i duh zawng chhin la

Sunday, January 23, 2011

NANG LEH KEI

a tribute to Ricky Lalthlamuana RIP
Kum 27 hmulo mi tam tak an awm a ni tih ka hriatchhuah apiang a vannei ka intih chhan chu Nang ka kianga khang kum I hman theih vang kha  a lo ni. A tirin Pathianin khawvel a siam ang khan nang chu a i khawvel tir atan din I ni a, khatih lai khan a siamtu che khan a thlir ve vang vang ang che tih hi ka ringhlel hauh lo a,tunah pwh ka la ringhlel chuang hek lo. Panlai nun kan tih tehfoah hian I nun tam zawk ka hmanpui hauh lo che a mahse ka panlai nun zawng zawng min hmanpui avang erawh kha chuan inchhirna I neih ka ring bik lo ang bawk hian khang hun kha ka va han duhkhawp lo thin tak em!
I pan tur lamah chuan kal lo tur chein ka nawr hauh lo che a mahse chu hmunah chuan ka phakbaka ka sawi thiam aia nasa hlutna I neihna  anih bakah I tana ka tih theih aia nasa tih theihsaktu che hnen I pan a ni tih ka hriat avangin koh kir che hi ka duh lo,kei zawng I tan ka nepin ka tangkailo hle si a,ko kir che ila I tan engnge a sawtna awm chuan ang. Hmanah khan tunah ka ngai ang che tih ka hriat loh avanga ka atnaah hian tunge min tifing zo awm ang le?  Engpawhnise I tho a, I kal ta a, I hnung ka la rawn zui dawn che a,I hnenah ka la awm dawn a ni tih ka hriatna hian ka lung a ti  muang thin.
Rimawi mawina ka hriatfiah tluk zet hian ka tana I hlutna ka hria a mahse hmangaihna hi ka khawih theilo a ni tih ka hriatchian tluk zet hian khawvelah kan intawng leh ngai tawh dawn lo a ni tih ka hre chiang si. Ka mangan viau changin I fate ka thlir a, Pathian kut chhuak I hnukhawih kan hnena ihnutchhiah a ni tih ka hmu a,ka hlimna zual thung thin si.  Van ka en a, chhum kara ni eng lo luhna atang khian min thlir a ni tih ka hriat avangin ka lak atangin I hla ngailo a ni tih ka hria a, ka dam chhung hian ka kiangah I awm dawn a ni tih ka hriat zelna hian dam min ti nuam thin fo
Lanmawina aiin chhungril mawina hi a tlo zawkin a pawimawh zawk a ni tih ka hriat hmaa I hriatna khan ka hnen mai niloin  I nun chhunga I kianga mi te hnenah zung thuk tak a kai  a ,I thla ngaia kan tah tak fo hi. A ni lah taka ka kianga nun neituin a dah lai che khan I mawina hmuhhmaih a ni fo thin a, I fellohna nia kan ngaihte kha I chhungril nun hmuhnawmzia ti chiangtu a lo ni reng zawk si a,kha mawina ka hmuhfiiah hma khan nang chu nun leh chhawnna lamah hruai I ni ta zawk si a mahse ka vui lo e, chu hmunah chuan ka hnen aiin I hlutna a tam zawk si a
Zante hian hlimna leh lungngaihna  a thlen a ni tih ka ngaihtuah chhuah apiangin nang ka hre reng thin che a, ka hlimna bul tantu ni fo lo mahla ka lungngaihna I ni chuang lo e. vawi tam ka ngaihtuah chhuak thin che ang bawk hian ka hnena dah I nih zan hnuhnung kha ka hriatnaah hian nimin ang main a la chiang a, I naute pahnih,I kianga awm tih theih nei si lo, I tana tih duh ngah si hmelte kha ka hriatnaah hian a la chuai mawlh lo e. Rimawite chu a mawina leh a hlutna ti zual turin I nunah I la lut a,ka hria alawm

Some may call you a gecko but
The six strings are never a jewel till you
But has turn to roses that fades with a midnight sun
Still lingers to be the fairest maiden lust” an tih kha.

 Mi tana I hlutlohna kha ka tana I hlutna tizualtu a ni si a, ni zungzam tuna ka kianga zamte hi hmanah I hnenah a zam tawh avang ngawt pawh hian ka tan chuan a va hlu em! Ka u, ka u duhtak I nih avanga ka lawmna kha ka hrilh ngailo che a, I unaupa ka nihna avanga ka anneihna kha hriattir I ni ngai hek lo. Ka kianga reilote I awmchhuang khan ka hlimna hi I hmuh turin ka puangchhuak ngai lo a, ka lungngaihna pawh thup a ni hek lo, chute chung chuan ka kiangah lungawi takin I awm a, I lak ata hla taka ka kal lai pawhin min la theihnghilh ngai chuang lo a nih kha. Lawmthu sawi tura chakna ka neihloh lai khan ka lawm a ni tih hriattir ka ni lo a, ka kiangah I awm lai khan chu chakna chu lak bo sakin ka awm fo thin. Tunah chu chaklohna chuan I hnen min thlen tir a, I laka ka lawmna hrilh lo thei lo che a ka awm ve leh ka lak ata lak bo I ni si.
Zante hian pathian ropuina a tilang zualin ka hre thin a mahse kha zan ka kianga I awm hnuhnun ber zan kha chuan khawvel hi a va thim chiang em! Ka lak ata lak boin I awm dawn ani tih hria ila ka neih engpawh I tan ka dah tur a nia mahse tunah engnge ka tih theih tak chuang le. I sulhnu tia sawi tur ka nei lo a, i ta a ni ti a midang kianga kawh tur ka nei hek lo mahse ka thinlungah nang chu engtiklai pawhin I khatliam a, engtik lai pawh hian  I hnen ka thleng a, englai pawhin I ka hmu che a, englai pawhin ka kiangah I awm thin. He khawvel I cham reilohnaah hian kei teh lul pawh hi chamrei tur ka ni bik hek lo mahse ka awm chhung tal chuan ka kiangah awm la, ka hnenah awm la ka va’n ti em!
ka tahna zawng zawng hi nagmah vang  a ni chu ka ti lo mahse ka hnena I awm lai khan ka tap a,ka nui a, khawvel hi mawi ta hlein ka hre fo thin, khang mawina zawng zawngte kha min laksak chu ka ti lo mahse he khawvel hlimna zawng zawng deuhthaw hi I liampui nia ka hriatna hian nang ka ngaih a tizual thin a, hlimna erawh I aia neih tur chu ni se ka phal chuang si lo. Khawvelah hian unaupa tam tak an lo awm tawh thin a, midang tan chuan midang pekin an awm thin, chung zawng zawng zingah chuan te ber niin ka inhre fo a mahse khawvelah hian nang ka hnena peka i awm hnu hian ka te ber lo a ni tih min hrilh nawn fo thin.
Thinlung kehchhiaa ka awm changa I hnen lo chu pan tur ka hriatloh lai khan ka tan chuan lungmantam ai pawhin I hlu a mahse khawvela lungmantam  zawng zawng pawhin a hen zo lo che tih ka hriat ve leh nang chu ka hnen ata lakbo sakin ka awm ta si. Beiseina chu I tan dahin awmlo mahse chu beiseina chu thihna awm tawhlohna hmunah I tan liau liau a indah dawn a ni tih ka hriatna chuan ka thla a ti muang fo thin.
Ka mittuite hi ka rohlu an ni a, ka hnena I awm lai khan vawi tam tak chu rohlu chu laksakin ka awm thin. Ka kiangah I awm ta lo a ,nnagmah avang bawkin chu ka rohlu chu man loin ka hralh a, hralh loh erawh ka duh bik si lo a chhan chu I tan a ni tih ka hriat miau avangin. Tichuan he ka rohlu hi I tan ka hmag lo ang tih mawlh a nia ka hlauh leh hnuhnawh ni. A hunlai ka hai avangin mawl min ti lo la, ka finna erawh min haihchhuahsak thei tawh lo mahla a hun lo a I tan ka tihsak che avang hian ka lawmna erawh ka mawina ah min ngaihsak ang che. Hun hi a va rawng lua em! tiin ka phun fo a mahse  huun hian khawnge min hruaithlen dawn tih ka hriatloh avangin ka hnen ata lak bo  I nih hun tur pawh hriattir ka ni si lo. Aw hun! aw hun! tiin au au mahila hun chauh lo chuan khawnge kan thlen dawn a hre si lo a, I hnen ka thlen hun tur pawh hun chauh hian a hre si.
Van ka thlir a,a eng uau mai, khita tang khian engtikniah emaw chuan kan Pain min lam turin khita tang tang khian a lo la kal ang, chu hun chu engikah nge a thlen dawn hre lo mahila I kianga ka awm hun tur a ni tih ka hriat avangin chu hun nghahchhuah chu ka phur zawk asin. I unaupa ka nihnaa ka inchhuanna ai mahin ka unaupa I nihnaah hian ka lawm a ni tih hi hrilh che ka duh  a,ka phun ri hi hrelo mahla  he thu hi ka sawi zel tho ang a,ka sawi fo bawk ang.
Thihna hi a va rawng em!ti thei ka nih ka hre lo a mahse ka ti lo bawk si lo. He mihring thihna rawng ber ka tih fo hian hmun nuam leh duhawm zawkah a hruaithlen che avangin phunnawi thei ka ni lo a,ka lawmna erawh hriattir che ka duhzawk fo. Thihna hi a tawp lo a, nun dang nei leh tura pen khat I pen hmasak avang hian vui thei ni lo mah ila I kianga la awm kha ka va’n thlahlel tak em!


Thu tam sawi tur ka nei lo mahse ka ngai hle mai che

11 comments:

  1. A ni lah taka ka kianga nun neituin a dah lai che khan I mawina hmuhhmaih a ni fo thin a, I fellohna nia kan ngaihte kha I chhungril nun hmuhnawmzia ti chiangtu a lo ni reng zawk si a,kha mawina ka hmuhfiiah hma khan nang chu nun leh chhawnna lamah hruai I ni ta zawk si a mahse ka vui lo e, chu hmunah chuan ka hnen aiin I hlutna a tam zawk si a......[Thanks Rose]

    ReplyDelete
  2. lalkhalthangpa welcome. he rama kan awm chhung hi chuan thihna hi a van tawp chiang em! mahse francis-a tawngtaina kha hre reng ila aw

    ReplyDelete
  3. Ziak tha hle mai! Han belh vak tur chu ka neilova, mahse a ngaihnawm lutuk. misual.com blog list ah ka lo telh ve che a nia aw, a pawi i ti em lovang chu?

    ReplyDelete
  4. Hmmmm...a thu a thlum tha khawp mai. A damlai khan heng thu te hi lo hrilh mawlh mawlh ta la, a va hlim dawn e aw. Thihna hi chuan mihring hi min lo then chiang khawp mai. Engtik ni ah emaw chuan kan la thi theuh dawn si a. Hetiang taka thu thlum leh ngaihno bei hmanga min au zui lawm lawm thei tu hi awm ve tak ang maw.... Chhiar a nuam khawp mai.

    Kum la naupang te si, i thuziak a tha kher mai. Rose, hei aia ngaihnawm pawh tam tak i la ziak thei reng, a dang pawh ziak zel rawh.

    ReplyDelete
  5. Thihna hi chu tumahin kan pumpelh dawn lo! i ziak thiam hle mai!

    ReplyDelete
  6. A va mawi em! A ril hle mai; a ziaktu rilru/feeling pawh a 'genuine' ang (a ziaktu hi mipa a nih hmel a, blog neitu lah hmeichhia i ni bawk si, ka hrethiam tawh bik lo).

    Btw, kei pawhin Ricky Lalthlamuana (RIP) hriat ka nei a. Ani kha mifel famkim chu a ni bik lo, mahse rilru chhungrila mi tha tak a ni.

    ReplyDelete
  7. Keimahah hian MSI tih hi essayist tih chu thil thuhmun deuhthaw a ni! A ropui lutuk tlat. Last para phei khi chu a ropui lehzualin ka hria.

    ReplyDelete
  8. Ka hnuk a ulh!

    ReplyDelete
  9. @ u Jona: he thuziak mawi leh lungrun tak hi in thianpa thin, Ka u Ricky Lalthlamuana (RIP) tana Rose Malsawmi'n min ziahsak ve liau2 anih hi. Ka lawmthu hi thu a sawifiah chi pawh ani lo. Ka lawm hle ani tawp mai.

    Zira VVK. aizawl

    ReplyDelete
  10. @ Zira/Arix Khalthang: E khai, lung a va leng ve le....

    ReplyDelete
  11. @illusionaire.awle,ka lawm lutuk e.
    @jona ka thianpa tana ka ziahsak a nia,ka edit duh lo a nih hi ;)
    @maisek kan hun a la thleng ve dawn si a
    @caribou kan hmangaihte kan au lawm lawm ang hian i hmangaihte'n an la au ve lawm lawm dawn che asin
    @kc thank you,i ropuina phena lo zuang ve mai mai kan nih hi
    @arix tap rawh,insum reng reng suh ang che
    In zavaiin ka lawm e,ka blog tlawmte in lo chhiar ve a,ka phone atangin ka lo bih dek dek thei chau a,ka vil ngun thei lo a,min lo hrethiam mai u aw ;)

    ReplyDelete