i duh zawng chhin la

Friday, August 30, 2013

ram pangpar

Bualina ka luh veleh a rik leh rum rum thin avang chuan rilru kimlo fein ka inleih mawlh mawlh a, an tih than dan leh ka nin dan ngai bawkin an aw teng fiak ring zet chuan ka lo inrin lawk tawh ang ngeiin, “missssssss, he beating” tiin pakhat a lo au tuarh a, chuveleh thiamthu sawi nan aw dangin a aia ki sangin “I not beating” a rawn tih chhunzawm zat a, a hahthlak, a ninawm, a hlimawm!

Ram pangparte chu sat turin thla khat pawh inbuatsaih lo mahila, kum li dawn chu a ni ta. heng hun chhung zawng zawng hian thil thalo leh lungngaihthlak, thinrimthlak leh ninawm tam tak ka tawng chung zawng zawng chu ka ram pangpar nui ri chuan a nawt reh leh vek thin.

Zawhna rapthlak:- kum khat chhunga an zawhna zawh ringawt hi barelah khung dawn ta ila thlakhat chhungin barel thum kan thenawmte barel tiat, noa lawng pawh a  thawl han han thei ang tih theih tiat vel kan hman chuan kum khatah chutiang barel 12 chu kan hmang dawn tihna a nih chu. An tawngkam in ‘very mathe’!!



Zing riltam hunlai chuan buk lawi lawi khawpa hmanhmawhin naupang pakhat a rawn tlan ngawng nghawng a, ‘miss One question ask okay’ tiin kan lo zirtir tawh ang thin a intip olite fe leh tihsual neih hlauh hmel fe hian a mitmeng a khap zek zek bawk a, kan inbiakna chu hetiang hi a ni

Naupang:- “miss yeterday you take class na?”
Miss:- yes, my boy what is is
Naupang:- miss, one question okhay
Miss, yes, what is it? What is the question?
Naupang:- miss, do viruses have bones?

Arrgghhhh..chhan ngaihna chu vang tak a ni. A hminga nurse pangngai niha pawl 12 thleng bak science zir lo tan leh inhai kawveng lo chi tan chuan virusin ruh an neih leh niehloh hi ka hre ta mai bik lo. Ka zawh ho lahin min la nuih liam mai mai zui! Zawhna min zawttu dnhmun leh leh ka dinhmun chu zawhna ka zawh veleh chhanwgte hnenah chuan a inang reng! Vanhnuai khuavelah hian danglam reng kan lo awm lo e.

Miss:- hey, my boy come here. You have headache?
Naupang:- yes miss
Miss:- what happen? Do you play under tha sun?
Naupang:- no miss, some sometime puk(hrik) having inside brain na?

A lu nat chhanah chuan a thluakah hrik a lut ni awm tak a ni. Eng hrik tak ni ang maw!

Darkar 24 ukil:- kan tleirawllai khan dan leh dun zir kha ka chak ngai lo a, ukil nih pawh ka tum hek lo. Buh tin 200 hmun chhunga mihring 200 daw han inkhung a, thuneihna fang han chelh erawh chuan duh emaw duhlo emaw; matheiloin kan thatna leh ngilneihna zawng zawng nen, humsual dai leh dailoh pawh thliar loa ukil nih a ngai a ni. Hlawh neilo ukil! Thubuai pakhatah thawven kan hlawhchhuak, chu erawh a hlut dan chu pawisa nen tehkhin chi lah zuk ni der lo a.

Dan kan han zam sak a, dan kan siam hmaa case te nau inhekna pawh ni thamlo kha dan zulzui a nih vaih chuan a dan puan zawh rual rual a a case serious dan chu namailo tak a ni.

“in nu leh pa te hmingin tumah in inchhaih tur a ni lo”-an ngawi thap a, an inmelh hrek hrek a, intlarna atangin an kal darh a, kan pindanah kan lut fel ta maw tih veleh kawngkhar a rawn ri dawt dawt a; lo lut rawh pawh kan tih hma hmaa rawn innenhawng nghal in,
“miss, chu chuan ka pa hming a sawi a nia aw” tiin uluk lutukin thubuai an rawn nei nghal thin. Zan dar 10 a ni emaw zing dar 5 a ni emaw thubuai chu rem a ngai a ni ringawt mai a ni. Rem loh vaih chuan chuti hlauh! A chang chuan dan siamloha tei  luai luai mai hi a nia ka duh rum rum thin ni. Chu lah chu a  tih a tih chi der loh leh nghal!

Invelh leh insual thubuai chinfel chu ngaiah a neih theih titih deuh a, inum leh inchhaih pawh kum hnih vel han chai laih laih tawh hnu chuan awlsam taka thubuai rem sak a har ta mang lo. Thubuai rem hahthlak tak erawh naupang kum 5 leh kum 4 miin an sazu an lo inpawh din siak sakin an lo tlusual palh mawlh mai kha. An inhek dan te hi a pui riap riap asin. “miss, mendak(mipa sazu sawi nana an hman-a awmzia tak chu utawk tihna) standing, number one like and fall downing” an sawi tum tak erawh an sazu lo ding deuh chu number pakhat a ang a, a la tlu zui a naupang a chu tihna mai a ni. Thinrim lam aiin nuih lamah a kal zawk fo.

Kan thubuai te hi a ropuiloin a danglam thin asin.

Zingkhat chu thinrim lutuk sen tawn tawnin naupang pakhat a rawn tlan a, tah chak, chhuak silo hmel a pu a, lo vah zawh hlim ang maiin a sama  thur bum bawk. Ka bulah tak chuan dingin ka mit a en kal a

Naupang:- miss, he sexy sexy word saying.

A thinrim lutuk chu a puak keh dawn emaw tih theih hial a ni.

Miss:- what did he say?
Naupang:- underpant

Khawvel bawlhhlawhin a la nag dawn chauh a ni tih hrethiamlo tan chuan ‘underpant’ tih tluka thu bawlhhlawh chu vang tak a ni. Thereng man sawp fe inhram chau ang maiin a thaw hawk a, a thinrim mit sen vek atang chuan chhan a beisei chiang. Thubuai rem har tak chu a ni ve chiang asin! ukil hna lo awl loh zia hi ka hrechiang ta telh telh mai!

Tualthahna rapthlak:- zawhtein nunna pasarih an nei tia an sawi kan hre fo tawh a, kan choka trukverh atanga kan thlak a theihang kunga a hram nileh zankhua hnua a la thihloh atang khan hei hi ka chiang a ni. Kan ram pangpar ho erawh chuan zawhna nunna pasarih nei pawh lungin an denghlum thak thei asin! an theihna te hi a va rapthlak lo ngai thin tak em!

Naupan laia perhpawng rawh tui zia sawi tur ka hriat laiin anni erawhc huan perhpawng veha mi mansa a thla pawhthlak sak nawmzia sawi tur an hriat ka ring a, changpat tal mai mai en aiin liha pho tlar thap nawmzai an hre zawk ang.

Rul naute ringawt pawh baklenga kan tlanchhiatpui nasat theih tehreng nen an ni chuan thingrem chhiaa dahin an khum hnuaiah thla tam fe an lo khawi chu niin! Khuanu zah ngaihna zarah tawhsual kan tawk lo hlauh a, a chawah lan sazu zawnga buhchhekkhawlna pindana inriah chhawk ngaat ngat lah na phur em em zui! Computer age ah kan cheng tawh tihte chuan an beng hmawr pawh a ti za pha lo!

An tawnah zawng bang dai dep te chu lo indaiin lo dep mai mai teh se hi a ni mai. Ehe! Rul tia kan te thawt thawt laiin anni chuan ‘e, rul’ tih leh um an rual nghal zat thin.

Thawmlian:- ka thawm rin leh nat avangin ka chhungte chhaihnawmnah ka ni fo thin a. “family master of mass destruction” nihna pawh ka naupan lai atangin ka u in min hlan tawh a, tun thlengin ka pa tu leh fate zawng zanwg zingah pawh he nihna min laksak theitu hi an la awm lo mahse mahse thirlen em chu ka la thiat lo asin. a nuihzathlak a, a thinrim thlak bawk letling bawk si. Mi maksak za chuang ho hian tih apiangin na engngemaw an nei chung hian ngawi reng chuan pipu thira siam pawh an uai chat vek thei a, chu mai a la ni nang, aluminium fian elh kawih ngawng chu thil har a ni lo an tan chuan, bang a zar tur thirlen pawh a mal malin an thiatsawm vek thei! Khawia chakna nge an neih zo zai pawh ka hre bik ta lo e!

Khum daidanna thiahsawm vek hnua duitin la ulh bun leh chhawn te chu hnehsawh miah miah tak an ni, raw pum liantha pawh ban te reuhte si e ti loin an vaw darh vek thei a nia!

Kum khata pheikhawk thar pali lei ngai an nih avangin an zak ngai lo a, kekawr kap tet vek khawpa tlan phet lauh lauh lah an zak chuang hek lo. Intluktlanna duh avangin sikul naupangte chu kawr inang thap thui tir thin mahila kawr inang chu a inang thei lo. A che rapthlak zual chuan kum khatah vaiw ruk chuan kawr thar thui tir zuk ngai a, a tet a ni lo, a sawmin an ha sawm vek fo thin! Khawla thawmngaihna a wmloh hnuah hriau leh khawlla nen ka tin vang vang a, ka beidawng fo asin- beidawng duhlo engang tan pawha thawm beidawn loh theihlohna a ni hei chu. tunge thawmhna sawmvek thawmthar leh thiam ang?

Tirhkah rinawm:-

Naupang:- “miss echo”
Miss:- chu chu negnge? Engtin?
Naupang:- principal say take echo

A ngaihna a awmlo fo! A hriatdanin a rawn sawi a, kan zanwg a echo lak har zia lah an hre der si lo a. nia thil ri thangkhawk tluka man harsa leh lak buaithlak a awmlo keini mipangngai, nilenga awmhmuna lumum mai mai tan hi chuan. Extension cord chu rawn ti tha ta hle hle se chuan thaw hlawp hlawp khawa zawn buai hrep hnu a, in phone kual chiam loin tha takin  ka pe mai tur a nia!

A enga pawh chu lo ni raw sek sek darin an nun a kaihruai lo a, sanain an pheikhawk zawn a thulh tir chuang hek lo. A en dan tih vel mai mai chu thupui lo ve tak a ni.

Miss:- ‘boy go and ask sir what is the time”
Naupang;- yes miss

A lu hiat nuah nuah chunga marble hrual hrawih hrawih pahin a inchhuih phei nawk nawk a, pawl sang class room ah chuan a lut vei khurh a, kawngkhar bulah rei fe ka nghah hnu chuan hnap puar pawp leh a dul kiar rawn kawh phei luah luah chung chuan

“miss, sir said time is o’clock” tih leh chawiena pindana tlan phei an rual nghalk a, anmahni vangin chumi zing pum chuan ka sanaah naupang dang thawm ka hmang ta ringawt pek a!

Tirh chu an hnial lo a, an hrehlo mai a ni lo; a chakin an chak a ni. Kan tir lo ang tih an hlau ngawih ngawih a, kan tirh changin kawngkhar bulah an inbawr tup loh leh tui thun min dil thul. chuti em ema phur si chu tirh a lo chakawm teh lul nen tui thun turin han tir ila, tuium faisa chhin khak tial vek khawpin an lo hawn a, hna dang an belh hi a ni hawt alawm le. Mahni bottle venhim nge kan duh midang tih lawm tih thutlukna siam a ngai fo! A tawngtu tan chuan a har asin. Lalpan lawm taka petu a ni a hmangaihni tih thu hi heta tang chauh hian ka chian phah a, ka hloh pawh hlepah ka chhiar theih phah ta a ni.



Zirlai ata zirtirtu ah:-

 Ka zirtir a, min zirtir bawk a. nun chauh a ni lo, huan sam thlengin! 

Keichu khawpuia selian ka ni a, hostel atang inzir chho ka ni tih chhuanlam siam thei ka ni bik lo! Anni pawh khawpuia seiliana hostela kumtluan chhiar ral ve tho an ni. Keichu street dance uar lai ami ka ni a, anni chu computer age a thanglian an ni mahse kei aia kum sawm chuang fe a naupang zawkte chuan huan sam an thiam zawk! Lei laihte phei phei chu an lakah chuan nep tak ka ni nep tak! Intithu leh intithei fein huan siam puiah ka sawm a, a en ka tum a, a siam an tum-ka vanneiihna erawh anni aiin ka thu zawk! A nuam dangdai a nia.

dawl eimi ka hriatloh laiin a bul atangin ei chi a nih leh nihloh chiang takin an sawi fak thei a, chumai a la ni nang- fanghmir tui hun lai leh perhpawng no neih lai pawh kei aiin an hre zawk!

Anni chu ka zirlaite an ni a, “took bath” tih aiin  an thluakah chuan “take bathing” tih a intuh nghet tawh zawk a; zirlai aiin an chaw a pawimawh zawk. Bawngin an zirlaibu a lo ei zawh sak vek aiin chhangthawp sem chanloh hlau zawk khawpa thinlung sakhat nei an ni. An kum khat hun chhung chu chu buh tin 200 hmunah chuan inher luih luih mahse pawi ti awmin an awm ngai lo a, an hun hlutzia pawh an chhut phaklo a ni mai lo, an ngaihtuahnaah hian a luhin zuk han lut ngai miah lo a!

Invauna rothap:- hmun hrang hranga a thlen ang bawkin khawvel nun chhoh dan chuan kei leh ka naute chu min zuan kan bik lo. A lian lian thu neihna leh a huai huai rorelnaah kan kun fo bawk. Keichu ka kun ti ila a dik chiah angem aw, chal ser nunga naupan hun ka hman zawhah ram pangpar sam tura tirh ka ni a, anni erawh a pum rual lian lian ai chuan a vaupung na apiang champion belt hrenna khawvelah an cheng a ni.

Kan pawla a huaisar deuh deuh insual thawmah chuan , “tah i chak em ni a? ka hnek dawp mai ang che” an tih tawh chuan a dawih zawk chu an kal bo a, insual en tur awmloh avangin ui ru takin sikul varanda-ah kan in bandeh chhunzawm luia luai thin. Sap sikul chang ve mang hleilo tan chuan tun ahnua sap sikul naupang ka hrawn hnember, darkar 24 chhung ka boruak hip pui te hi ka en ber an ni lo thei lo. A saptawng dik an hrelo pawh a ni lo, pahnih khat an han intin ar ar a, a huai zawk chuan, “you beat like huh!” a tih hnua a la tawng fo chhunzawmna chu, “you cry like huh!” a nih avangin chu tawngkam chuan thubuai rem hran leh ngailoin min siam fo a, a thlak viau a, a huai zawk hriat a awlsam phah phian bawk!

“I tell miss” tih tluka thubuai sawi remna tawngkam chu vang tak a ni. Anni tan chuan goliatha ai pawhin kan chak a, Obama ai pawhin an khawvel chu kan kuai her hneh zawk a ni. Kan chan a ropui ang bawkin an lakah chuan kan sang vah vah a nia.

A va mak em!:-  a awma te hmaitlang tha lemlo thlankhawm kan nih vang nge, siamtu uikawmna ber hmelthatna sem laia kan chan veloh vang an ngaihdanah chuan mizo te chu an hmeltha lo. An zawhna thenkhat ka dahthat khiau zingah chuan hengte hian hnam a ti mualpho ber mai awm mang e:

Zawhna pakhatna:- hmeichhiain nal pangngai taka tingtang perh la hmu ngai hek lo, an tan chuan a mak a ni. Hmuhnawm ti takin min en a, thiam an chak a ni tih an mitmeng atang chuan ka hre reng mai. Inhmawlhte lak tak ngial pawn inzirtir fe a ngaih avangin tingtang perh chu zirtir chi a ni hauh lo tih ka hria a, an rilru hlim nan erawh engtik emaw la ziritr ka tiam thung.

Naupang:- miss did all the mizo girls know how to play guitar?
Miss- did all the nyishi girls good in tailoring?
Naupang:- then, miss mizo girls like one? (an sawi awmzia takah chuan mizo hmeichhiaa thiam awmchhun maw i nih min tihna)

Zawhna 2na:- miss all mizo people black or what?

Hemi ni tluka mizo zawng zawng kan lo ngo lo pawi ka tih nasat zia kha ka damchhungin a awm leh ngai ka ring tawh lo.

Zawhna3na:-

Miss- mizoramah chuan bawng leh rante hi khawlaiah an kal ve ngai lo. Ui pawh kan khung vek a, bawng leh vawk pawh an inah kan khung vek thin.
Naupang:- (ran khuahkhrih ngailo tan chuan a mak bawk a nian nge, an mak ti lutuk hmel chu ka hai o. min en a, ngaihtuah a nei tih hriat takin he zawhna hi min zawt let a)

“miss, animals freedom not having. You brokening Idian rules”

Hahthlak!!!! An zirlai atang chuan engngemaw hriat chu an nei ve chiang alawm. An thluakah pawh bawngek niloin thluak engngemaw chu a awm ve chiang a ni tih ka hrehhuak a, ka lawm a mahse ka zak! Chutih rual chuan kan sorkarin khauh taka ran khungna dan a siam te, thuawih taka mipui te’n kawn zawm erawh ka inchhuang ru viau a, an hre lem hlei lo a!

A enga pawh chu lo ni raw sek sek, beng kua pahnih nei nana chu inti fai leh changkang fein inthiarna a sahbawn ka chhawp pawh minute nga hnuah chuan banga nem per vek tura idea nei tha mihring 2000 dawnte hian computer age a kan awm a ni tih inhrilh ai chuan bawng tla mai mai uma tlan phet hlawp hlawp an thlang a nia.


Ka ram pangparte- computerah chuan games a khelhtheih a ni tih bak hrelo tan chuan khawvel hi a mawi a, hun hi a ding reng emaw an ti a, an hlim a ni. Hun hi a ding reng emaw an ti a, a ni telin tihdanglam an ni tih lah an inhre der si lo. Hlimna hi a leia lei chhuah tur emaw tihna khawvelah hian lei ngailoin nun hausa an nei a, khawvel lungkhamna intihbuai tir ai chuan perhpawng veh an thlang tlat zawk.

Nun letling:-  mihring rilru zirmite’n an sawi ang tam tak sawi tur ka hre lo a mahse ka thuhhruaite lakah hi chuan a letling a nun hi a nuam a ni tih ‘b’ hi ‘v’ anin an lam tlat a. ‘v’ ti rawh tih leh ‘b’ an ti ang lawi a, an thiam miah lo emaw tih lahin ‘banana’ an sawi thiam em em leh lawi si atang hian a chiang reng awm e. ‘f’ ni na na na ‘ef’ an ti tlat a, ‘p’ ni na na na ‘fi’ an ti tlat a, an ha lah tawngfiah loh phah tur khawpin a kuh mang hbawk si lo a. ‘raphael’ ni na na na’ rapel’ an ti tlat a, rafel a ni e chu ti ila ‘rapel’ an ti leh daih awm sia nga!!

Ti suh tih chu tirawh tihna ang a nih avangin ‘suh’ tih hi dan  siam na tawngkamah kan hmang ngai lo- sinai tlang dan tih dan pawh ni raw sek sek, kan tan chuan entawn thianglo hulhual a ni. Tirhdawn pawhin peihlo deuh tir ila, kan tirh duh ber a chu ‘kal ve suh’ ti ila phur tawkin a tlan nghal vat a nih maina khawvel hi a nuam dangdai riau asin-chuvang chu alawm’ feng shu your life’ kan intih tak fo ni!

Pawl sawm pass i nih a, saptawnga an lal tawngtai an sawi dana rang taka i sawi thiam a nih ngat chuan engnge maw min rawn dil vang vang dawn nia

Our father, who muat in heben
Alo by the name. thy tingdon tham
Ai wil mi main mawn mat
Ach i heben

Give us chid dei a deli bread
Ang forgive us au respase
As we forgive na na na amainst mas
En li as naw into nenention
But minilar us from ebil
Ha-in i he kiungdom
Power and the lory
Ever ever ever-amen

Ka ram pangpar sam mekte hi ka la sam kham lo chiang alawm.


msi@rose

2 comments:

  1. Nizan dar thum khan ka muhil thei lo ka tho a, ngun takin ka'n chhiarchhuak dap mai chu(h)...ka nui a, i tan a hrehawm turzia leh i hnathawh hauatak zia ka rawn hmuh thiam pui kuar mai che. A ropui thlawt e...

    ReplyDelete
  2. Hoгmonal imbalɑnce is one оf the reaѕons of being overweight, Ƅut thaqt is
    not thhe issue Һere, we are talking baԀ eating habits. Yogurt iѕ aсtually
    a fermented daiгy proɗuct that was ԁone by
    addjng cultured bɑcteria to. During 2012, I Ьegan to enjoy myѕelf - no longer eschewing
    glasses oof wine, but kind of returning tο a "fat and happy" ѕtate tɦat
    married people can sometimes find thеmselves lolling around within.

    Stop by my web page losing your tummy

    ReplyDelete