i duh zawng chhin la

Friday, July 27, 2012

APATANI TLANGAH LAWN RU!

Mihring hi amah maia a awm theilo ang bawkin hmun ngai renga a suk tlauh tlauh chuan a taksa dam mah se a rilru a damlo thin tih chang chawiin ka nipui chawlh lai chu engtin tin emaw kan awmna khaw thenawm Ziro khuaah ka han tek lut hlawl a, helaiah hian kan mizo missionary te bak hmelhriat ka nei lo. Ka vawikhat kalna nilo mah se he hmun hi tlangchhip a awm a nih avangin a boruak vawt raih leh phai deuh si a tlang nisi thengthaw nuam tak te, thingtlang nun leh khawpui nun inchawhpawlh nak hian ka rilru a la reng thin. Lower Subansari district thuthmun ziro hi a boruakin a zir vang a niang chu engitk lai pawhin a ram mite'n an thar chhuah thlai leh thei tharlamleh tuihnai tak tak a awm reng a, a mi chengte an hmelthain hmuh an nuam bawk nen. Tin, helaia christian tam zawkte hi mizote tana thlaraua kan fate an lo ni leh zel bawk nen kan tan chuan tlawh hmaih chi rual a ni lo. Rem loin buaithlak teh mahse Ziro-a ka cham chhung hian a hmun leh hma thenkhat chu kan han up tha ta a

Hei hi kan kal lam Yazalli khuaa sign board lo intar a ni. He dawr neitute hian hralhloh an hlauh chu thu hran India ram pumpuia vai an tam ber ang bawk hian Vai ho hian saptawng chu an lo ngam huai ber mai a lo nih hi!






Tlan chunga ka lak vang a ni tih in sawifiah ngai ve hrim hrimin ka hria tunlai camera tha pingling awmna khawvel a hetiang thlalak tenghneng rawn phawrh takah chuan. Kut hnathawk te avanga kan ram a dinchhuah mek lai hian kuthnathawkte chu rahbeha awpbeh an ni a, thawk tlem berte hlawhtam berna khawvelah hi chuan intluktlanga awm hi thil theihloh tluk a ni!







modern typical apatani house- ziro khua hi thingtlang khaw thengthaw nuam tak a nih avangin a mi chengte pawh hi chuti teh ualin an inti changkang lem lo. hetiang in hi an la nei deuh fur a, a haussa deuh te pawhin an conpound-a an side house angin an la siam talh bawk. hmanlai chuan a chungah hian selu hnah an hmang thin. lung a ti leng asin..




Hei hi Roman catholic compound Ziro a ni. Ziro ah hian kohran leh pawl  hrang hrangin hmun an khur nuk mai a, ami chengte hi mi rilru tluangtak, kawlh tak si an nih avang leh kaihruai la mamawh tak an ni tih an hmutlang chiang a nia nge






Hei pawh hi tunlai Apatanni in tho a ni a, Hong khua- Ziro  khaw thenawm chiah khua a mi a ni. Indo hnam tlangrama cheng ve tho an nih avangin an inte hi lei dep niloin an sa tlangpui a, tuihawk leh engilo atanga him nan mai piah lamah mizo ang thovin an ran vulhte an inhnuaiah hian an tlat tir nasa hle bawk. A kawng mam ngil tak inin a kar chah a mahnia han tei rek rek chuan hmanlai kan pi leh pute nun kha tem ve phalo mah ila lunglen veng veng a awl asin




Apatanni ringtu tam zawk hi thlarau lama mizote fahrin kan tih tawh kha. hei vang hian he khuaah hian mizote hi an ngaisangin an tlatlum hle. Hei hi an khaw baptist biakin lian ve ber pawl a ni. A hmun- town Baptist Church, Hapoli




Midland Education Centre, Ziro building hmalam a ni. A hmun hma hi a remloh em avangin engtin tin emaw inhnawh luih naw naw a ni a, ahnung , a sir langlo lam leh a hnuaiah te khian classroom leh hostel pindan te a la awm nuk mai. Hmuhloh lam hi a la pawimawh fan a nih zel hi



Hei hi ka hmuhtirh chuan keipaw'n an ninhlei mau vih bur mai mai emaw ka ti a mahse christian lote thlan a ni tih ka hre hnuhnawh leh! An rin dan chuan mihring taksa a lo thih hian an thlarau chu lo chhuakin a vak vel a, a vah velnaah chuan tihbuai tur a zawng thin niin an ngai a, heti hian mithhi tawh thlarau a lo chhuah loh nan a ruang an phumna chungah mau hi an vit bur sung thin a ni.




He lai hmun hi MEC thlang lawka awm a ni a, ringlo mite inthawina hmun a ni. Chhampual tinreng an chham a, an puitiam leh inthawi tute awmkhawmin an bei nasa thin hle. Pathian thlarau hnathawh a lo lan dawn chuan helai hmun hian rim hran a nei thin niawmina kianga chengte chuan an sawi bawk!




Hei hi an inthawizawha an inthawina hnu hma a ni. Heti hian artui hawng te leh inthawina tur an lo ken chma bang chu an khai a, ramhuai kha lungawi hlein an ngai thin. A nihna takah phei chuan an ei leh in inthawina kha puithiamin a ei daih thin e an tia lawm!




Kumtluanin helai hmun hi a mawi ka ti thin. thinlung tawt tak nena han chhuah a, phul hring cham dup a han vei thauh thauh hi huan 'a ni'n min ngaihsak thin' tih hla dikzia hi ka hrechiang thin




Van ka en apiangin engtikah emaw chuan khita tang khian tuemawin min lo la lam dawn a ni tih ka ngaihtuah chhuak a, chu ngaihtuahna chuan ka nun chhungmu hi a kawih keh thin. He Apatanni van lo eng uau kara chhum rawn lang ppawh hian chu thu bawk chu min ngaihtuah chhuah tirleh asin...






Tlang chhipa temple khi en teh u. Mihring hian a dam chhungin khawvelah hian tuemaw a aia thunei, a chunga thunei leh a chhehvel chunga ro reltu a awm a ni tih hriaiin sakhuana khuarah a tla thin







Apatanni chhumte pawh hian siamtu kutthemthiamna chu an tilang zual zel asin





  1. Hapoli Bazar- Ziro-a an bazar lun lai ber leh an khawpui lai deuh ber a ni






Ziro khawchhung





Apatanni pitar thla ka lakpui ve thei hlauh mai. Heng ho hi an sawi dan chuan sal hnam an ni a, an hmeltha bawk si nen anmahni kawltu/chhawrtu te chuan an duh duh nupuiah neiin mi nupui te pawh an chhuhsak fo a, an biala hnam dang ngam hek lo, tihngaihna an hriatloh avangin an hmeichhiate chu tihian an insiam chhe ta niin an sawi. Tunlaiah apatanni thalaiah chuan hetiang hi hmuhtur an awm tawh meuh lo a mahse upa lam-hnam mawl nun tak takin a chiah hman te zinga mi la damteah hmuh tur an la awm nawk a ni






Hei pawh Apatani pitar tho a ni a, mizo ka ni tih ka insawi avangin thla ka lakpui a duh chauh nghe nghe. A te te in a thinchhe phian reuh leh nghal a. Ziro khua hi hmun thengthaw nuam leh vawt raih mai a nih avangin thei leh thlaite paw'n an ngeih bawk a niang, bazar tluanin thei hrnag hrang an chheo hmuh tur a awm a, ka cham chhunga ka puarna ber pawh a ni nghe nghe
Bonus-  Ruah sur ni a Apatanni buh hmun- kawl lehliam ka thlir a, ka chen ve ngailohnaa chengte ka ngaihtuah a, ka awm ve a ni tih hre ve reng reng lo te'n khawvela ka awm ve loh huna an la tal mai mai dan tur ka ngaihtuah a, ka lung a leng lawk vawng vawng mang e

msi Rose

2 comments:

  1. Mit a tlai, lairil a fan. Thu lah i phuah thiam...

    ReplyDelete
    Replies
    1. ka lawm e mahming. He tlangah hian kan la lawn ho dawn nia

      Delete