Duhtak Amelia tana lehkhathawn

Ka fanu Amelia,

Ka fanu tia ko thei che ka ni em tih ka hre chiah lo a, 'ka nu' tiin min ko duh angem tih pawh ka hre hek lo. I hnena lehkhathawn theihna ka nei erawh tih ka hria a, i chhiar duh leh duhloh tur erawh ka hre lo. En teh, bawihte ka hmuh hma chein kum 2 dawn a lo liam leh ta reng mai. Eng ang mihring nge i nih a, eng ang mizia nge i neih? Eng kawngah nge ruat bik i nih tih pawh ka hriat hmain nausen ata hmeichhe naupang i lo ni dawn ta mai si a, damchhung huna mihring hmuhnawm lai ber, thianghlim lai ber leh duhawm lai berin ka kuahin ka pawm lo che a hrehawm ka tihna ai mahin heng hun liam tur lak let leh theih tawh siloh hi ka ui a ni.

Duhtak Amy, hun hian khawnge min hruaithlen dawn tih hreloin kan tal mawp mawp a, chu tal mawp mawpna khawvelah chuan i la rawn sapatal ve dawn chauh tih pawh ka hria. En teh, bawihte tal rawh tih takzetin tal ang che. Hun sapatal phallo te hi hun bawk hian a dawlh leh thin avanga khawvel hi lo heti zo ta a ni tih i hria em? Hun chu hun a ni, nang chu nangmah, nangmah Amelia-lalfanu duhawmtei i ni- hun nen chuan in kal rual reng ang a, inkaia inngheng reng siin in in mil ngai dawn si lo. Kum liam ta zawng zawng a ka taksa, ka rilru leh ka thlarau te kha danglam takin a la ngai reng a ni tih hi i hriat hmain kei chuan ka tem tawh a, chu nihna chu ka hleuh mek asin. Darthlanag hmaa ka din vang vang chang hian upa sawtin ka inhre  ngai lo a, ka piancham ka lawm kumtin avangin upa ta sawtin ka inhre hek lo. Chuti chung chuan ni kal zel chu ka chhiar nitin a, kar tluan pawh ka bawh tluan a, thlatin leh kum tin te chu ka kutzungtang thliak meuhin ka chhiar a, kum tin kawk kal tuah ka la tang ve zel si. Ka dinna sawn nia ka inhriat miah loh laiin tiauvut ata tuipui lai takah hnuh phei ka ni a, tuipui lai atangin vaukam lehlamah hun chuan min hleuh phei leh si. Kum 20 chuang hun nena kan inkaih hnu pawh hian kum tam tak liam taa darthlalang hmaa nui sen sen a, a awrawl zawng zawnga a naupan thinglung thianghlim nena aua zak miah loa zai thin kha ka la ni reng asin. En teh, bawihte hun hian a khawnge a la hruai dawn che ka hre lo, mahse hun chu hmang la, hlim la, sapatal la, fimkhur takin han tal tak tak la, kei hian ngawi rengin ka lo en dawn che nia.

Malsawmna hi malsawmna dawngtute vekin an hrethiamlo thin a ni tih i hriat hma hauh atangin malsawm i ni tih hi ka’n hrilh teh ang che. Khawvelah hian tuemawin awm ve a phalsakna che avang ringawt pawha malsawmna i dawn hnem zia hi i hria em? Khawvel lehlama tuemaw chuan nun hi hahthlak tak, a sual a sual chhuah ngai niin a hria a, khawvel pang lehlam a mi erawh chuan hahdam takin nunin a hruaina apiang chu a pal bawrh bawrh a, hahthlak tak karah hahdam takin nun hi a paltlang thin asin. A vannei tiraw? Chu vanneihna petu chu tunge ni bik teh lul ang? Ka zawt nawn leh ang che. Khawvel pang lehlama mi vannei tak chu tu siam nge la ni teh fo ang? E! Khawvela i awm ve phaltu tuemaw chu a ni asin. Haider tum mahla i hriatna chuan i tumna chu a ti tlawm tho tho ang. Miin a chhungte a thlang lo ang bawkin nang chuan i chhung leh khatte chu i thlang lo a, nang hi an thlang bik hek lo che. Tuemaw rorelna fel tak hnuaia nang leh i chhungte chu pek in ni a, mawi leh rem takin in ingheng a, a inchawih thlap leh nghal! Mawlsawm i va’n ni tak em!

Nakinah chuan vanduai bik riau nia inhriat tlatna te, vannei bik em em ni a i inhriatna te kha a la bo ang. Duhtak Amy, chutih hunah chuan hei hi hre teh. He khawvelah hian chhan awmloin din i ni lo tih hi. Ruah chu a sur a, a sur reng lo. Ni pawh a sa a, a sareng bik hek lo. Ruah a sur avanga phunnawia khawvel hi tawp ta riau a hrezinga mi i la ni dawn nge dawn lo tih ka hre lo a mahse hei chu ka hria asin; ruah chuan a tih tur dik tak a ti a, ni paw’n din a nih chhan tak a ti thin tih hi.

En teh bawihte, “engngatinge” , “engvangin nge keimah kher” tia i awm chuma i tah hma hian ka hrih ang che. Tihpalh thil thua khawvela dah i ni lo tih hi. A chang chuan vante hi thim riauin ka hria a, a chang leh thlite hi ruak hiau a an duh duhna lama thaw mai mai emaw ka ti fo thin, chutih hunah chuan van ka en a, din an nih chhan fel tak leh ngawi renga fak phut hauh loa ti ka hmuh hian engnge mawni tih tur nei vein khawvelah din ka ni tih ka inhre chhuak thin. Vawikhat mai niloin vawi tam tak asin. Nang pawh duhtak Amy vawikhat din i nih chhung hian din I nih chhan vawi tam tak hrechhuak fo turin ka va’n duh tak che em!

Mihring a lo piana thinlung thianghlim leh fai mangkheng pek a nih kha duhtawk mai lovin pawlhbawlhhlawin a lo awm thin. Chu rilru leh thinlung pawlh bawlhhlawh tawh chuan pawlh a nih hma chu ngaiin a kun fo a ni tih hi nakinah chuan i la hrethiam ve thuai ang. Chutih huna lungngaia i kun loh nan chuan naupang thinlung leh rilru, thlarau leh taksa tihbawlhhlawh i nih hma kha fimkhur leh huamhauh takin han tal teh le! Kei pawlhsawp tawh hian lungngawi takin ka lo thlir ang che. Thinlung thianghlim tlanvelte chuan engtik lai pawhin min ei zo duak duak thin asin. Bawihte nang, nangmah ngei pawh hian nakinah chuan thinlung thianghlim neih duhin I la tei vel I la tei vel ang, chutih hunah chuan thinlung thianghlim pekin I awm tawh a ni tih I inhria ang a, uiin nileng paw’n kawtkaiah si mahla a sawt tawh dawn si lo. chuvang chuan maw bawihte, thinlung thianghlim I neih lai khan I thinlung ti thianghlim zual turin khawvelalh chuan han pen thauh thauh la, keinin tih takzet leh lungrun fahranin kan lo thlir ang che.

“Tleirawl chakna” hliah emaw pawngpaw tarlang chak  rual i nih hunah meuh chuan min la hria angem ka hre lo mahse  khatih hun kha mihringin a nun nghet taka ngawirenga a sawh ngheh hun a ni. A hria emaw hrelo emaw hetih hunah hian miin ngawi rengin emaw bengchheng takin a damchhunga a dinna tur hmun chu a sawh rual thin. Khuanu’n a zahngaih avanga an dinna a thlaksak mihring tlemte zinga i lo telve mial a nih chuan le ka sawi leh ka hriatphak bak a ni tawh dawn a, kha hun, khami hun ngeiah khan khawvelte chu mawi bik riaua i hria a nihloh chuan engte hi thim riauin i hria ang a, pangparte hi i tana par ni tlata i hrelo a nih chuan vana chhum chhah tak takte khi i ta tur niin i hria ang. Thil pahnih engtiklai pawha min hual veltu leh mihring nuna bet tlat duhthlanna hmangin chu i dinna tur chu i sawhngheh ve ngei a la ngai ang. Bawihte chutih hunah chuan hei hi i hria angem ka hre lo a, I lo hria a nih pawhin I thinlungah a ri nawn fo angem tih ka hre lo. Chu dinhmun-I damchhunga I dinna tur sawh ngheh nan chuan I duhthlanna kha a pawimawh ber tih hi.  Eng a awm avanga thim a awmna te, tha a awm avanga thalo a awmna te, chak an awm avanga chaklo an awm ve chauhna te, mawi a awm avanga mawilo a awm ve chauhna khawvelah hian thil thalo thlan tur a awm anih chuan thil tha thlan tur a awm ngei ngei dawn a ni tih hi I taksa khawvelah a awm a ni tih I chian tluk zetin chiang la, I peng kawi a nih pawhin I din nghehna tur lam panin I inher leh thuai ang tih hi ka chiang tlat a ni. Ka duhthlanna ka thinlung chanve chauha ka ngaihthlak avanga tun thlenga ka tawrhna leh ka tawrh tur hi hriain hmu ve la chuan khuanu hnena zahngaihna min dilsak hial a nia ka rin ni. Bawihte i thinlung chanve leh I rilru ni loin I thinlung pumpui chu ngaithla la, khawvelin a pek tur che nia I rin I duh avanga duhthlanna siam loin vawikhat nun pek I nih chhunga khawvel hnena I pek tur ngaihtuah ranin duhthlanna siam turin ka duh tak meuh meuh che a ni.

Hun hi a kal a, khawvel inher muah muah chhunga cheng zawng zawng deuhthaw chuan ni hi a chhuahna ngaia chhuak a; a tlakna ngai bawka a tla leh chu thil nihna tur ni vel mai mai lek emaw an ti thin. Hei hi a diklo chu ka ti bik hauh lo mahse maw bawihte, khawvela mi zawng zawngten an hmuhloh lai pawha nichhuak apianga beiseina inphum nghet tlat te, ni zung rangkachak zai sin lal silk puan a inzep par chiai ang mai a a zung tin kara duhsakna mihringin a siamtu hnena a dawn te, chhun nisen sa hnuaia kan vah kan vah laia chhum intal tep tep chhunga khawngaihna inphum ru te, tlai ni tlak dawna kawl sen phet kara hmangaihna leh enkawlna in pharh huau te, vana arsi a mak a maka mawi leh tam kara rinawmna leh a thutiama dinngheh tlatna in tar te khi hmuhhmaih lo la, I kianga khuarel zawng zawng kara chung thil tha engmahin a leitheih loh I hmuh tlat chuan I nun a hrehawm ngai loang tih hi ka ring nghet bur chauh a ni lo a, a tem a tem tawh tu ka nih avangin ka hrilh che a ni. Chung I thil hmuh zawng zawngte thatlohna aia a thatna en a midang hrilhtu I nih phei chuan maw bawihte khawvelah hian I va’n hlu zual dawn em!

Duhtak Amy, nang chu ka thinlungah chuan lal fanu chuam bik-a lal thutthlenga puan zai sin thami ang mai I ni a, ngawirawh; “ang mai”chauh pawh I ni lo, nangchu lal fanu chuam bik-a lal thutthleng atanga rangkachak talhfiak kenga;  puan zaisin thami sin I ni. I tan chuan khawvel hi a mawi a, ka tana a mawina letin asin a mawi ni. Chuti chung chuan engtik niah emaw chuan vanduai bik riau emaw; engngemaw diklo bik riau awma i hriat tlat hun a la thleng ang a, nun hi ningin tlanchhiatsan I la tum fo ang, tlan la tlan zel rawh. Mahse maw bawihte khawvel tawp leh ram pilril ber nia i hriatah pawh tlan thlengin, tlang sang ber tuma la lawn phaklohnaah leh van tawp thleng rawk paw’n tlan mahla I nu leh pa hmangaihna chauh niloin ka hmangiahna leh ka duhsakna che hian a la um zui zel tho ang che. Thenawmnu chu thenawmnu a ni a, fanu chu fanu a ni. Chu fanu chu fanu a nihna tak hlenchhuak tur chuan nang hi khawvelah dah I ni a, engngatinge kan hmangaihna chuan a umzui loh teh lul ang che. Kan duh vang chauh niloin kan tih tur a khuanu’n a relsa a nih avnga pawh va ni fahmiang.

Bawihte, tisa mawina leh lanmawina chauh hi mawina famkim a ni emaw ti pawlah I lo tang ve hlauh dah ang e. Miin a taksa mawina a hloh a nih chuan engnge maw tlem a hloh a, a rilru thianglimna a hloh a, a thiamna leh finna a hloh chuan engngemaw tlem leh a behbawm a hloh a, a thinlung thianghlimna leh khawvel awm chhunga mihringin a neih tura duan hmangaihna, zahngaihna, khawngaihna leh nun tamna I hloh a nih hlauh chuan engkim I hloh a ni tih I inhre dawn nia. Eden huan ata tawh mihring hian a mamawh niloiin a duh chu a mamawh emaw a inti a, a mamawh a ni tih pawh a inhriatloh laiin siamtu chuan Adama hnenah Evi a pe asin. Chuti khawpa kan remhriatnain a pelh theih loh leh a khum theihloh khawpa fing leh remhriatna rorelnain min hual vel chung chuan pawnlam mawina leh midang mita mawi nih kan tum luat avangin kan tal buai nuaih zel chu a nih hi! Khawvel hi kum heti zat a lo awm tawh a, a la awm reng hun tur nena chhuta hun rei tak rorelna hnuaia a kun chung hian a chang chuan khawvel hian a mamawh ngei ngei a hai fothin. En teh bawihte chung zingah chuan a chang chuan keimah ngei pawh hi ka bang biklo. Mawi taka chet vel mamawh riaua ka inhriat avangin fel taka siamtuin min phuarna chu ka tal phelh nuai a, ka tlu sawp fo bawk. Keimah leh min siamtu mit atanga inthlir loa siamtuin keimah ang bawka a siamte mit atanga inthlir a mawi taka lan ka tum nasat luatah ka nun chu sin te te a phelhdarh niahin a awm a, a tir atanga fel tak leh mawi taka min fun mawi thlaptu lak ata chu ka mamawhna niloin ka duhna vang zawngin ka tal tet nuaih ta thin a nih chu. Duhtak Amy,  kan duhte niloa kan mamawhte min pe thin tu ka hriat chhuah meuh chuan ka lo heti zo leh ta thin. Chuvang chuan khawvel hian damna min pe ta nia ka hriat apiangin ka thlarau retheih zia min hrilh tu ka mamawh thin a, khawvel hi dik, fel, famkim ta viau a ka ngaih chang apiang hian ka vanneihna aiin tuemaw mi vanduai takin min mamawh em em a ni tih min hrilh tu ka mamawh thin. Khawvel hi hlimna ringawta khat nia ka hriat lai darkar hian tuemaw chu lungngai takin a awm reng ani tih min hrilh tu ka mamawh a, thawk tam berte hlawhtlemna ber khawvelah hian tuemaw chuan dam hlutzia chu damlohna atanga a a chhar ang bawkin, hlim hlutzia chu lungngaihna atangin a chhar chhuak a, hlim hlutzia ka hriat theihnan min tah tirtu engngemaw ka mamawh thin. Hmangaihtu hlutna chu a lo thlir tu aiin hmangaiha te'n an hre chiang zawk nge nge thin ang hian vanneihna pawh hi mi vanduaite bawkin a ni neih chak thin chu! Bawihte nang zawng ka lal fanu chuam i nih ang bawkin mi vannei tawpkhawk I ni a, chutichunga I vanduaina aia i vanneihna i dahlen chhung zawng chuan nun hi hrehawmin i hmang ngai lo ang tih hi ka hre tlat a ni.

“Engatinge”, “engavangin” nge tiin khawvel hi a au ruai ruai fo a, a au lo ho pawh an awmhmunah an phun sup sup thin. Chutiang hunah chuan a thente chu ring tak takin an au a, an aw chuan khawvel mi zawng zawng te a ko khawm a, an suk naah an su dul dul a, a then erawh chuan an awmhmuna mi te chu ngawi rengin an cheziain a ko a, an awmna chin apiangah engngemaw danglamna an thlen thin asin. Tawngtaina vawi maktaduai chuang chham a nih tawh hnu pawhin a chang chuan mi pkhat vangin a chhanna chu hmuh a nilo fo a, chutih hunah chuan chu mipkhat chu nangmah I ni emaw I nilo emaw a tih chian nan I aw chu khawvel hriatah chhuah ngei ngei ang che. Bawihte I aw te chu a te emaw te lo emaw khawvel hriata au chhuah hi engtik lai mahin hlau reng reng suh ang che. Thinlungin sawi tura a ti che a nih chuan a dik a, I tih tur a ni tih hria la, mumang pakhatin khawvel kaldan leh a chanchin a thlak hlawk thin ang hian I aw chuan tu emaw khawvel chu a la thlakhlawk dawn a, a thlak hlawk thei a ni tih kha ring bur la, I tum I thlen a, I dinna tur hmuna I insawh ngheh hma chuan ti tang tang la, khawvel chuan I aw an hriat theih na turin ngawi rengin emaw bengchheng takin emaw I thiehpatawpin au ang che.

Thil dik a awm ngei ngei a ni tih kan hriat tawh hnuah te, vur hi a var a, ruah mal farte chu an hnawm a ni tih kan chian viauna te,  arsi te chu zanah chauh an hmuh theih angin ni pawh zingah a lo chhuak leh dawn a ni tih kan chian ang te,  tuifinriat tui pawl inkham duai chungah van a awm a ni tih kan chian tlatna ang chiah hian thatna I hriat tawh hnu chi chu tuh la, a tiak chu la la, phun la, I chawm lian lo a nih pawhin chu thatna chi tiak chu tuemawin a chawmlen sak ngei ngei ang che tih hi ka chiang tlat asin. Kan duhte, kan mamawh te, kan awhnate chi chu tih tiah kher tul i ti em?| a enga pawh chu ni rawh se, thil thalo a awm chuan a tha a awm dawn a ni tih kan chiangsa anga bawk hian thatna chi chu han tuh phawt mai la, engkim fel taka kkkum tam tak ro lo rel tawh tu chuan I chi tuh chu a tih tiah sak che ang a, tuemaw nunah chuan danglamna a thlen ngei ngei ang.

Mi tam tak chuan khawvela an awm chhung hian an mahni thatna a ni tih hriain an kalna zawnah an neih zawng zawng zinga tlemte an thehchhuak a, a thente chuan an tana tha tur tih an hriat chian em avangin an neih zawng zawng bak thleng pek an inhuam thin. Mi thenkhat chuan an tana tha tur leh a chhawr ber tur an ni tih pawh inhre reng mah se an tha thawh an duhloh chu thu hran an chhung leh khatte takngial pawh chu hnaah chuan tel ve lo se an duh a, an duhna chu tihhlawhtlinin lo awm hlauh se zawng a chuh helh ber leh a bawh rang rang an ni a, mi thenkhatte chuan an tana tha tur tih an hriat rengah pawh midang tha hman an tum tang tang a, engmahin an mahni chu eizolo se, an nun chu anmahni chauh chuan chenral se tihna rilru an nei ve thung. Chung mi chi hrang hrang bakah chuan mi thenkhat chuan an tan engmah anilo tih hre reng mah se mi tuemaw nun nuama a awm a, darkar khat tal pawh a lo hlim phah ve nan tiin an neih zawng zawng an pe a, an mahni an inphata, an chan a, an hloh a, an neih bak zawng pawh an la pe fan a mahse heng mi te hi nun in hnuaichhiah takin an en lo a, an chhehvel te lah chuan eng dinhmunah pawh ding se an en tleu thei teuh si lo. Chung mite chuan an nun-khawvela vawikhat chauh pek an nih hi an haider hial emaw tih tur khawpin anmahni chu an inphah a, midang tan an mahni leh mahni an in eizo a, an zawng zawng leh a bak an pe thin. Mi tam zawkin an zawng zawng zinga tlemte an pek laiin mi tlemte, tuifinriata tui far khat zat lekte chuan an zawng zawng leh a bak zawng an pe a, chu’ng mite chu khawvel hian a theihnghilh lo chauh a ni lo a, a hre reng zawk thin. Mi te tana an men naah an mit te chu a lo chak lo zo a, an ban thate chu lo zawiin an khup te pawh a pilh niai nuai thin. Anni chu khawvelah relo te cham mahse khawvel tawp thlengin an la nung ang a, an hming chuan daih ni reng a nei lo ang. Chung mi te chu zaha chibai buka an puala nikhata reilote maimitchhin hi i tih tur a ni a, i tih tur chauh niloin anmahni anga zawng zawng leh a bak zawng petu I ni thei a ni tih hria la, I aw te chu ti lianin I tuang ti chhah la, hmeichhia I nihna dahtha in khawvelin a mamawh che a ni tih hi nitin, darkar tin leh minute tin hre turin tih tak meuhin ka ngen ngawih ngawih che a ni. An tan chuan khawvel chu khawvel pum bakah lei leh van huap pawh a ni thei. Mitinin an hriat phak khawpa awrawl chhuah ngam leh vanneihnain a tawn fuh avanga an aw chhuah thei te zah a chibai buka an mahni ang nih tum ve hi I tih tur a nih viau laiin he’ng mi tam zawkte phenah hian ngawi reng a zawitea an mahni khawvel theuha midangte tana inphah ral thak an tam asin. Lei leh a chhunga awmte hian midangte tana I aw chhuah leh I ban then vel chu hrelo mahse tuemaw nuna danglamna thlen duh vanga ngawirenga I khawvel zimtea I pen chhuak a nih chuan van beng a thleng ngei ngei ang. Nangmah zah nan khawvel hian a lu kun lo mahse vana angel tam tak te chu lawmin an au dawn asin. Angelte tilawmtu nih chu engkim dang zawng aiin a thlakhlelhawm asin bawihte.

Mei si chu tih mih a har lo a, tih mih vat a nih loh chuan meipuiah a lo chang a, chu meipui timit tur chuan mipakhat mai niloin mi tam tak tha sawmkhawm a ngai tawh thin. Meipui chu a alhna tur hmuna a lah a nih chuan thil tangkai tawpkhawk a ni a, a hunlo leh a hmun loah a alh a nih vaih chuan mi tam takte neih chhun nunna atana thil pawi lutuk a nih avangin thil hnawk leh hlauhawm, thil tha tak nisi mi zawng zawngin a hlauh rawnah a lo chang thin. Duhtak Amy, khawvela thil tin reng hi mei alh ang mai an ni asin. Thil thalo te reuhte meisi ang mai pawh hi tih mih vat a nih loh chuan thil thalo tawpkhawk, khawvelin a hlauh leh a endawng rawn luai luaiah a lo chang thin. Engpawhnise bawihte, I nun chu meipui thami; a hmuna alh ang maiin alh hluah hluah se, I kianga thil nung tin reng tana chhawr tlak leh chhawr chakawm khawpa ropuiin I awmna apiangah alh chhuak ang che. Tuemaw hla ni la, an rimawi ni la, an lehkhabua I chuan ve ngei theih nan I nun chu a ziahna phekah chan tir la, thawnthu hlui sawi ninawm lohah chuan a phek tina I chuan theihna turin.

A chang chuan "engkim" nia kan hriatte hi engmahlo an ni a "engmahlo" nia kan hriatte lah hi kan engkimte an lo ni thin. Engpawh hi engmahlo a ni ti tu tan chuan engmahlo an ni a, luikama sailungvar mai mai pawh ni thlara en nachang hria a rualrem taka ni zung chakna hmang a de sep sep hmutu tan chuan thil hlu tawpkhawk a ni. Nangpawh engngemawhlutna nei i ni ang chiah khan engpawh hi engmahlo an ni lo a ni tih hre tlat ang che.  Luite chu luang se, thli te chu thaw se, ruah te chu a duhtawka surin ni te chu a theihtawpin sa rawh se. Thim chuan a thuneihna tilangin thimchhah ber hnuaiah min hruai lut mah se eng chuan min la rawn zawng chhuak leh tho tho ang. Chu eng nghak chuan ding la, nghet takin ding tlat la, a tha nia i hriatnaah ringawt pengloin remruattu remruatnaah chuan i ke chheh chu khalh lut lavawiin chu vawiin nih tirin naktukah chuan engngemaw chu relfel a lani dawn a ni tih hriatna chu inhnem tir mawlh ang che. Natna thlentu nih a har lo ang bawkin damna thlentu nih hi thil awlsam mangkheng a ni. Duhtak Amy, nat I thlang dawn bik lo ang chiah khan midang paw'n nat an thlang lo asin. Natna hi a tuartu lo tan chuan a nat dan leh a nihna diktak hriat a har thin. Chuvang chhuan midang natna tihdam sak theitu I nih dawnloh chuan an natna thlentu nihsak lo hram la I chungah khuanu paw'n zahngaih a chak zual zel mahna! Bawihte mal riau leh ngaihsaktu neilo riaua I inhriat chang apiang leh harsatna te buaina te hin ngaina bik riau nia i inhriat changtehlimna leh lungawna chuan chiang takin a phatsan ngei che nia i hriat hunah chuan kei mi tawmkailo leh tangkaina neilo mihring mah min enkawl peihtu  chuana kalsan dawn teuhlo che a ni tih hriain nang chu i mal mawlh lo a ni tih hria nawn leh la, van enin khita tuemaw cheng khian a awmpui reng che a ni tih i vawng dawn nia.

I kiangah awmin I ke pen tinte chu pen pui theilo chein, I ban chhehvel tirualremtu nilo mahila bawihte I nu, I pa leh ka hmangaihna atang hian I tlanchhe thei ngai lo ang tih ka hrilh nawn leh ang che. I mitmeng mawi leh thianghlim tak te, tlang kar atanga luite luang ri her her ang maia I nui mawi thianghlim leh ri her her te chu hre lo mahila ka lak ata i hla ngai lo ang. Bawihte khawvel atang hian hla taka tlanin lui thuk berah pawh biru mahla nun pek I nihna a hmanraw pawimawh ber I nu leh pa hmangaihna te an khawngaihnate, an duhsakna atang chuan I tal chhuak thei lo ang. Hlui leh chul viaua I hriat lai pawh khan nitin chung nuna thil tha ber berte chu mawi takin an par a , a entu mita a hlui avang ringawt khan an hlui ve dawn lo. Chung rohlu-lungmantam ai pawha a man tam leh chiar senlohte chuan nghet taka a phuar tlat che avangin I damchung leh a piahlam zawngah a phuarna ata chu I talchhuak ngai dawn si lo. En teh, heng nun rohlu bawm chahbi lak chhuah I tum chang apiang hian khawvel mihring heti zozai zinga nun rohluin a phuar veloh mihringte awhawmlohzia ngaihtuah la, I tumna lak ata chu pheh i va’n ni dawn chiang em! Hmangaihnain a tlansan ngailoh mihring tlemte zinga mi I ni ringawt pawh hi ka tan chuan sawi a va’n nuam asin! Bawihte I pa finna leh Inu duhawmna chu i damchhungin nangmahah a bet tlat dawn a ni tih hria la, hmangaihna tlachhamin i awm ngai lo ang

I nun rimawi tumtu chu nangmah I ni a, a lehkha pheka ziaktu pawh nangmah bawk I ni. I hla te chu midang niloin nang, nagmah ka duhtak leh ka duat Amelia ngei khan I sa dawn a, chuvang chuan I hlate chu nangmah chauh nilo midangte nen pawha mawi taka in sak ho theih nan a ziaktu nangmah ngei khan mawi takin a  chhunga thute kha phuahkhawm mawlh mawlh ang che. Thlalera mi zawng zawngin an chak huam huam tui hna ni la, thlalera thingro ding fir fer te chawmtu tuihna chu nang ngei hi ni ang che. Thinrimna leh lawmnate  hi damchhung daih a nihloh avangin chhumte chu kiangse tia mahnia insawh insawh ringawt lo khan I chung leh I kianga awmte chunga chhumdum chhah tak vaikian nan chuan I theihna leh I chakna kha hmang zo la, nuntam leh nun thuruk, thinlung thunawi hlu tak tak chu I nei ngei ang. Duhtak Amy, thim zinga eng chu fiah takin mi zawng zawngin an hmu thin a ni lawm ni? Chu eng chu ni la, eng zual zel la, I engte chu khup bo mailoin a  darh thei ang bera I en theih nan khawvar hmaa varparh arsi ang mai hian sang takah nangmah chauh paw’n nise I enna chu tilang zel ang che. Kal la, kal zel la, i dinna tur hmun I pannaah chuan sulrul leh thim chhah tak pawh awm mahse zam lo la, ngawi rengin kan kalpui che a ni tih hria la, chak takin kal zel ang che. Lo kal rawh duhtak Amy, rallehlam i thlen thlengin ka kai ang che

Heng zawng zawng ka hrilh chung che hian maw bawihte I nuna zawhna zawng zawng chu ka chhang theilo pawh a ni maithei, khawvelin a chhuan ngawih ngawih khawpa mifingte pawh hian zawhna chhan theihloh tam tak an nei ve tho asin. Chutiangin ka nuna zawhna tam tak , a nuna ka nun chhohpui ngei pawh hi chhan theihloh tam tak ka nei a, kei aia hniam leh hrelo zawk nia ka hriatte hi chu zawhna chhanna atana ka pan a, an kawrfual hmawra ka pawh tang tang chang a tam asin. Engpawhnise duhtak Amy,  I nuna zawhna zawng zawngte ka chhang theilo a nih pawhin min zawt la, kan pahnihin a chhanna zawngin kan feh chhuak dawn nia. Chutiangin I thinlung na te chu damna thlen theilo mahila min hrilh la kan pahnihin I thinlungna damdawi chu kan zawng ang. Tin, I kut te chu lo khurin I ke chhehte chu lo inphet mah se ka kutah vuan la lei hlauhawm leh khuarkhurumte chu kan kaltlang dun thin dawn nia. I mittui zawng zawngte chu hru hul theiloin engtik lai pawhin i lungngaihna chu hrethiamin tawmpuiin tahpui theilo che mah ila min hrilh la, hman ata tawh siamtuin zawng tura min tih angin hlimna chu kan zawng dun ang a; hlimna zawng tu chuan a tawpah tal a hmu ngei ngei thin ang bawk hian kan zawn chuan kan hmu ngei ngei ang tih hi ka hria a ni. I duh leh I mamawh zawng zawng  pe theilo che mah ila lo kal la, kan mamawh a ni tih pawh kan hriat hmaa min pek nachang hre khawpa fing leh remhria kan pa hnenah kan dil dun dawn nia, tichuan ani chuan min pe ngei ngei ang.

Duhtak Amy ka duat bawihte, heng zawng zawng I chhiar a, fiah fel taka “ka hre ta” I tih theih huna nun-lemchhanna tuala ka lo la awm anih chuan ka kawngkharah rose par eng lo dah la, ka zinkawng alo tawp ta anih chuan tap loin ka taksa tawih hnu chhungah chuan rose par eng a dung zawngin lo dah la, vawikhat chiah “ka nu” i ti dawn nia.

ms-irose