah a thurawn ka lak a ngai a, hmana ka lak fo tawhna a nih avangin nuamlo pawh ka ti chuang lo. Ngawi rengin ka pindanah chuan kan thu a, kan hna kan thawk ve ve a, chawhnu tlai her tawh lamah phei chuan kan tih tur ve ve kan zawh hman tawh avangin kan thutnaah ve ve kan chawl a, khawvel hi a ngawi thuap emaw tih tur a ni; a reh hian a reh tlawk tlawk mai. Ka pindan bang darthlalang atang chuan khawpui mawi tak ding cham phei luah chu ngawirengin ka thlir a, sawi tur ka ngaihtuah a, mahse ka hre lo. Nidang chu nise midang awm ve bawk se chuan a tawng ring ber leh sawi hnem ber, nui hnem ber leh mi chawk phurtu berah ka tang leh ang mahse tunah chuan sawi tur ka hre lo a ni. Ka haihchham nazawng a ni lo a, ka hre lo hlawm tawp a ni. Sawi tur hre lo viau e tilo chuan rilruin kum tam tak a chhui let a, nundan tam tak leh ka hre tawh lo emaw ka tih ho te pawh an rawn inlar ang tuam tuam a. A nia sin, hun engngemaw theihnghilh emaw kan tih tawhte pawh hian a hunah chuan min la rawn thawng leh tho tho fo si. Chutia ngawi renga kan thut lai chuan kan naupan deuh laia a bengvar zawk bawk chu a bengvar zawkah a rawn tang leh a

“Ubiak thingpui in turin chhuak ila”

“aw” tih ka duh a mahse thil diklo a ni tih ka ngaihtuah chhuak thut a, ka dan ngaite bawk chuan chhuanlam dang siamin lehkhabu ka chhiar san ta daih zawk a. Ka lakah engnge maw beisei a nei leh a ni tih chu ka hai hauh lo mahse a theih tawh loh a ni. Theih nise chuan Diki hnenah hian sawi tur ka va’n ngah tak em!

Ka nupui pawh doctor ve tho a nih avangin kan thawhna ve ve chu kan inkal pawh fo a, hemi ni pawh hian ward lehlamah kan nu nen chuan damlo pakhat kan vil reng a ni. Chu damlo putar, a dam rei tawh dawnlo a ni tih hriat reng kiangah chuan kan ding dun a, engeng emaw sawiin kan phun a, kan nui leh hak thin. Nunna chunga thu kan neihloh zia leh kan dam leh damloh chungchanga thuneitu kan nihloh zia te hi a chiang hlein ka hre thar a, ka kianga ding reng, min ngaina a ni tih hriat taka min melh a min han hui leh zauh thin tu ka nupui, hmeichhe fel leh fing ka neih avang chuan ka lawm thar hle mai. Ka rilrua ka lawmzia leh ka vanneihzia ka inngaihtuah neuh neuh lai chuan chu damlo pindan kawngkhar zimtea inhawng kar atang chuan ka pindana Diki vei thauh thauh lai chu ka thlir reng a, kan nu ka melh leh a, hmel leh pianah te, lan dan mai ah chuan kan nu chu mi chhuanawm tak a ni reng reng lo mahse ka nat lai ber leh dam pawh thlahlel pha tawhlo khawpa beiseibo ka nih laia min chharchhuak a, min dawmkang a, min dawh tlauh tlauhtu, ka diklohna aia ka dikna hre theitu leh ka fellohna aia ka felna hre rei zawktu ka nupui chu kalsan thei ka ni lo.

Kan nu bulah chuan ngawi rengin ka thu a, pindan lehlama nula che tla pawh chu ka va melh leh pah zauh thin. Ka rilruin thil tam tak ka ngaihtuah a, ka hun lo hman tawh zawng zawngte leh ka nun kal chho vel zawng zawng nen. Tun ang hun falah hian ani chu tawng leh ilang chuan ka nupui fanau theihnghilh thak khawpin hun ka hmang ang a, hmana min kuah thintu ban chuan min kuah leh se chuan ka hlimna ka hloh tak zawng zawng pawh kha chhartharin a awm leh ngei ang. Ka kianga thu reng ka nupui ai chuan pindan lehlama che vel mek nu chu ka thlang zawk ngei a, a kianga awm ka thlahlel zawk a, ka damchhung hun pawh hman zawhpui ka chak zawk tih chu ka hre reng mai mahse min kalsan avanga ka tawrhna zawng zawng min tawrhpui a, chheltaka nun min hman tirtu ka nupui hian ka neih zawng zawng bak pek a phu a ni tih pawh ka hrechiang hle mai. Diki ka hmangaih tluk zetin tunah chuan Dingi pawh ka hmangaih ve ta a, ka kianga a awm apiangin  ka nunhlui ka hre reng a ni tih a hriatloh nan ka inthup tang tang thin a, hrilh duh viau thin mahila a hriat avanga a nat ai chuan tiin keimahin ka thinlung pheka inziak chu ka chhiar a, mahse ka inthup zo meuh em ka hre lo. Ka tana hlu tawp, ka nun kawngkhar inkhar tawh hawngtu ka nupui hi tihnat ka phal tawh lo a ni. Thil tha tin reng leh nuam tinreng pe vek theilo mahila a hlimna tur a nih phawt chuan tiin ka tha leh ka neih zawng zawng pawh sen ka phal a, ka hun kal tawh zawng zawng pawh thawnthu hlui ang maiin ka ngai thei tawh nachungin ka thinlung khawilaiah emaw tak hian nula pakhat, tuna ka nihna ni thei tura min duangchhaktu chuan pawisawilo takin hmun a la chang reng si. Ka duh vang a ni bk reng reng lo. Theihnghilh ka duh ber berte hi ka hrethei zawk emaw tih mai turin hriatreng ka duh ho te lah ka hrethei mang der si lo. Chu ka nun tibuai fotu chuan engtikah emaw min la thawng leh dawn a ni tih lah ka ngaihtuah thleng phaklo fo bawk.

Ka pindanah chuan ka phei a, ka file pawl chhah deuh tap chu ka phawrh a, a chhungah engnge awm tih lam ai chuan nichin lawka a khawihtu avang chuan ka khawih a, thilthar zawn vang pawh niloin ka’n keu thuak thuak a, eng teh ual ka va chharchhuah ber pawh ka hre lo. Ka lung a leng a ni. Reilo te hnuah min pui bawmtu tura ruat chu a lo kir leh dawn a ni tih ka hriat avangin pen ri thlawk thlawk riah chuan ka insiam rem vat a, inthup tum taka lo thu vang chuan kawngkhar rawn inhawng rawk chu ka hmachhawn ta. Ka nupui, ka hmangaih leh tihnat ka phalloh chuan haw tura min lo sawm pahin ka mitah tak chuan min en a “ka hmangaih che” tih pahin ka hmuiah min fawp zauh a, chumi tlai chuan engnge maw takin min mawlh avangin ka chang let lo. Inthiamlo ru tak chunga chhuanlam siamin ka haw tlai tur thu ka hrilh a, ani pawh chuan min chhuahsan a, ka pindan darthlalang atang chuan ka nupui inlam pan tura a kal chu ka thlir reng a, vawikhat a rawn hawi let a, min nuih seih pah chuan a kut a vai a, ngawi rengin ka tana mihring hlu lutuk ka nupui chu ka thlir liam ta a nih kha.

Chutia ngawi renga ka nupui ka thlir reng lai chuan hmanhmawh taka lo kalin kawngkharpuia an intawk lai chu ka va hmu a, inhre awm pawhin an awm lo tih lah ka hai lo. Inhre lo awm pawh an ni reng a, Diki nen khaw khata seilian kan ni a, kan nu erawh a pa hnathawh avanga phai lama seilian a ni a, mizoramah thian leh lamhnai pawh an ngah lo hle. Chhungkaw fel taka seilian tih takah mizo zei zia tam tak a hria a, zahpuiawmin a awm ngai lo a, ka chhuanna tak pawh a ni fo nghe nghe. Diki nen hian naupan laia intawng leh inkawmngeih nghal chawt kan ni a, kan nu erawh MBBS ka zir zawh hlima intawng kan ni a, kan intawn hun hi afuh nge fuh chiahlo pawh ka hre thiam lo.

Ka kianga awm reng tura ka ngaih, ka ta neih leh ka nun kawng sialtu nia ka ngaih hmeichhia chu ka hnen atanga laksakin ka awm a, chu mai a la ni lo. A lak ata lak hran theih zia zang ka ni lo emaw ka intih lai leh ka hmalam hun tam tak pawh a telloa ka hisap ngailoh lak atang chuan ka duhlo chung chung pawh hranin ka awm a, a hunlai khan na ka tih lutuk avangin naupang te e ti lo chuan nun kha ka ning ngawih ngawih a, thih duhnain ka khat a, ka nuna thil mawi zawng zawng hmuhhmaihin ka lo piang ve te kha pawi ka ti ngawih ngawih thin. Ka hna pawh ka thawh peih tak loh avangin ka bang a, inah ka theuleu mai mai a, ngaihtuah mumal pawh ka nei thei hek lo. Ka chau a ni tawp mai. Engkim ka hua a, ka thin a rim a, ka bulah tumah awmlo turin ka duh a, chaw ka ei lo a, ka mu hek lo. Thi mai tura ka inngaih avangin thu tawi te te ka thih hnua chhiar tur ka ziak kur duah a, chungte lah chu tun thlengin ka la sawi chhuak zat zat thei leh nghal. Ka ni rilru ka tihnat lutuk avangin tuna ka nupui ni ta rilru lam thiam Dr Dingi hnenah min hruai a, chuta tanga intawng chu kan ni. A ni chu ka kiangah a awm tlat a, inkawm tam ta na na na chu kan inngaina thuai a, ka tlinlohna aiin ka tlinna min haichhuah sak a, ka diklohna aiin ka dikna lah a hre tam. A tan chuan a damlo enkawl mai ka ni nachung khan ka ngaina a, tun dinhmun thlenpuiah ka sawm nghe nghe a nih kha. Kan inneih hnu tun thleng hian khang thil thleng zawng zawng kha a hria a, a phunnawi lo a, a sawisel lo a, hreawm pawhin a lang lo. Khang zawng zawng thlenna chhan kha hre mahse tunge a nih tih hriatchian tumin a tha a seng thlawn ngai lo a, ka rilru natna tuam dam dan erawh a theihna zawng zawngin a zawng thung si. Beiseina ka nei tawhloh hnuah a hmangaihna avang liau liauin tundin leh ka ni a, ka lawm a, ka chhungte lah chuti bawk.

Dimtea ka kawngkhar rawn inhawng chuan ka ngaihtuahna ata min kaitho zawk a, chu ke pen ri chu ka hriatfo tawh a nih avangin tunge a nih tih en tura hawichhuah ka ngai hran lo. “Tea i lo kal dawn em? Hrilh tur che ka ngah lutuk” a rawn tichhuak phawng a, mak ka ti letling hle. Hmana ngaina taka min biak na awki ang chiah chiah kha a ni, a la danglam lo. Diki chu zui chhuah mai pawh pawi ka ti hran lo a, ka hnena a sawi tur pawh chu ngaihthlak ka chak mai a ni lo, ka duh a ni. Engnge ka sawi tak ang le? Ka buai a ni. Muang changa hawichhuakin “lawk aw” tih leh chhuanlama lehkha intiang chho ur chu ka chap mawlh mawlh a.

“ka ti fel vek tawh, ka nghak che a nia”

“ka’n en nawn leh reng reng ang e”

En nawn leh a ngai lo a ni tih chu ka hre chiang ber awm e. A khawih hmasatu avang chauhin ka khawih leh chak a, ka hua a mahse a kkhawihhnu chauh pawh ka khawih lehna chuan dam huaia inhriatna min pe a, haider leh thup theih rual a ni si lo. Ka inti pachang lui hram hram a, muangchanga hawichhuak pah chuan

“pawnah min lo va nghak rawh” ka ti talh a. A lung a awi vak lo a ni tih pawh ka hria a, ka laka a beisei chu hrechiah lo mahila ka ngaihruat thiam avangin chet lak dan thiam pawh a har ka ti hle. Nia, ka hria alawm. A bulah darkar khat lek pawh awm mahila ka hlim dawn a ni tih ka hria a, amah chu vawikhat chiah kuah leh pawh ni ila ka nuna ka chan ta nia ka hriat tam tak kha nei leh turin ka inngai dawn a ni tih la ka hai lo. Hmana ka ta neih, ka lak ata kalsawn ngailo tura ka ngaih leh ka hmangaih ngawih ngawih, ka theihnghilh ngailoh mahse min phatsan ta si tu hnenah nge ka kal ang a, ka harsat lai bera min khaidingtu, a leh awmlo thei tur khawpa ka mualpho lai pawha min awmpui tlattu ka nupui ka pan ang? Ka tan chuan zawhna namailo leh harsa a va’n ni tak em! A hnenah minute reilote pawh awm leh thei ila aw ka tih vawng vawngin a kianga kal turin min sawm mek a, in lamah min ring takin ka nupuiiin min lo nghak ve thung si. Ka thinlungin a duhna lam chu pan ngat ila chuan thil thleng thei leh awm thei zawng zawng pawh ka suangtuah thiam nghal vek a, thil tha ber nilo mahse ka duh si. Vawi khat chauh pawh a mitmeng en leh ka la thlahlel a, a kut vawn ka chak a, vawi khat chauh pawh min fawp leh se chuan ka nun a kimlo nia ka ngaih kha a kim ngei ang, Mahse a ni thei lo. Min ringngamtu ka nupui hi ka phatsan thei lo. Ka rilru nilo ka thinlung in a duhna zawk pan chu ka tan a tha a ni tih ka hriat avangin ka ding hluai a, ka kut khur zawih zawih chung chuan helaia awm reng hi ka tan a thalo a ni tih ka hriat avangin ka hna atanga banna lehkha chu thei leh thei loin ka ziak ta a ni.

Ka theihnghilh ngailoh hun zawng zawngte kha ka hre reng lo mai pawh a, ka tan chuan an va’n hlu em! Ka duh emaw duhlo emaw hmasial taka ka hmangaih pan ruak ruak ai chuan min hmangaihtu ka nupui pan chu ka tan a tha zawk a ni tih ka hria. Hmanni lawkah eng vangin nge a chawhmeh lei ang kher ka lei? Ka ngainat loh ber leh nghal. Khami nia ka bazar haw kha ka nupui khan mak min ti reng a nih kha! A kawr ang chian ka nupui tan ka leisak bawk a, a tih tawhte lah chu en fel leh chuan ngai tawhlo mahse kan en leh khan engnge maw hahdamna min pe a ni. Keimah a peng pakhat ang mai a ni tih ka hrechhuak thar leh a, ka thinlung hliam dam tawh nia ka hriat chu tih nat leh a ni a mahse kan nu ka khawngaihna leh min hmangaihna chuan min venghim chauh zawk mai a ni. A hlim a ni tih ka hriat avanga ka hlim thar riauna te, keimah avangin a hahdam a ni tih ka hriat avanga fel ta viaua ka inngaihna te, a nun ruak ru riau tihkhah duhna ka la neih cheute, a duhzawng leh a mamawh hote pawh ka tihsak avanga hlawhtling ta riaua ka inhriat thar lehna te chu thil dik a ni thei mawlh lo. Ni e, Dingi chu ka hmangaih ve tawh alawm mahse ka thinlung engngemaw chenah hian Diki’n hmun a la chang a, chu lah chu ka duha ka dan theih a ni tawh bik si lo.

Chutia dawhkan bawha ka lo inngaihtuah buai chiai lai chuan ka phone a ri a, inlama rinawm taka min lo nghaktu ka nupui chuan min rawn biak a lo tum mek chu niin. Pawn lam ka thlir a, gate bula tuemaw ding nen chuan ka khaikhin leh a, dik zawk nia ka hriat kawng chu ka tan na dawn hle mah se zawh lo thei ka ni lo. Ngawi rengin kan in lam pan chuan ka kal a, kalkawngah tunge lo awm tih pawh ka ngaihtuah duh lo a, mak pawh min ti hlawm viau awm e. He hmuna awm rei thei ka ni lo. Nikhat pawh awm leh vaih ila ka nun khaidingtu ka nupui lak atang chuan tuemaw chuan a tum vang reng pawh niloin min kalsawn tir dawn a ni tih ka hria a, a diklo a ni tih pawh ka hria. Ka hmangaihna hmasa avangin tuna ka hmangaih hi phatsan thei ka nilo tia infuih maawlh mawlh chung leh ka banna lehkha hum pah chuan kun ngulin ka kal nghauh nghauh a, vawikhat chauh leh hawi duhna chuan tih taktea min nawr avangin ka’n hawi let hram a

“i la cham reng asin” tia phunsep pahin Diki hmu leh ngai tawhlo turin ka rilru ka siam ta a ni.

130420121054

msi@rose