An zarah

mite’n tunah chuan i nu i ang min ti ve ta a, i pa ang maiin tawngtai thin ta che min ti bawk a

hmanah:- nun thuruk haichhuak tura siam ka nilo tih pawh ka hriat hmain mite chuan min lo nihsawh dauh tawh a, nuihsawh ka ni tih reng reng ka hre ngai lo. Tunah pawh ka hria a ni lo a, ka hrelo pawh a la ni chuang lo- ka haider lui tlat thin. Nun thuruk haichhuak tur hian engngemaw haider zuk ngai fo va! Chupawh an tihdan ka lak

hmanniah:- hmangaihna hi engnge  anih tih a zir a zir tham a nih hmain min lo zirtir daih tawh a, ka zir  ani tih ka hria hmain ka zir chho a, zir zawh theih a ni lo a ni tih ka hriat meuh chuan min hmangaihzia leh ka hmangaihzia hi a teh a teh chhuah rual a ni lo tih ka hrechhuak ve ta! Annni tan chuan nun hi hmangaihna a ni si a

mit inzimhleih sen sun, biang puar leh mawng vuai val deuh hmeichhe naupang, nilenga thian mumal kawm nachang hreloin balu-a inawmtlei thei hmeichhe naupang mak tak  mai kha  anu leh a tan lo chuan hmangaih a har awm mang e aw ka ti fo thin.

Hmeichhe naupang dang kawrpuk leih haa duhawm tak tak te an hmuhchang pawh a a kut zat avanga thingpui nohnih lum kep ziah ngai fanu an neih avangin Pathian hnenah lawmthu an sawi fo a, engkimah lawmthu sawi nachang ka hriat phah ve ta-chupawh an tihdan ka lak!

Tichuan:- mite chuan a nu leh pa  a ang lo mang e an ti fo thin a, lungloha lak nachang ka hre ngai lo. Chhungril nun ni lo a pawnlam an en vang mai a ni tih ka hre hek lo. Anni erawh chuan engkimah anmahni ka ang a, an fa bik ngawih ngawih ka ni tih min hrilh fo a- ka chhungril zawng zanwg min lipse vek hnu pawha min la zir chian zel vang zawk a ni. Chhungril nun en nachang ka hriatphah a, ka en mai atang leh ka teh dan mawlte hi a tawpna  a ni lo tih ka hre ve ta- chupawh an tihdan ka lak!

Engkim mai ah hian hlim tum tan chuan hlimna a awm a, tah tum tlat tan paw’n tahna a awm tih ngawi renga min zirtir chauh a ni lo, chu zirtirna chu ka pawm an duha, ka nunah an tuh tlat bawk a- chu chu awmzia a nei  a ni tih lah ka hrechhuak har phian.

Chunglam:- hlau leh khur chunga hringnun hman hahthlak zia hi ka la tem lo a, a siper erawh ka hmu ve tawh asin. chung hunah te chuan alawm ngawi renga van lam an en tlat thin na chhan chu. an nun an chhui let a, thil awmdan an ngaihtuah a, engnge maw min siamtu- mihringte chunga thunei tlattu a awm a ni tih chiang takin an hria a,  an ring tlat a, an bel tlat thin.

Chumi an en tlat thin chu tunge a nih tih ka hriatve hma hauh atangin chunglam min enpui a, keimah ang bawkin hlim leh lungngaihnia chunglam kawka chawimawia fak tlat a,  dila thlen nachnag hrelo mi tam tak an huikhawm fo thin. Hengte hi tunah chuan tih ve nachang ka hria a, ka lungngaih apianga van ka en tlat thin nachhan chu a chiang ta- an tihdan ka lak a ni.

Mi danglam bik lo:- an ni zawng hmel ena midangte laka inchhuanna tlak an ni lo. Mongolian thlah biangpuar chawnping bak an an ni bik lo tih hairual an ni lo a, duhawmna hranpa em em an nei bik lo. Thim thil lah nise chuti bawk- mite’n chhuang takin chumi chu an ni a tiin sawi ngailo mahse kan unau tan zaawng annni tluka mi duhawm leh Pathianin a siam fuh bik an awm kher awm lo e. chhungkaw neinung leh hausak zarzosak tur neiloin, a lirthei chuan zat pawh chhiarsenloh ni bik loin, khawvel deng chhuak vek thei khawpa thiam bik neiloin, bai mawlte siam bak thiamlo mahse mi nu leh pa te zawng kan awt bik teuh lo. Nun nawn lehna hi a awm a nih tak tak ngat zawngin anni bak nuleh pa atana dil tur ka hre hauh chuang lo

Ka hluin ka mawi a ni :-  mawina hi a tehtu a zir a ni an ti fo thin a; hmeltha pawh a tehtu a zir an ti fo thin. Mi chak tak niin ka inhre ngai lo , mi paukhauh leh tawhkhirh tak niin ka inhre ngai hek lo. Khawvel hian hmeichhe huaisen tak ka nih thu an puang ngai dawn lo.

Hmeltha niin ka inhre lo a, duhawmna neiin ka inhre hek lo. Chu zawng zanwg piah lamah chuan mi vanduai ber niin ka inhre fo thin. Darhtlalangah ka inen a; maiwna leh duhawmna reng reng ka neihloh zia ka inhrechhuak a, darthlalang hmaah ngei chuan ka’n innuih sen sen a, ka mawilo zual niin ka inhre fo thin.  Mite’n min sawiselna te chu chaw atan ka rin avangin nun hi nun a  nihna angin ka hmang lo fo a, nun hian ka chunga zah a ngaih vangin chhia lah ka chham thul.

Tunah zawng ka in en a, mawi ka inti a,  duhawm ka inti a, darthlalanga pawh ka inen nawn leh fo thin. Hman atanga tun thlengin mi miah chuan ka la ngai reng a; khawvel mihring heti zozai zingah ian duhawm fal nihna ka la nei chuang lo midang mitah chuan. En teh! Min tehtu tehna atanga ka inen hian chakna te, duhawmna te, sawifiah mai thiehloh khawpa nasaa mawina te hi ka hnenah a inbel chhuak vek asin. ka nu leh pa mit atanga ka inen chian poh leh ka mawiin ka hlu a, mi duhawm tak leh hmangiah phu bik riau niin ka inhre htin—an mit atangin ka inen miau a.

Mite chuan mi ang ka ni tih an hrelo fo a, ngaihtuahna mawi leh thianghlim tak kapu ve thin a ni tih pawh an hrelo fo hial awm e. chuti chung chuan mi chak niin ka inhria a, mi thiltithei leh tha famkim niin ka inhre fo thin. Midang mit atang niloa ka nu leh pa mit atanga ka inen tlat avangin chakna sawisen loh leh khawvel hial pawh ngam theihna ka lo nei ve ta-an zarah.

Mi mak:- thinrimna hian nun engzat nge a suat tawh tih ka hre lo. Thinrimna bawk hian nun khuakhurumah mi za tel mai pawh nilo, a sang tel a nuai tel pawh a ni mahna a tlakhlum pui tawh a, chung thinrimna atang chuan kalkian ka zir fo a, kalsawn a, hnungchhawn a sirdawh pawh ka thiam ve dawn ta. Chu pawh an tihdan ka lak!

Minute khat pawh khawvelah hian a nung ve tawh a ni tih ka hriat ngai reng reng loh; anni pawhina an hriat ngai bikloh  mihringte chu mi vannei ber anni tih an hrilh nawn fo thin a, hmangaihanin an nun an lei a, chung mite’n an hmangaihna dawn avanga an nun an leihbuak bawrh barwh tluka hmuhnawm ka la hmu lo-chupawh an mahni vang vek! Tunah chuan ka hmelhriat ngai miahloh leh an hmangaihna ka phutchhuah ngam hauh lohna turah te, ka beisei ngam miah lohna turah te pawh hmangaihna pekchhuah a, ka nun leihbuak ka chin ve phah ta-chupawh an tihdan ka lak!

Thawhrimna rah hi a thlum tak tak a ni tih hrelo mihring heti zat zingah hian a thlumtui zia ka hria a, in nawn a tem nawn fo ka duh thin. Chu taihmakna rah thlum tak maiina ka taksa, ka rilru leh ka thlarau a fan chang apianga Eden anchhia lo mawi letling zia ka hriatna tluka hriatna hlu hi a  awm thei angem aw ka ti fo thin.

Nilengin;- zing chuan zing hman tur min pek chu a tih tur a ni a, chhun paw’n chuti bawk. Zan chuan a tih tur a ti a- zan thiang reh lai takin; nia, zan thiang reh lai tak ngeiah chuan hmangaihna chuan min ei zo fo thin.  Ruah chuan a tih tur a ti a, a sur a, ni paw’n a tih tur a ti a, ni a sa thin. An fate hmangaih chu an tih tur a ni tih an hria a , khuanu’n a tuk an tih tur tih zawh ni an nei dawn lo. Chuti chung chuan an fate an hmangaih a, chu hmangaihna chu leia en ch lah ni lo. En teh, ni hian a tih tur bak a ti ngai em ni? Anni erawh chuan tih tur tuk annih bak an ti a, an hmangaihna chuan engtik lai pawhin an khawvel tuam hlawm an tum tlat a, chu hmangaihna chu a lei a lei rual ni lo mahse kawlkil thleng pawha thleng turin an pe chhuak thin. Tunge faklo reng ang.

An zirtirna te chu a bua a ziakin dahlo mahse kan nun hian a ziak a, mite’n min chhiar a, min chhiar nawn fo thin. Nun hi a zahawm a, a hausa a, a mawiin a duhawm a, dam te hi a thlakhlelh awm ngawih ngawih thin- an mahni avang chauh hian. Hlau leh khur chunga hring nun hman tum si khan tunah zawng nun duhawmna leh mawina ka tawng ve ta an zarah.

Thian- anni chu ka thian an ni satliah lo, kan thiantha ber an ni a, mi tam tak thian an ni bawk. Nunin vawi tma tak min hnuaichhiah a, pianmawina leh duhawmna te, hmelmawina leh thatna te’n min kalsanin he khawvel ramro takah hian min hnutchhiah mah se an ni ka nei tlat dawn a ni tih ka hriat chianna hian khuarum mawnga eng de ve ve chu min hmuh tir thin. Mi e’n chhe ber min th lai pawha duhawm bera min hre tlattu an nih avangin anmahniah ka innghat ngam a ni. Chu tluka thian rinawm chu an awm thei dawn em ni?

Ka tan leh an chhungte tan chauh an nung lo a ni tih hi ka hmuchhuak ve ta. An mahni hretu te leh hrelo tute tan thlengin an nung a, chu lo a liama nun hausa- tunah chuan an chhehvela nung leh chetla te chuan un hausa kan lo neih ve phah ta- chupawh an tihdan kan lak

Hmanah chuan mite’n min en liam mai mai a tunah zawng a nu leh pa ang maiin a zawng zawng nen hmangaihna a pe chhuak ve ta min ti asin-an zarah.

An mahni ka en a, ka en nawn leh a, vanlam ka hawi a, ka nu leh pa ang tlat ni turin  Pathian hnenah ka dil fo a

msi@rose