i duh zawng chhin la

Thursday, August 25, 2011

LESBI-i


 A Barbie pheikhawk ri atang chuan tunge a ni tih ka hriat nghal avangin kawngkhara a lo lan hma atang chuan ka’n au vak phawt a, ka thusawi zawh hma hmain “thiannu a pawlh nge a pawlh lo” tiin a zui avangin chhanlet dan tur pawh ngaihtuah hmasa lem loh chuan “a pawlh” ka’n ti leh pawp a, kawngkhara a lu aia a ban a lo lan hmasak vang emawni a sahdah bawm chu a rawn thlawk phei nghal pawp a, a tih than loh pawh a ni chuang lo. Pian nalh fahran a ni lem lo bawk a, mahni insit chungin emaw chapo tak chungin a bulah a kal theih der bik loh! Kum thum leh a chanve kan awm dun chhung khan vawi khat chiah a thinrim ka hria a chuti chung chuan a bialpa erawh vawi li aia tam mah a then ka hre hman thung! A thinrim emaw ka tih lain a lo nui leh uar uar a, nula upa pawla tel ve rual tawh e ti lo khan cartoon erawh a lawm hle thung.


Kum engngemaw chen kalta August thla a ni tain ka hria kan PTS (preleminary trainning students) laia kan len lehlama sam bukchhupa lungawi taka bang nghenga a thut kha! Kar khat a liam a tunge a ni tih kan hre nghal vek, a hming danglam tak chuan min hip a, a ze danglam tak chuan min ei hle bawk a ni. Kan  junior most laia kan sir-in a zawhna kha ka hre reng thin- “engnge I chawhmeh tui tih ber?”, rang fahranin ding chungin “maitamtawk” a ti puam talh a, kha aw kha kum li hnuah pawh hian  ka bengah a ri nawn reng thin, maitamtawk-chawhmeh a zawng zawnga tuina awm lo ber mai leh ei tlak pawha ka lo ngaih ngai loh kha a chawhmeh duh ber tiin a chhal chu a nia, kan ina chaw eia kan sawm a ka kan sak lahin a sa sa a thlang zut zut tho a, a chawhmeh duh ber  a ni tak tak nge ni tak tak lo tihah lah chuan ka chiang thei der lo! Ka thiannu khan dawt a sawi ngailoh avangin dawt a nih erawh ka ring phal lo a, amaherawh chu khami ni atang kha chuan ka ngaina hlen ta hmiah thung a, ka hre lo ang tih ka hlau ngawih ngawih thung zawk.

Hostel-ah kan han lut a, inthuhnun kar chu hahthlak telh telh tak a ni, kan senior te hmel kan hmuh ringawt pawhin kan khur hlum lo chauh kha  a ni a, ani thung hi chuan kan u-te biak pahin a la khi ver ver reng tho mai, nulian ber e ti lo chuan a tlar hnung hnung a chuh a, a aia te an vin hlek chuan a khup ang zul zul tho a, mi zawng zawngin an ngam a, amah paw’n mi zawng zawng a ngam a, khawvel hi ka ngam ta ti ni awm fahranin a hawi paw vo nitin mai thin kha a ni. Inthunun zan kan hman apianga ring kham urh a kun chunga inkuangkuah leh ngil taka thuchunga nuih insum a ngaih lain a ni a chet ve thung erawh chuan khawvela hausa ber ni ila khawvela insum theihna zawng zawng pawh hi a a pumbilin lei mah ila kan la insum zo chuang lo ang tih ang vel a ni, tarmit lian mangkheng leh pheikhawk sang hlui thing mangkheng  a bun hnu a kan senior te’n khuang an put tir a paihte hla an han sak tir meuh kha chuan khawvelah hian lungngaihna hi a  awm ve  ani tih reng reng kan hre seng tawh lo thin! Chung zawng zawng ai chuan a tingtang perh der chung a a zai mawlh mai kha- thingtlang dila utawk nuthlawi raipuar chu zaithiam tak a ni, nulianpui thinthawk aw tial reu ruau leh a hmai hlai thal heh huah hmeh lo khawpa no hnapin zan reh tawh lamah“zingah savate'n” a'n ti er er a, sakhuana la na mi vak a ni lo a niang chu Pathian hla hriat mumal nei hek lo, love song sak phal loh a ni bur bawk nen, a hla rawn phawrh chuan nuih a tiza ngei mai, chutah tingtang perh thiam si lo, junior most voice test paltlang ngai si, tingtang hrui nghawr dawt dawt khawpin an beng a, a’n la faifuk zui phei kha chu khawvel hian beng neiin chhi ta se bengawng a thlang duh zawk hial ang tih vel a ni!

Kungfu shoe uar atanga kum tam a liam ta, ani erawh chuan savun sen ngeia siam kungfu shoe uk de sep sep ngei mai nena inkhawm kha a thlang ta tlat mai thin kha chu a nia. Chawlhni zing a lo thlen tawh hi chuan a sam kir kawi deuh chhiai, a lu umin a hmeh bik em em mai a a lai a bari then phawk chungin hnawihsen uk tle sep sep chi a’n in hnawih a, darthlalang keh them sir hriam khawro deuh hmaah khi deuh reuh tum deuh reuh chung siin a'n tep chap chap a, a puan kheimit hnuai thleng rawka vuakthuah pawpin a'n veng a, a kawr par chhiai a hak  tawh hi chuan inkhawm a cho em em a, ani aia inkhawm cho kha an awm ngai lo reng reng, hemi kawngah hi chuan tuma’n tluk pawh kan tum ngai eih lo, tluk phaka kan dah loh miau vang pawh a ni mahna. Nulian tak a nih bakah a kawr leh kekawr a par nasa thei bawk a, a thawmhnaw a pangpar awmzat pawh chhiar a har lo ngei mai. Upa ber e ti lo chuan kan pawla a te ber nen an inkawp chawt a, radio bula a mu chung khan duh duhin an bawl kual a, an bawl a ni tih hre reng mahse a thin erawh a rim eih ngai lo thung. A bungrua engkim kan sawp sak a, a thil duh duh kan ban sak chung khan vawikhat pawh a phun ngai lo, a phunna awm chhun chu “a pawlh nge pawlh lo ka tih chuan min chhang vat rawh u” tih te mai chuah a ni.

First year kan nih lain kan bengchheng ngam si lo, tleirawl harh rual kan la ni si, zan khat chu kan thiannu birthday denchhenin kan senior te tape play ri ah kan lam a, mahni thawmhnaw duh duh hain inti nalh takin thawm nei miah si loin kan su nghawng nghawng a chutah le a ri rup a, ka thiani a’n lo chhuak mai chu- ngaiteh! khawte nula chawlhni chhuna buh deng zo ang maiin intithei tak hmel nen a pawnfen uk par chunga a mut kawr hain dum mangkhenga a mit hnawih kual raih chungin a sam a raw’n zial a, a’n rawn su ve ta tak tak mai a nih kha, nuih hlutna leh tah hlutna hre lo lekin mittui tlaphunga kan nuih tak chiam kha! Hmangaihna la na mi a ni ve aniang chu kan lawina kohrana naupang lulian zet mai nen atta per leh bawngsa tui karah an lo inchhai ve thin niawm tak a ni, amah lah chuan a sawi tha duh der lo leh nghal a, mi zawng zawngin kan huat rawn lain annni erawh chu kawngchhak leh kawngthlang atangin an lo inchhai thin chu niin! Zan khat rilru nat neilo mihring tlemte zinga mi a ni bawk a kan trainning chhunga a ngaihzawng neih zat pawh a average-a lak sak a ngai hial asin!

Phone-a “K’u mathan jung jung ti dawn mi” tih atanga zan reia thosilen ban phei zawt zawt kha chu nula tihawm reng a nih lem loh lain a niin a tih ve thung erawh chuan makah pawh kan dah chuang lo a, a tih tur ve reng a nih pawh kan hre chuang lo. Kum thum tal tawp lubuk ber a nih hnuah a sam a pawh ngil tir a, a pawh ngil tir zana a mut theih loh te leh kar khat chhung vel a hawi sawn that ngam loh te kha mak ve tak chu ni. zanah lah nise a sam sei hnuang ngil pap chu a khumah a zalhin a zalh thlap thin a, Sam pawh ngilna hi a awmlo ang tih kan hlau ngawih ngawih thin. Nghawng che miah lo a lam leh zai thei mihring tlemte zinga mi a ni a, nghawng che miah loin kailawn kual thum a kual chhuak thei a, nghawng che miah lo bawkin zai chungin a eih lauh lauh thei a ni. Phone kawl phallohnaa kan awm avangin dan bawhchhetu tan chuan case rip tak kan awrh reng mai a, a ni kha chuan engah mah ngai ve hek lo, dan bawhchhe hmasa berte zinga mi a ni a, chutah a zaithei ngei mai nen. inrinni chhun kan chhuah theih hun lai chhun pachanga “one more day” tia a kal zai vut vut hmuh chuan a hnungah kan lo kimki chawih chawih thin, mahse a ni tan zawng khawvel hi rimawi a ni miau si a.


Rimawi kalphung hre miah si lo khan daduhi hla leh abba hla chu hriat loh a nei mang lo a mizo hla hlui bu atan amah kha kan hman chang lah a tam bawk, zan rei a “I tan chauh tia” a tih vang vang chang lah a tam, chutah a pa diary song book-a a hmang kha chu a fuh chiah lo ve deuh a ni. Lehkhabu tereuhte sei zit zet a kawm pawl duk ruih leh tingtang nen thla eng hnuaiah kan inchhawp hnawk ve uaih tawh a, a hlabua hla sak tur kan han zawng mai  kha chu hla chang khat aiah inrinni bazaarna list a tam zawk a, a pain a tomato leizat a ziahna leh a bawkbawn lei zat leh a man thlengin a lo intlar thla dal a, thla eng hnuaia lunglen chu khawilam, mittui tla phungin nula sawm rual kan han  nui mai kha chu vantirhkohte paw’n mawi an tih hial ka ring thin, kha hun kha engtikah mah ka tawng leh tawh ngai dawn lo tih ka hriat hian ka lung a leng vawng vawng thin, kha hun kha tudang vang ni loin amah LESBI-I vang chauha tawng ka ni si a, ka ngai mang e ka thiannu hi!

A phone zai thei neih tirh mawlh mai kha ka theihnghilh thei tawh lo, phone sendang chhahtupah khan memory card awm ve miau hek, junior ber/tih duhdah ber kan nih angin sap zai ngaihthlak lohna a rei ta bawk a, kan hmachhuan ber ka thiani chuan lawm fahran leh inti fuh fahranin hla thar a rawn hawn ve a, june khawlum laiin zanlai pelhrawkthleng “mary’s boy child” tih boney M sak ngei mai krismas hla ngei kha kan han ngaithla thin mai a nih kha, a zan li na velah chuan kha hla khan luak a pawt deuh reuh tawh zawk a, ka khum bulah a mu si, zan dar 12 pelh tawhah pawh a la zaipui tui dawn chauh lehnghal thin kha chu a ni si a, manganthlak thei asin! Chutah a karlehah inti fuh fahranin hla thar a rawn hawn leh a, kan ngaihthlak theih hun dar 10 kan nghak thap a, chutah zan dar 10 pelh tawh hnuah inti fuh fahranin “good morning beautiful” tih hla kan room pumpui min han khilai thin mai a nih kha, zan a rei telh telh a, kan good morning telh telh mai thin a nia, ka thiani hi zawng a dangdai thin asin! Ka chhuang a nia!
                                                      

Tuifar dawh ruk dan technology ropui lutuk  hmu chhuaktu a nihna kha a chapopui ngai reng reng lo chung khan an in banga grape duk sen charh zam rah a chhungte’n an lo thawn tum erawh chuan kan be phak lo mai a ni lo a, mi zawng zawng hian kan tlawnrawn a ni ber mai. Incheinaah lah nise a boruak tawn a sang lo naa a’n inchei tak tak chuan a ni tluka parmawi leh de sep sep nasa an awm lo ang, khum thei an awm pawh ka ring hek lo. Inrinni tlai a len haw apiangin “thiannu ka kawrmawi hi lo enrawh” tiin min lo welcome ziah a, chutah phur em em a kan en chuan lunglei khawpuia kawr a par nasa ber ber leh a tle thei ang ber ber a la khawm emaw tih tur khawpin zan tube light hnuaiah kan han zar phe sep sep mai thin a nih kha, nuam dangdai ve deuh mai asin. Hapui lang tut, hrawk che ner ner leh dang fawn lerh lerh khawpa nui awr awr chungin hanawhna a’n keng kual a, a thenin an pindan atangin a bialpa hmingin an lo au vel bawk nen, a tan chuan khawvel aiia nuam hi a awm lo reng reng tih theih tluk a ni. Thlalakna apiangah a dingkawisawi mawi ber nih a tum ngai lo a, a ni ngai bawk hek lo, chuti chung chuan a lung a awilo ngai lo a, tumah a dem bawk hek lo a, engkimah a lungawi em em a ni, thlalak a chhuah apiang erawh chuan amah a inzawng hmasa ber a, ama thlalak a zawn hmuh hnua a pil bo vang vang tawh hi chuan khum kil khatah a lo khi leh ver ver thin, a chhan lah zawh chhuah rual loh a ni a, zawh vaih chuan rum theihtawpa melh kan hlawh thin avangin ka thiani mengrum hlawhchhuah chu kan hlau vek aniang chu, kan ngawih thap thin danah khan.

Thinrimna hi mihring nuna bet ve reng emaw ka ti thin, zaidam thinrim ka hmu tawh a, thinchhe thinrim lah ka hmu fo bawk, mahse he nu nunah hian thinrimna hian hmun a changlo emaw tih tur hial khawpin thinrimna hian a nun a luah ve ngai hauh lo nia, mi mak tak a nihna kan sawi zawng zawngah khan hei hi mak ka la ti ber ang, kum li deuhthaw chhung khan vawi khat chiah a thin a rim ka hria. Chumi tum pawh chuan a thinrim a ang zo chiah fiamthu nen kan chhaih a, nui awr awr pahin “in ho” tih zawngin min chhang mawle! Ka thiani sam buk kir chhep kha arsi phe tuar leh thli thaw heuh heuh hnuaia thlah leng suau suau pahin a kekawr tlawn puk par phuk phuk leh a kamis dum tle a ha a, inchung cement zut awna mu pharh diai chungin a aw sin no nghalh naupang aw ang maia thianghlim in “tuar zo reng hian maw?” an ti hlarh hlarh kha chuan arsi te pawhin “engnge a tawrh zawh loh aw” tia an inzawh ve sap sap ka ring thin

Ei duh loh a nei lo a, ei theih loh lah a nei hek lo, maian par kan atanga vawksa hem hmin thleng khan a hrawkah a lut duak duak a, a pian mum mar chum buang, awmbawr atanga mawrbawr inrual thla pat, pum puam deuh al tan chuan han ria thaih ngaihna kha a awmlo ve bawk a ni, zir san aiin ei san a hlau zawk a, ei tlem aiin mut tlem a hlau zawk vang emawni kum 4 chhunga mipangngaiin vawi 14 exam kan neih laiin ani hi chuan vawi  26 a exam bik a, mithate hi chu Pathianin mal a sawm thin a ni tih a lan chian na a niang chu khati chung khan mi naran lo deuhah a chhuak ve leh tlat thung si a, thinlung thianghlim tak a put avang a nia nge a pa in “mambawih I bialpa chu eng ang mi nge” a tih pawhin “ih maw patling” a tih kiau ni!



Vawikhat chu chapal thar a lei a, khatih hunlai khan floaters uar lai a ni bawk a, kan neih thar sap sap vang a niang chu, a rawn hawn ve hlawl mai a, ngawi rengin a khumah a thu a, a melh ngai  a lo melh leh vawng vawng thin a ni tih ka hriat chuan a thil en ka thlithlai sak nghal a, kan hmuh chian meuh chuan a floaters thar uk paw deuh vo, bekang rawng aia dal si, a chung phui mep mup, a uk duk a a chhuat tial, a hnuai chhah deuh tap leh a sir inkerkua chu a lo thlir ning thei lo chu niin!. A chapal thar avang chuan kar khat lehkha a zir thei lo a, zan tin a mumangah a hmu bawk. Kha chapal a neih thar tirh kar khat chhung chu zingtin a mumanga a chapal uk chhah thar a hmuh thu kha min fah ziah a ni. Kan warden kan hne em em thin chuan aw tial ruai in “sangber” an ti vang vang a, keini chu ni ila kan bihruk loh paw’n kan hre lo der ngei ang, a ni kha chuan ekin a a awm laklawh lai leh a chaw ei lai pawh sawi lo hian “aw madaaaammmmm” a'n ti no tliang fawn hlerh hlerh mai thin kha chu kan madam pawh kha a thawk hawk ka ring thin. A tawng dawn apianga “thiannu” tih leh nui awr awr a inzawm fo avang khan ngaiah an lo nei hman tawh a, mahse tunah a aw hriat phaklohnaa ka awm hnu hian kha nui ri hlutzia kha ka hrechhuak nawn fo thin.  Rillru thianghlim ngang leh zep nei ngailo a ni bawk a, vawikhat kan training tirhin damdawi leh engilo chungchang pakhatmah la hre hek lo, BP check-na tak ngial pawh kan la hmang thiam lo a chuti chung chuan thiam ber hawiin kan hawi ve lawl lawl thin a, damloin min tirh dawn pawhin chhuanlam dang kan siam a, kan senior te hnenah kan report hram hram thin, ani kha chuan khatiang tih nachang hre ve hek lo, zingkhat chu damlo pakhatin “mami ka BP hi a chiangloin ka hria, min en sak lawk thei angem” a lo tih chu a ni chuan aw dam diaiin “ka pu keini chu kan la tharlam lutuk a, hetiang engmah kan thiam ve lo” a lo ti sam et mai sia le, kha damlo tan kha chuan awm a nuam lo duh ngawt ang chu, keini chu ni ila inti thiam fahranin thiam siloin kan seniorte hlau chung chungin kan tihtir leh dut dut awm si a. Tleirawl nalh chak rual ka ni bawk a, in diet leh cher tum reng rengin kan hmanhlel hlawm a, chutah a rilruah a lang ve a niang chu, a indiet tum chaw ei loin chhangthawp lian chi tlawm thum chaw ah a'n ring mai kha chu hmuhnawm ve tak chu a ni. A in diet beidawn thak tawh hnuah kawng thar a hmuchhuak leh ta, "sugarfree" buiscuit" hmangin, mi pangngaiin sugarfree buiscuit pathum vel nena an indiet laiin a ni chuan a'n ti leh ta tak tak a, buiscuit bawm khat (buiscuit mal 24) chu a chaw vawikhatt  ring a ni leh ta reng mai, a dam chhungin cher ni reng reng a hmu ve dawn lo a nih hmel! mahse lunglohah a la ngai lo a, a hlimna a pawlhdal pha eih lo bawk kha ka chhuan lehna em em chu a ni.

Mi ropui tam tak ka hria a, thufing tam tak sawitu leh an thusawi pawh ka hria, ka thiannu hian thufing a sawi ka hre ngai hauh lo mahse chung ho zawng zawng ai chuan ka thiannu hi ka chhuang a, a nun atang hian thil tam tak ka zir a, a nun hi ka tan chuan rimawi tluk hial a mawi a ni a, Amahah hian zirlai tam tak a in phumru a, a nun hi thawnthu bu ngaihnawm, hlimawm leh tha eltiang a ni a, thu ngaihnawm fuankhawmna pawh a tih theih hial ang. Amah avangin hun hlimawm tam tak ka tawng a, ka theinghilh theih tawh ngailoh tur hun sawisenloh ka tawng bawk. Hlimna hi a lei a lei chhuah rual a ni lo tih min zirtirtu chu amah hi a ni a, hausate hlimna aia retheite hlimna a tlem bik chuangloh zia min zirtirtu pawh amah bawk hi a ni. Nun mawina hi pawnlam niloin chhungril a ni tih te, thil hlutna leh an mawina chu thinlung atang chauha chhuak a ni tihte ka hre ta amah vang hian. A thiante a phatsan ngailohnaah khan mi nghet tak a ni tih a hriat a, rinawmna hi engkim dang aiin a hlu  a ni tih min zirtirtu pawh amah bawk hi a ni. Thil zawng zawng hian lungkhawng a nei a ni tih te, sual chu thatnaa hneh tur a ni tih te leh thinrimna aiin hlimna a hlu a ni tih zawng zawng min zirtirtu chu amah LESBI-I ngei hi a ni! Ka va’n ngai tak che em!


11 comments:

  1. A va ngaihnawm e! Zanlaiah mahni kan khi suk suk mai a lawm le!

    btw.. maitamtawk hi a hming chiah ka hria. In nuih awih loh :P

    ReplyDelete
  2. A va ngaihnawmin mi va tihlim mai mai em! I ziak thiam bawk si, ngaihnawm thamin a sei bawk a, a hlimawm kher mai. I thiannu thatna hmuh hmaih hauh si lovin i rawn chingphar nasa ngei e.. :-)

    ReplyDelete
  3. :) vaiva i lo haw leh veleh maitamtawk trip ka lo thawn dawn che nia :) ka nuih lo che mahse ka la khi suk tho mai a :) ka lawm e aw ka blog-ah i lo leng lut a

    ts-ka thiani hi maw ka chhuang a nia, a ni ang hi khawvel mihringah an vang viau maithei a ni, lawngtlaiah a awm e tunah chuan i kal hunah i lo tlawh ve ngei dawn nia :) ka lawm e aw

    ReplyDelete
  4. haha..sb-i chanchin chhiar cu hlimom ngei mai...i tithra e Rose..:)longtlai poh nuam a tih hmel vuk2 khop kha leee..keichu a phne an mansak laia a romeo molh kha k theihnghilh thei lo...:D

    ReplyDelete
  5. hahha a romeo chanchin kha chu ka hrechiang ve vak lo a, ka ziak tel ngam ta lo mai a nih kha. a chanchin ka ngaihtuah hi chuan ka nui tawp thei lo. misty:)

    ReplyDelete
  6. haha..amah hi mihring hlimom tak a ni...:D

    ReplyDelete
  7. mihrign hlimawm mai a ni lo, mihring ngaihnawm a ni! :)

    ReplyDelete
  8. I phuahchawp emaw tia! True story a va nih hmel ve! I thiannu chu mi mak sarang a nih chu. I ziak chhuak thiam ka ti ngawt mai.

    ReplyDelete
  9. sahrang hmaah a zam ngai lo! :) true story based an tih ang chi hi a ni pawh ka ti chuang lo :D :D

    ReplyDelete
  10. Va ngaihnawmin ava hlimawm ve. I suangtuahna thian bawl phawn vel emawh tih laiin a tak tak a lo ni reng a ni maw. Hetiang mi hi mi sipisial an ni a, hmuh tur an awm mai mai lo a sin, a bula awm a chakawm hle mai. Lawngtlaiah kan kal mial a nih chuan tlawh chhuah tur a nih chu.

    ReplyDelete
  11. ka lawm e tripplestar i lo leng a. ka thiannu hi misipicial tak leh rilru tha mangkheng a ni, atan mi sual an awm ve lo. amah hriatchian a hlawkthlak asin!

    ReplyDelete